Amos 8

Joel  «  Amos 7  ‹  Amos 8  ›  Amos 9  »  Obadiah

ԿՈՂՈՎԻ ՄԸ ՏԵՍԻԼՔԸ

Տէրը՝ Եհովան սա՛ ցոյց տուաւ ինծի, ¹Կողով մը ամառնային պտուղ,

Եւ ըսաւ. «Ի՞նչ կը տեսնես, Ամո՛վս»։ Պատասխանեցի. «Կողով մը ամառնային պտուղ»։ Տէրն ալ ըսաւ ինծի. «Վախճանը հասած է իմ ժողովուրդիս՝ Իսրայէլի վրայ. Ա՛լ անոնց անօրէնութիւնը պիտի չանտեսեմ։

Այդ օրը ²տաճարին երգերը ³ողբեր պիտի ըլլան,— Կը պատգամէ Տէրը՝ Եհովան.— Շատ դիակներ պիտի ըլլան ամէն տեղ, Ու զանոնք լռութեամբ պիտի նետեն»։

ԻՍՐԱՅԷԼԻ ԴԱՏԱՎՃԻՌԸ

«Սա՛ մտիկ ըրէք, Դո՛ւք որ աղքատները կը կլլէք՝ Երկրին դժբախտները ⁴ոչնչացնելու համար,

Ու կ’ըսէք. “ ⁵Ամսագլուխը ե՞րբ պիտի անցնի՝ որ հացահատիկ ծախենք, Նաեւ Շաբաթը՝ որ ցորենի պարկերը բանանք, Արդուն պզտիկցնենք եւ ⁶սիկղը մեծցնենք՝՝, Ու խարդախուած կշիռքներով խաբենք.

Որպէսզի չքաւորները գնենք՝ դրամի փոխարէն, Եւ աղքատները՝ զոյգ մը կօշիկի, Ու ցորենին թափթփուկը ծախենք”։

Տէրը Յակոբի մեծափառութեան վրայ երդում ըրաւ՝ ըսելով. “Անոնց բոլոր արարքները ամենեւին պիտի չմոռնամ։

Ասոր համար չէ՞ որ երկիրը պիտի սարսի, Եւ անոր բնակիչներէն իւրաքանչիւրը պիտի սգայ. Ամբողջովին պիտի բարձրանայ՝ ⁷գետին պէս, Պիտի ուռի, ապա պիտի ⁸ցածնայ՝ Եգիպտոսի գետին նման”։

Այդ օրը,— կը պատգամէ Տէրը՝ Եհովան,— Արեւը կէսօրին մայր պիտի մտցնեմ, Եւ ցերեկուան լոյսին ատենը երկիրը պիտի խաւարեցնեմ։

Ձեր տօները սուգի պիտի փոխեմ, Ու ձեր բոլոր երգերը՝ ողբի. Ամէն մէջքի վրայ քուրձ պիտի բերեմ, Եւ ամէն գլուխի վրայ՝ կնտութիւն։ Երկրին մէջ սուգ պիտի բերեմ՝ մէկ հատիկ զաւակի համար եղած սուգին պէս, Անոր վախճանը դառնութեան օրուան պէս պիտի ըլլայ»։

«Ահա՛ կու գան օրերը,— կը պատգամէ Տէրը՝ Եհովան,— Երբ երկրին մէջ սով մը պիտի ղրկեմ. Ո՛չ թէ հացի սով, ո՛չ ալ ջուրի ծարաւ, Հապա Տէրոջ խօսքերը լսելու սով։

Աստանդական պիտի շրջին մէկ ծովէն միւս ծովը, Ու հիւսիսէն մինչեւ արեւելք. Պիտի շրջագային Տէրոջ խօսքը փնտռելու համար, Բայց պիտի չգտնեն։

Այդ օրը՝ գեղեցիկ կոյսերը Եւ երիտասարդները ծարաւէն պիտի խամրին.

Անոնք որ Սամարիայի յանցանքով երդում կ’ընեն ու կ’ըսեն. “Քու Աստուածդ կ’ապրի՛, ո՛վ Դան”, “Բերսաբէի ճամբան կ’ապրի՛ ”, Պիտի իյնան, եւ անգա՛մ մըն ալ պիտի չկանգնին»։