Daniel 3

Ezekiel  «  Daniel 2  ‹  Daniel 3  ›  Daniel 4  »  Hosea

ՆԱԲՈՒԳՈԴՈՆՈՍՈՐ ԿԸ ՀՐԱՄԱՅԷ ՈՍԿԻ ԱՐՁԱՆԻՆ ԵՐԿՐՊԱԳԵԼ

Նաբուգոդոնոսոր թագաւորը ոսկիէ ¹արձան մը շինեց, որուն բարձրութիւնը վաթսուն կանգուն էր, ու լայնքը՝ վեց կանգուն. զայն Բաբելոնի գաւառը կանգնեցուց, Դուրայի դաշտին մէջ։

Նաբուգոդոնոսոր թագաւորը հրաման ղրկեց՝ որ հաւաքեն սատրապները, նախարարները, կուսակալները, դատաւորները, գանձապետները, խորհրդականները, օրէնսգէտներն ու գաւառներուն բոլոր կառավարիչները, որպէսզի Նաբուգոդոնոսոր թագաւորին կանգնեցուցած արձանին նաւակատիքին գան։

Այն ատեն սատրապները, նախարարները, կուսակալները, դատաւորները, գանձապետները, խորհրդականները, օրէնսգէտներն ու գաւառներուն բոլոր կառավարիչները հաւաքուեցան Նաբուգոդոնոսոր թագաւորին կանգնեցուցած արձանին նաւակատիքին համար, ու Նաբուգոդոնոսորի կանգնեցուցած արձանին առջեւ կայնեցան։

Մունետիկ մը ²բարձրաղաղակ գոչեց. «Ձեզի կը հրամայուի, ո՛վ ժողովուրդներ, ազգեր եւ լեզուներ,

որ Նաբուգոդոնոսոր թագաւորին կանգնեցուցած ոսկիէ արձանին առջեւ իյնաք ու երկրպագէք այն պահուն՝ երբ փողին, սրինգին, քնարին, ջութակին, տաւիղին, ³տկճորին եւ ամէն տեսակ նուագարաններու ձայնը լսէք։

Ո՛վ որ չիյնայ ու չերկրպագէ, նոյն րոպէին պիտի նետուի բորբոքած կրակի հնոցի մը մէջ»։

Ուստի երբ բոլոր ժողովուրդները փողին, սրինգին, քնարին, ջութակին, տաւիղին եւ ամէն տեսակ նուագարաններուն ձայնը լսեցին, բոլոր ժողովուրդները, ազգերն ու լեզուները ինկան եւ Նաբուգոդոնոսոր թագաւորին կանգնեցուցած ոսկիէ արձանին երկրպագեցին։

ԴԱՆԻԷԼԻ ԵՐԵՔ ԸՆԿԵՐԱԿԻՑՆԵՐԸ ԿԸ ՄԵՂԱԴՐՈՒԻՆ ԱՆՀՆԱԶԱՆԴՈՒԹԵԱՄԲ

Այն ատեն քանի մը Քաղդէացիներ մօտեցան ու Հրեաները ⁴ամբաստանեցին։

Նաբուգոդոնոսոր թագաւորին խօսեցան՝ ըսելով. «Ո՛վ թագաւոր, յաւիտեա՛ն ապրէ։

Դո՛ւն, ո՛վ թագաւոր, հրաման տուիր որ փողին, սրինգին, քնարին, ջութակին, տաւիղին, տկճորին եւ ամէն տեսակ նուագարաններուն ձայնը լսող ամէն մարդ իյնայ ու ոսկիէ արձանին երկրպագէ.

իսկ ո՛վ որ չիյնայ եւ չերկրպագէ, բորբոքած կրակի հնոցի մը մէջ նետուի։

Քանի մը Հրեաներ կան՝ որ դուն Բաբելոնի գաւառին ⁵գործերուն վրայ նշանակեցիր, այսինքն՝ Սեդրաք, Միսաք եւ Աբեդնագով. այս ⁶մարդիկը տուած հրամանդ չեն յարգեր, ո՛վ թագաւոր. քու աստուածներդ չեն պաշտեր, ու քու կանգնեցուցած ոսկիէ արձանիդ չեն երկրպագեր»։

Հետեւաբար Նաբուգոդոնոսոր՝ մոլեգնութեամբ եւ ցասումով հրամայեց որ Սեդրաքը, Միսաքն ու Աբեդնագովը բերեն. ուստի այդ մարդիկը թագաւորին առջեւ բերին։

Նաբուգոդոնոսոր խօսեցաւ անոնց՝ ըսելով. «Ո՛վ Սեդրաք, Միսաք եւ Աբեդնագով, դիտումո՞վ է որ իմ աստուածներս չէք պաշտեր ու իմ կանգնեցուցած ոսկիէ արձանիս չէք երկրպագեր։

Հիմա եթէ պատրաստ էք իյնալ եւ իմ շինած արձանիս երկրպագել այն պահուն երբ փողին, սրինգին, քնարին, ջութակին, տաւիղին, տկճորին ու ամէն տեսակ նուագարաններուն ձայնը լսէք, լա՛ւ. բայց եթէ չերկրպագէք, նոյն րոպէին պիտի նետուիք բորբոքած կրակի հնոցի մը մէջ. եւ ո՞վ է այն Աստուածը, որ ձեզ իմ ձեռքէս պիտի ազատէ»։

