1 Thessalonians 5

Colossians  «  1 Thessalonians 4  ‹  1 Thessalonians 5  ›  2 Thessalonians 1  »  2 Thessalonians

ՊԱՏՐԱ՛ՍՏ ԵՂԷՔ ՔՐԻՍՏՈՍԻ ԳԱԼՈՒՍՏԻՆ

Բայց, եղբայրնե՛ր, պէտք չունիք որ գրեմ ձեզի այդ ժամանակներուն եւ ատեններուն մասին,

քանի որ դուք իսկ ճշգրտութեամբ գիտէք թէ Տէրոջ օրը կու գայ գիշերուան գողին պէս։

Երբ մարդիկ ըսեն թէ “խաղաղութիւն եւ ապահովութիւն է”, այն ատեն աւերումը անակնկալօրէն պիտի հասնի անոնց վրայ՝ յղիին երկունքին պէս, ու զերծ պիտի չմնան։

Բայց դո՛ւք, եղբայրնե՛ր, խաւարի մէջ չէք, որ այդ օրը գողի մը պէս հասնի ձեր վրայ.

որովհետեւ դուք բոլորդ լոյսի որդիներ էք, եւ ցերեկուան որդիներ.

գիշերուան որդիներ չենք, ո՛չ ալ խաւարի։ Ուրեմն չքնանա՛նք ուրիշներու նման, հապա ըլլա՛նք արթուն ու զգաստ.

քանի որ անոնք որ կը քնանան՝ գիշե՛րը կը քնանան, եւ անոնք որ կ’արբենան՝ գիշե՛րը կ’արբենան։

Իսկ մենք՝ որ ցերեկուան որդիներն ենք, զգա՛ստ ըլլանք՝ հագնելով հաւատքի ու սիրոյ զրահը, եւ իբր սաղաւարտ՝ փրկութեան յոյսը։

Որովհետեւ Աստուած որոշեց մեզ ո՛չ թէ բարկութեան համար, հապա՝ փրկութեան տիրանալու մեր Տէրոջ՝ Յիսուս Քրիստոսի միջոցով։

Ան մեռաւ մեզի համար, որպէսզի մենք ապրինք իրեն հետ, արթուն ըլլանք թէ քնացած։

Ուստի յորդորեցէ՛ք զիրար եւ շինեցէ՛ք զիրար, ինչպէս արդէն կ’ընէք։

ՎԵՐՋԻՆ ՅՈՐԴՈՐՆԵՐ ՈՒ ԲԱՐԵՒՆԵՐ

Կը թախանձենք ձեզի, եղբայրնե՛ր, որ ճանչնաք ձեր մէջ աշխատողները, Տէրոջմով վերակացուներն ու ձեզ խրատողները։

Պատուեցէ՛ք զանոնք մեծ սիրով՝ իրենց գործին համար։ Խաղաղութի՛ւն ունեցէք իրարու հետ։

Կը յորդորե՛նք ձեզ, եղբայրնե՛ր, խրատեցէ՛ք անկարգները, սփոփեցէ՛ք թուլասիրտները, ձեռնտո՛ւ եղէք տկարներուն, համբերատա՛ր եղէք բոլորին հանդէպ։

Զգուշացէ՛ք, ո՛չ մէկը չարիքի փոխարէն չարիք հատուցանէ ոեւէ մէկուն. հապա՝ ամէն ատեն հետամո՛ւտ եղէք բարիին, թէ՛ ձեր միջեւ, թէ՛ բոլորին հանդէպ։

Ամէն ատեն ուրա՛խ եղէք։

Անդադար աղօթեցէ՛ք։

Ամէն բանի մէջ շնորհակա՛լ եղէք, որովհետեւ ա՛յս է Աստուծոյ կամքը ձեզի հանդէպ՝ Քրիստոս Յիսուսով։

Մի՛ մարէք Սուրբ Հոգին։

Մի՛ անարգէք մարգարէութիւնները։

Քննեցէ՛ք ամէն բան, բարի՛ն ամուր բռնեցէք։

Ե՛տ կեցէք ամէն տեսակ չարութենէ։

Նոյնինքն խաղաղութեան Աստուածը ամբողջովին սրբացնէ ձեզ, եւ ձեր հոգին, անձն ու մարմինը ամբողջութեամբ անմեղադրելի պահուին մինչեւ մեր Տէրոջ՝ Յիսուս Քրիստոսի գալուստը։

Ա՛ն որ կանչեց ձեզ՝ հաւատարիմ է. նաեւ ի՛նք պիտի կատարէ ատիկա։

Եղբայրնե՛ր, աղօթեցէ՛ք մեզի համար։

Բարեւեցէ՛ք բոլոր եղբայրները սուրբ համբոյրով։

¹Կը պարտադրեմ՝՝ ձեզ Տէրոջմով, որ կարդաք այս նամակը բոլոր սուրբ եղբայրներուն։

Մեր Տէրոջ՝ Յիսուս Քրիստոսի շնորհքը ձեզի հետ։ Ամէն։