1 Corinthians 16

Romans  «  1 Corinthians 15  ‹  1 Corinthians 16  ›  2 Corinthians 1  »  2 Corinthians

ՅՈՐԴՈՐ ՀԱՒԱՏԱՑԵԱԼՆԵՐՈՒՆ

Ինչ կը վերաբերի սուրբերուն համար ըլլալիք հանգանակութեան, ինչպէս պատուիրեցի Գաղատացիներու եկեղեցիներուն, դո՛ւք ալ այնպէս ըրէք։

Ամէն Մէկշաբթի՝ ձեզմէ իւրաքանչիւրը թող մէկդի դնէ իր քով ինչ որ յաջողած է ¹խնայել,

որպէսզի հանգանակութիւններ չըլլան երբ ես գամ։ Ու երբ գամ, անոնք որ ²զատորոշէք՝ զիրենք պիտի ղրկեմ նամակներով՝՝, որպէսզի Երուսաղէմ տանին ձեր պարգեւները։

ՊՕՂՈՍԻ ԾՐԱԳԻՐՆԵՐԸ

Եթէ իմ երթալս ալ արժանավայել ըլլայ, անոնք պիտի երթան ինծի հետ։

Ուրեմն ես պիտի գամ ձեզի՝ երբ անցնիմ Մակեդոնիայէն. (քանի որ պիտի անցնիմ Մակեդոնիայէն.)

եւ թերեւս մնամ ձեր քով ու ձմերեմ ալ ձեզի հետ. որպէսզի դո՛ւք ուղարկէք զիս՝ ո՛ւր որ երթամ։

Որովհետեւ չեմ ուզեր տեսնել ձեզ հիմա՝ անցած ատենս, բայց կը յուսամ որ ժամանակ մը մնամ ձեր քով, եթէ Տէրը արտօնէ։

Սակայն Եփեսոս պիտի մնամ մինչեւ Պենտեկոստէ.

որովհետեւ մեծ եւ արդիւնաւոր դուռ մը բացուած է ինծի, ու բազմաթիւ հակառակորդներ կան։

Ուրեմն եթէ Տիմոթէոս գայ, ուշադի՛ր եղէք որ մնայ ձեր քով առանց վախի. քանի որ ան կ’ընէ Տէրոջ գործը, ինչպէս ե՛ս ալ։

Ուստի ո՛չ մէկը թող անարգէ զայն. հապա խաղաղութեա՛մբ ուղարկեցէք զայն՝ որ ինծի գայ, որովհետեւ անոր կը սպասեմ եղբայրներուն հետ։

Իսկ ինչ կը վերաբերի Ապողոս եղբօր, շատ աղաչեցի անոր՝ որ ձեզի գայ եղբայրներուն հետ, բայց բնաւ փափաք չունեցաւ որ հիմա գայ. սակայն պիտի գայ՝ երբ պատեհութիւն ունենայ։

ՎԵՐՋԻՆ ԽՕՍՔԵՐ

Արթո՛ւն մնացէք, հաւատքի մէջ հաստատո՛ւն կեցէք, ³քա՛ջ եղէք, զօրացէ՛ք։

Ձեր բոլոր բաները սիրո՛վ ըլլան։

Կ’աղաչե՛մ ձեզի, եղբայրնե՛ր, (դուք կը ճանչնաք Ստեփանասի ընտանիքը, որ Աքայիայի երախայրիքն է, եւ իրենք զիրենք նուիրեցին սուրբերուն սպասարկութեան,)

որ հպատակիք այդպիսիներուն եւ բոլորին՝ որ կը գործակցին մեզի ու կ’աշխատին։

Ուրախ եմ Ստեփանասի, Փորտունատոսի եւ Աքայիկոսի գալուստին համար, որովհետեւ իրե՛նք լրացուցին ձեր պակասը,

քանի որ հանգստացուցին իմ հոգիս ու ձերը. ուրեմն ճանչցէ՛ք այդպիսիները։

Ասիայի եկեղեցիները կը բարեւեն ձեզ. Տէրոջմով շատ կը բարեւեն ձեզ Ակիւղաս եւ Պրիսկիղա՝ իրենց տան մէջ եղող եկեղեցիին հետ։

Բոլոր եղբայրները կը բարեւեն ձեզ. բարեւեցէ՛ք զիրար սուրբ համբոյրով։

Ես՝ Պօղոս, ի՛մ ձեռքովս կը գրեմ այս բարեւը։

Եթէ մէկը չի սիրեր Տէր Յիսուս Քրիստոսը, նզովեա՛լ ըլլայ երբ ⁴մեր Տէրը գայ՝՝։

Տէր Յիսուս Քրիստոսի շնորհքը ձեզի հետ։

Իմ սէրս ձեր բոլորին հետ՝ Քրիստոս Յիսուսով։ Ամէն։