2 Chronicles 14

1 Chronicles  «  2 Chronicles 13  ‹  2 Chronicles 14  ›  2 Chronicles 15  »  Ezra

ԱՍԱ ԹԱԳԱՒՈՐԸ ԿԸ ՅԱՂԹԷ ԵԹՈՎՊԻԱՅԻ

Աբիա իր հայրերուն հետ քնացաւ, ու զայն Դաւիթի քաղաքին մէջ թաղեցին։ Անոր տեղ իր որդին՝ Ասա թագաւոր եղաւ. ասոր օրերը երկիրը տասը տարի հանդարտեցաւ։

Ասա ըրաւ ինչ որ Տէրոջ՝ իր Աստուծոյն ¹առջեւ բարի եւ ուղիղ է։

Օտար աստուածներուն բագիններն ու բարձր տեղերը հանեց, արձանները կոտրտեց, եւ աստարովթները կտրեց։

Յուդայի հրամայեց որ Տէրը՝ իրենց հայրերուն Աստուածը փնտռեն, եւ Օրէնքն ու ²պատուիրանները գործադրեն։

Յուդայի բոլոր քաղաքներէն բարձր տեղերը եւ արեւի սիւնարձանները հանեց, ու թագաւորութիւնը իր առջեւ հանդարտեցաւ։

Ան Յուդայի մէջ ³ամրացած քաղաքներ կառուցանեց. արդարեւ այդ տարիներուն մէջ երկիրը հանդարտած էր եւ իրեն դէմ պատերազմ ընող չկար, որովհետեւ Տէրը զինք հանգստացուցած էր։

Ուստի Ասա Յուդայի ըսաւ. «Այս քաղաքները կառուցանենք, ու զանոնք պարիսպներով, աշտարակներով, դռներով եւ նիգերով շրջապատենք, քանի այս երկիրը մեր ⁴իշխանութեան տակ՝՝ է՝ որովհետեւ մեր Աստուածը փնտռեցինք։ Զինք փնտռեցինք, ինք ալ մեզ ամէն կողմէ հանգստացուց»։ Այսպէս՝ զանոնք կառուցանեցին ու յաջողեցան։

Ասա ասպար ու գեղարդ կրող զօրագունդ մը ունէր. Յուդայէն՝ երեք հարիւր հազար մարդ, ու Բենիամինէն՝ վահան կրող եւ աղեղ քաշող երկու հարիւր ութսուն հազար։ Ասոնք բոլորը զօրաւոր կտրիճներ էին։

Եթովպիացի Զարա դուրս ելաւ անոնց դէմ՝ ⁵մէկ միլիոն՝՝ մարդէ կազմուած զօրագունդով ու երեք հարիւր կառքով, եւ Մարեսա հասաւ։

Ասա դուրս ելաւ անոր դէմ, ու Մարեսայի մօտ՝ Սեփաթայի ձորին մէջ պատերազմելու համար շարուեցան։

Ասա Տէրոջ՝ իր Աստուծոյն գոչեց եւ ըսաւ. «Ո՛վ Տէր, քու առջեւդ տարբերութիւն մը չկայ՝ թէ՛ շատով եւ թէ ⁶քիչով օգնելու մէջ։ Մեզի օգնէ՛, ո՛վ Տէր, մեր Աստուա՛ծը, որովհետեւ ⁷քեզի ապաւինեցանք՝՝ եւ այս բազմութեան դէմ քու անունովդ եկանք։ Ո՛վ Տէր, դո՛ւն ես մեր Աստուածը. մարդը քեզի դէմ թող չզօրանայ»։

Տէրը Եթովպիացիները Ասայի ու Յուդայի առջեւ զարկաւ. Եթովպիացիները փախան։

Ասա եւ իրեն հետ եղող ժողովուրդը զանոնք մինչեւ Գերարա հետապնդեցին։ Եթովպիացիները ինկան ու ⁸վերապրող չմնաց՝՝, քանի որ Տէրոջ առջեւ եւ անոր բանակին առջեւ ջախջախուեցան։ Յուդայեանները յոյժ շատ աւար առին,

ու Գերարայի շրջակայ բոլոր քաղաքները զարկին. արդարեւ անոնց վրայ Տէրոջ երկիւղը ⁹ինկաւ, եւ բոլոր քաղաքները կողոպտեցին, որովհետեւ անոնց մէջ շատ ¹⁰աւար կար։

¹¹Հօտերուն վրաններն ալ զարկին, ու բազմաթիւ ոչխարներ եւ ուղտեր ¹²յափշտակելով՝ Երուսաղէմ վերադարձան։