Սեդրաք, Միսաք եւ Աբեդնագով թագաւորին պատասխանեցին. «Ո՛վ Նաբուգոդոնոսոր, հարկաւոր չէ որ քեզի պատասխանենք այս նիւթին մասին։

Ահա՛ մեր պաշտած Աստուածը կրնայ մեզ ազատել բորբոքած կրակի հնոցէն. քու ձեռքէդ ալ մեզ պիտի ազատէ, ո՛վ թագաւոր։

⁷Նոյնիսկ եթէ չընէ՝՝, գիտցի՛ր, ո՛վ թագաւոր, թէ մենք քու աստուածներդ պիտի չպաշտենք եւ քու կանգնեցուցած ոսկիէ արձանիդ պիտի չերկրպագենք»։

ԴԱՆԻԷԼԻ ԵՐԵՔ ԸՆԿԵՐԱԿԻՑՆԵՐԸ ԿԸ ԴԱՏԱՊԱՐՏՈՒԻՆ ՄԱՀՈՒԱՆ

Այն ատեն Նաբուգոդոնոսոր ցասումով լեցուեցաւ. անոր երեսին երեւոյթը այլափոխուեցաւ Սեդրաքի, Միսաքի եւ Աբեդնագովի հանդէպ։ Անոնց պատասխանելով՝ հրամայեց որ հնոցը ⁸սովորականէն եօթնապատիկ աւելի վառեն.

յետոյ իր զօրագունդին մէջ եղող զօրաւորագոյն կտրիճներուն հրամայեց որ Սեդրաքը, Միսաքն ու Աբեդնագովը կապեն, եւ բորբոքած կրակի հնոցին մէջ նետեն։

Այն ատեն այս մարդիկը իրենց անդրավարտիքներով, բաճկոններով, վերարկուներով ու միւս հանդերձներով կապեցին, եւ բորբոքած կրակի հնոցին մէջ նետեցին։

Քանի թագաւորին հրամանը շտապողական էր, ու հնոցը՝ արտակարգօրէն տաքցած, Սեդրաքը, Միսաքն ու Աբեդնագովը բարձրացնող մարդիկը կրակին բոցէն մեռան։

Իսկ այս երեք մարդիկը՝ Սեդրաք, Միսաք եւ Աբեդնագով՝ կապուած ինկան բորբոքած կրակի հնոցին մէջ։

ԵՐԵՔ ԸՆԿԵՐԱԿԻՑՆԵՐԸ Կ’ԱԶԱՏՈՒԻՆ ՈՒ ԿԸ ՄԵԾԱՐՈՒԻՆ

Այն ատեն Նաբուգոդոնոսոր թագաւորը՝ սահմռկած՝ արտորալով ոտքի ելաւ, եւ իր խորհրդատուներուն խօսեցաւ՝ ըսելով. «Մենք կրակին մէջ երեք կապուած մարդ չնետեցի՞նք»։ Անոնք թագաւորին պատասխանեցին. «Ստոյգ է, ո՛վ թագաւոր»։

Ան պատասխանելով ըսաւ. «Ահա՛ ես չորս արձակուած մարդ կը տեսնեմ, որ կրակին մէջ կը քալեն, եւ անոնց ո՛չ մէկ վնաս եղած է. իսկ չորրորդին տեսքը աստուածներու որդիի մը նման է»։

Այն ատեն Նաբուգոդոնոսոր բորբոքած կրակի հնոցին դրան մօտեցաւ ու խօսեցաւ՝ ըսելով. «Ո՜վ Ամենաբարձր Աստուծոյն ծառաները՝ Սեդրաք, Միսաք եւ Աբեդնագով, դո՛ւրս ելէք ու հո՛ս եկէք»։ Այն ատեն Սեդրաք, Միսաք եւ Աբեդնագով կրակին մէջէն ելան։

Սատրապները, նախարարները, կուսակալներն ու թագաւորին խորհրդատուները հաւաքուեցան եւ տեսան այս մարդիկը, որոնց մարմիններուն վրայ կրակը բնաւ տիրած չէր. անոնց գլուխէն մէ՛կ մազ խանձած չէր, անոնց անդրավարտիքները այլափոխուած չէին, ո՛չ ալ կրակին հոտը ⁹կար անոնց վրայ։

Նաբուգոդոնոսոր խօսեցաւ՝ ըսելով. «Օրհնեա՜լ ըլլայ Սեդրաքի, Միսաքի ու Աբեդնագովի Աստուածը, որ իր հրեշտակը ղրկեց եւ իր ծառաները ազատեց. արդարեւ անոր վստահելով՝ թագաւորին խօսքը ¹⁰արհամարհեցին ու իրենց մարմինները կրակի մատնեցին, որպէսզի իրենց Աստուծմէն զատ ուրիշ ո՛չ մէկ աստուած պաշտեն եւ անոր երկրպագեն։

Հետեւաբար ես հրաման կու տամ որ ամէն ժողովուրդի, ազգի ու լեզուի մէջ՝ ո՛վ որ Սեդրաքի, Միսաքի եւ Աբեդնագովի Աստուծոյն դէմ սխալ բան մը ըսէ՝ կտոր- կտոր ըլլայ, ու անոր տունը՝ աղբակոյտ. արդարեւ չկայ ուրիշ Աստուած՝ որ կարենայ այսպէս ազատել»։

Այն ատեն թագաւորը աւելի մեծցուց Սեդրաքը, Միսաքն ու Աբեդնագովը՝ Բաբելոնի գաւառին մէջ։