Amos 4

Joel  «  Amos 3  ‹  Amos 4  ›  Amos 5  »  Obadiah

«Լսեցէ՛ք սա՛ խօսքը, ո՛վ Սամարիայի լերան վրայ եղող Բասանի կովեր, Որ չքաւորները կը հարստահարէք, Աղքատները կը ճնշէք, Եւ ձեր տէրերուն կ’ըսէք. “Բե՛ր՝ որպէսզի խմենք”։

Տէրը՝ Եհովան իր սրբութեամբ երդում ըրաւ, Թէ ահա՛ ձեր վրայ պիտի գան օրերը՝ Երբ ձեզ կեռերով պիտի վերցնէ, Ու ձեր յետնորդները՝ ձուկի կարթերով։

Դուք խրամատներէն դուրս պիտի ելլէք՝ իւրաքանչիւրը իր դիմացը երթալով, Եւ բերդը պիտի նետուիք», կը պատգամէ Տէրը։

ԻՍՐԱՅԷԼԻ ԶԱՆՑԱՌՈՒԹԻՒՆԸ

«Բեթէ՛լ եկէք ու յանցա՛նք գործեցէք, Գաղգաղայի մէջ շատցուցէ՛ք յանցանքները. Ձեր զոհերը ամէ՛ն առտու բերէք, Եւ ձեր տասանորդները՝ երեք ¹օրը անգամ մը։

Շնորհակալութեան զոհը խմորեա՛լ մատուցանեցէք, Ու յօժարակա՛մ ընծաներ յայտարարեցէք եւ ²ծանուցանեցէք, Քանի որ ասիկա սիրեցիք, ո՛վ Իսրայէլի որդիներ,— Կը պատգամէ Տէրը՝ Եհովան։—

Ես ալ ձեզի ակռայի ³մաքրութիւն տուի ձեր քաղաքներուն մէջ, Ու հացի կարօտութիւն՝ ձեր բոլոր տեղերը, Սակայն ինծի չվերադարձաք,— կը պատգամէ Տէրը։—

Նաեւ տեղատարափը կասեցուցի հունձքէն երեք ամիս առաջ, Ու մէկ քաղաքի վրայ անձրեւ տեղացուցի, Իսկ միւս քաղաքին վրայ անձրեւ չտեղացուցի. ⁴Արտի մը վրայ անձրեւեց, Բայց միւս արտը՝ որուն վրայ անձրեւած չէր՝ չորցաւ.

Երկու-երեք քաղաքներ՝ ջուր խմելու համար ⁵Ուրիշ քաղաք մը գացին՝՝, Բայց ⁶չյագեցան, Սակայն ինծի չվերադարձաք,— կը պատգամէ Տէրը։—

Ձեզ խորշակահարութեամբ եւ արմտիքի դալուկով զարկի, Խառնիճը սպառեց ձեր բազմաթիւ պարտէզներն ու այգիները, Թզենիներն ու ձիթենիները, Սակայն ինծի չվերադարձաք,— կը պատգամէ Տէրը։—

Ձեր վրայ ժանտախտ ղրկեցի՝ ⁷ինչպէս Եգիպտոսի մէջ՝՝, Ձեր երիտասարդները սուրով մեռցուցի՝ Ձեր ձիերը գերեվարելով, Ձեր բանակավայրերուն գարշահոտութիւնը մինչեւ ձեր քիթը ⁸հասցուցի, Սակայն ինծի չվերադարձաք,— կը պատգամէ Տէրը։—

Աստուծոյ կործանած Սոդոմին ու Գոմորին պէս ձեզ ալ կործանեցի, Հրդեհէն ազատուած ⁹խանձողի պէս եղաք, Սակայն ինծի չվերադարձաք,— կը պատգամէ Տէրը։—

Հետեւաբար սա՛պէս պիտի վարուիմ քեզի հետ, ո՛վ Իսրայէլ. Եւ քանի սա՛պէս պիտի վարուիմ քեզի հետ, Քու Աստուածդ դիմաւորելու պատրաստուէ՛, ո՛վ Իսրայէլ.

Որովհետեւ ահա՛ կու գայ ան՝ որ լեռները ձեւակերպեց ու հովը ստեղծեց, Եւ մարդուն կը յայտնէ թէ ի՛նչ է իր մտածումը, Ան՝ որ արշալոյսը մութ կ’ընէ Ու երկրի բարձունքներուն վրայ կը քալէ. Անոր անունը “Եհովա՝ զօրքերու Աստուած” է»։