Amos 2

Joel  «  Amos 1  ‹  Amos 2  ›  Amos 3  »  Obadiah

զ- ՄՈՎԱԲ

Տէրը սա՛ կը յայտարարէ. «Մովաբի երեք յանցանքին համար, Ու չորսին համար անոր պատիժը պիտի ¹չկասեցնեմ. Արդարեւ Եդովմի թագաւորին ոսկորները այրեց՝ կիրի վերածելով։

Ուստի Մովաբի վրայ կրակ պիտի ղրկեմ, Որ պիտի սպառէ Կարիոթի պալատները։ Մովաբ ժխորի ու գոչիւնի մէջ, շեփորի ձայնով պիտի մեռնի։

Անոր մէջէն դատաւորը պիտի բնաջնջեմ, Եւ իրեն հետ իր բոլոր իշխանաւորները պիտի մեռցնեմ», կը յայտարարէ Տէրը։

է- ՅՈԻԴԱ

Տէրը սա՛ կը յայտարարէ. «Յուդայի երեք յանցանքին համար, Ու չորսին համար անոր պատիժը պիտի չկասեցնեմ. Արդարեւ անոնք Տէրոջ օրէնքը ²մերժեցին Եւ անոր պատուիրանները չպահեցին, Հապա իրենց ստութիւնները զիրենք մոլորեցուցին, Որոնց հետեւեր էին իրենց հայրերը։

Ուստի Յուդայի վրայ կրակ պիտի ղրկեմ, Որ պիտի սպառէ Երուսաղէմի պալատները»։

ԻՍՐԱՅԷԼԻ ԴԱՏԱՍՏԱՆԸ

Տէրը սա՛ կը յայտարարէ. «Իսրայէլի երեք յանցանքին համար Ու չորսին համար անոր պատիժը պիտի չկասեցնեմ. Արդարեւ անոնք արդարը ծախեցին դրամի փոխարէն, Եւ աղքատը՝ զոյգ մը կօշիկի։

Անոնք չքաւորներուն գլուխին վրայ կը ³տենչան երկրի հողը տեսնել, Ու հեզերուն ճամբան կը ծռեն. Իմ սուրբ անունս աղարտելու համար՝ ⁴Որդին եւ հայրը միեւնոյն պատանուհիին կը մտնեն։

Անոնք ամէն բագինի քով կ’երկննան՝ Գրաւ առնուած հագուստներու վրայ, Եւ իրենց աստուածներուն տան մէջ Տուգանքի ենթարկուածներուն գինին կը խմեն։

Մինչդեռ ե՛ս անոնց առջեւէն բնաջնջեցի Ամորհացին, Որուն բարձրութիւնը մայրիներու բարձրութեան պէս էր, Ու կաղնիներու պէս զօրաւոր էր. Վերէն անոր պտուղը փճացուցի, Եւ վարէն՝ անոր արմատները։

Ե՛ս ձեզ Եգիպտոսէն բարձրացուցի, Ու ձեզի քառասուն տարի անապատին մէջ քալել տուի, Որպէսզի Ամորհացիին երկրին տիրանաք։

Նաեւ ձեր որդիներէն մարգարէներ հանեցի, Եւ ձեր երիտասարդներէն՝ ⁵ուխտաւորներ։ Միթէ այդպէս չէ՞, ո՛վ Իսրայէլի որդիներ,— կը պատգամէ Տէրը։—

Դուք ուխտաւորներուն գինի խմցուցիք, Ու մարգարէներուն հրամայեցիք. “Մի՛ մարգարէանաք”։

Ահա՛ ես ⁶ձեզ պիտի ճզմեմ ձեր եղած տեղը, Ինչպէս որաներով լեցուն սայլը կը ճզմէ իր անցած տեղը՝՝.

⁷Թեթեւաշարժը պիտի չկարենայ փախչիլ՝՝, Ուժեղը պիտի չկարենայ իր ոյժը ⁸գործածել, Զօրաւորը պիտի չկարենայ իր անձը ազատել.

Աղեղ բռնողը պիտի չկարենայ կայնիլ, ⁹Թեթեւաշարժը պիտի չկարենայ ինքզինք ազատել, Ձի հեծնողն ալ պիտի չկարենայ իր անձը ազատել.

Զօրաւորներուն մէջ քաջասիրտ եղողը՝ Այդ օրը մերկ պիտի փախչի», կը պատգամէ Տէրը։