2 Chronicles 15

1 Chronicles  «  2 Chronicles 14  ‹  2 Chronicles 15  ›  2 Chronicles 16  »  Ezra

ԱՍԱՅԻ ԲԱՐԵԿԱՐԳՈՒԹԻՒՆՆԵՐԸ

Աստուծոյ Հոգին Ովդեդի որդիին՝ Ազարիայի վրայ ¹եկաւ,

եւ Ասայի առջեւ ²երթալով՝ անոր ըսաւ. «Ո՛վ Ասա, եւ ամբողջ Յուդա ու Բենիամին, ինծի՛ մտիկ ըրէք։ Տէրը ձեզի հետ է, երբ դուք անոր հետ ըլլաք. եթէ զայն փնտռէք, զինք պիտի գտնէք. բայց եթէ զայն լքէք, ինք ալ ձեզ պիտի լքէ։

Իսրայէլ երկար ժամանակ առանց ճշմարիտ Աստուծոյ, առանց սորվեցնող քահանայի եւ առանց Օրէնքի մնացած էր.

բայց երբ իրենց տագնապին մէջ Տէրոջ՝ Իսրայէլի Աստուծոյն վերադարձան ու զայն փնտռեցին, զինք գտան։

Այդ ատենները ելլողին եւ մտնողին ³ապահովութիւն չկար, հապա շատ խռովութիւններ կային երկիրներու բոլոր բնակիչներուն միջեւ։

Ազգ ազգի հետ կը ⁴կռուէր, եւ քաղաք՝ քաղաքի հետ, որովհետեւ Աստուած ամէն տեսակ տագնապով խուճապի մատնած էր զանոնք։

Ուստի հիմա ուժովցէ՛ք, ու ձեր ձեռքերը թող չթուլնան. արդարեւ ձեր ⁵աշխատանքը պիտի վարձատրուի՝՝»։

Ասա այս խօսքերը եւ ⁶Ովդեդ մարգարէին մարգարէութիւնները լսելով՝ ուժովցաւ, ու պղծութիւնները ⁷հեռացուց Յուդայի եւ Բենիամինի ամբողջ երկրէն, ու Եփրեմի լեռնակողմէն իր գրաւած քաղաքներէն. նաեւ վերականգնեց Տէրոջ տաճարին ներքնագաւիթին առջեւ եղող Տէրոջ զոհասեղանը։

Ամբողջ Յուդան եւ Բենիամինը հաւաքեց, նաեւ Եփրեմէն, Մանասէէն ու Շմաւոնէն անոնց քով գտնուող պանդուխտները. արդարեւ շատ Իսրայելացիներ անոր ⁸կողմը անցան՝՝, տեսնելով թէ Տէրը՝ անոր Աստուածը իր հետ է։

Անոնք Ասայի թագաւորութեան տասնհինգերորդ տարուան երրորդ ամիսը Երուսաղէմի մէջ հաւաքուեցան

Այդ օրը իրենց բերած աւարէն Տէրոջ զոհեցին եօթը հարիւր արջառ եւ եօթը հազար ոչխար։

Նաեւ ⁹ուխտեցին որ Տէրը՝ իրենց հայրերուն Աստուածը իրենց ամբողջ սիրտով եւ իրենց ամբողջ անձով փնտռեն.

ո՛վ որ Տէրը՝ Իսրայէլի Աստուածը չփնտռէր՝ պիտի մեռցուէր, պզտիկ ըլլար թէ մեծ, այր մարդ ըլլար թէ կին։

Տէրոջ երդում ըրին բարձր ձայնով եւ ուրախութեան գոչիւնով, փողերով ու շեփորներով։

Ամբողջ Յուդան այդ երդումին համար ուրախացաւ. արդարեւ իրենց ամբողջ սիրտով երդում ըրին, եւ իրենց ամբողջ կամքով զայն փնտռելով՝ զինք գտան։ Տէրն ալ զանոնք շրջակայքին մէջ հանգստացուց։

Ասա թագաւորը նոյնիսկ իր ¹⁰մայրը՝ Մաաքան ¹¹մայր-թագուհութենէ՝՝ պաշտօնազրկեց, որովհետեւ ան Աստարովթի կուռք շիներ էր։ Ասա անոր կուռքը կոտրտեց ու մանրեց, եւ Կեդրոնի ձորին մէջ այրեց։

Բայց բարձր տեղերը Իսրայէլէն չհանուեցան. սակայն Ասայի սիրտը իր կեանքին բոլոր օրերուն մէջ կատարեալ էր։

Իր հօր ¹²սուրբ բաները՝՝ եւ իր սուրբ բաները — արծաթը, ոսկին ու առարկաները — Աստուծոյ տունը տարաւ։

Մինչեւ Ասայի թագաւորութեան երեսունհինգերորդ տարին՝ պատերազմ չեղաւ։