Daniel 5

Ezekiel  «  Daniel 4  ‹  Daniel 5  ›  Daniel 6  »  Hosea

ԲԱՂՏԱՍԱՐԻ ԿՈՉՈՒՆՔԸ

Բաղտասար թագաւորը իր մեծամեծներէն հազար հոգիի մեծ հացկերոյթ մը սարքեց, ու հազարին առջեւ գինի խմեց։

Մինչ Բաղտասար գինին կը համտեսէր, հրամայեց որ իր ¹հօր՝ Նաբուգոդոնոսորի Երուսաղէմի տաճարէն հանած ոսկիէ եւ արծաթէ անօթները բերեն, որպէսզի թագաւորը եւ իր մեծամեծները, կիներն ու հարճերը անոնցմով խմեն։

Ուստի Երուսաղէմ եղող Աստուծոյ տան տաճարէն հանուած ոսկիէ անօթները բերին, ու թագաւորը եւ իր մեծամեծները, կիներն ու հարճերը անոնցմով խմեցին։

Անոնք գինի խմեցին, եւ ոսկիէ, արծաթէ, պղինձէ, երկաթէ, փայտէ ու քարէ աստուածները դրուատեցին։

Նոյն րոպէին՝ մարդու ձեռքի մատներ ²երեւցան, եւ աշտանակին դիմաց գրեցին՝ թագաւորին պալատին պատին գաճին վրայ, ու թագաւորը այդ գրող ձեռքին ծայրամասը տեսաւ։

Այն ատեն թագաւորին երեսին գոյնը այլափոխուեցաւ, եւ անոր մտածումները զինք շփոթեցուցին, այնպէս որ մէջքին յօդերը կը քակուէին ու ծունկերը իրարու կը զարնուէին։

Թագաւորը ³բարձրաղաղակ գոչեց որ աստղագէտները, քաղդեաներն ու բախտ նայողները բերեն։ Թագաւորը Բաբելոնի իմաստուններուն խօսեցաւ՝ ըսելով. «Ո՛վ որ այս գրութիւնը կարդայ եւ անոր մեկնութիւնը ինծի պարզէ, ⁴ծիրանի պիտի հագնի, անոր վիզը ոսկի մանեակ պիտի դրուի, ու թագաւորութեան մէջ երրորդ կառավարիչ պիտի ըլլայ»։

Ուստի թագաւորին բոլոր իմաստունները եկան, բայց կարող չեղան գրութիւնը կարդալ եւ անոր մեկնութիւնը թագաւորին գիտցնել։

Այն ատեն Բաղտասար թագաւորը չափազանց շփոթեցաւ ու երեսին գոյնը այլափոխուեցաւ. անոր մեծամեծներն ալ սահմռկեցան։

Թագուհին՝ թագաւորին եւ անոր մեծամեծներուն խօսքերուն պատճառով՝ խնճոյքին տունը եկաւ։ Թագուհին խօսեցաւ՝ ըսելով. «Ո՛վ թագաւոր, յաւիտեա՛ն ապրէ. քու մտածումներդ քեզ թող չշփոթեցնեն, ու երեսիդ գոյնը թող չայլափոխուի։

Քու թագաւորութեանդ մէջ ⁵մարդ մը կայ, որուն ներսը սուրբ աստուածներու հոգին կայ։ Քու հօրդ օրերը՝ անոր վրայ ⁶լուսամտութիւն, ուշիմութիւն եւ աստուածներուն իմաստութեան պէս իմաստութիւն գտնուեցան, ու քու հայրդ՝ Նաբուգոդոնոսոր թագաւորը — քու հայրդ, ո՛վ թագաւոր — զայն մոգերուն, աստղագէտներուն, քաղդեաներուն եւ բախտ նայողներուն վրայ պետ նշանակեց.

արդարեւ այս Դանիէլին քով, որուն անունը թագաւորը Բաղտասասար դրաւ, արտակարգ հոգի, գիտութիւն եւ ուշիմութիւն գտնուեցան՝ երազներ մեկնելու, առեղծուածներ պարզելու եւ թնճուկներ լուծելու։ Հիմա Դանիէլը թող կանչուի, ու մեկնութիւնը պիտի պարզէ»։

ԴԱՆԻԷԼ ԿԸ ՄԵԿՆԷ ԳՐՈՒԹԻՒՆԸ

Այն ատեն Դանիէլ թագաւորին առջեւ տարուեցաւ։ Թագաւորը խօսեցաւ եւ Դանիէլի ըսաւ. «Իմ հօրս՝ թագաւորին Հրէաստանէն բերած Յուդայի ⁷տարագիրներէն եղող Դանիէլը դո՞ւն ես։

Քու մասիդ լսեցի թէ ներսդ աստուածներու հոգին կայ, ու քովդ լուսամտութիւն, ուշիմութիւն եւ արտակարգ իմաստութիւն կը գտնուին։

Հիմա իմ առջեւս իմաստուններ ու աստղագէտներ բերուեցան, որպէսզի այս գրութիւնը կարդան եւ անոր մեկնութիւնը ինծի գիտցնեն, բայց անոնք կարող չեղան այս խօսքին մեկնութիւնը պարզել։

Ես քու մասիդ լսեցի թէ կրնաս մեկնութիւններ տալ ու թնճուկներ լուծել։ Եթէ հիմա կարենաս այս գրութիւնը կարդալ եւ անոր մեկնութիւնը ինծի գիտցնել, ծիրանի պիտի հագնիս, քու վիզդ ոսկի մանեակ պիտի դրուի, ու թագաւորութեան մէջ երրորդ կառավարիչ պիտի ըլլաս»։

Այն ատեն Դանիէլ պատասխանեց եւ թագաւորին առջեւ ըսաւ. «Քու պարգեւներդ քեզի՛ ըլլան, ու ձեռաձիրներդ ուրիշի՛ն տուր. սակայն ես այս գրութիւնը թագաւորին պիտի կարդամ, եւ մեկնութիւնը իրեն գիտցնեմ։

Ո՛վ թագաւոր, Ամենաբարձր Աստուածը քու հօրդ՝ Նաբուգոդոնոսորի թագաւորութիւն, մեծութիւն, պատիւ ու փառաւորութիւն տուաւ։

Անոր տուած մեծութեան պատճառով՝ բոլոր ժողովուրդները, ազգերն ու լեզուները իր առջեւ կը դողային եւ կը սարսափէին։ Ան կը մեռցնէր ո՛վ որ ուզէր, ու ողջ կը պահէր ո՛վ որ ուզէր. կը բարձրացնէր ո՛վ որ ուզէր, եւ կը ցածցնէր ո՛վ որ ուզէր։

Բայց երբ անոր սիրտը գոռոզացաւ ու հոգին հպարտութեամբ ⁸կարծրացաւ, իր թագաւորութեան գահէն ինկաւ եւ պատիւը իրմէ ետ առնուեցաւ.

մարդոց որդիներուն մէջէն վռնտուեցաւ, ու իր սիրտը կենդանիներու սիրտին հաւասար եղաւ. անոր բնակութիւնը ցիռերու հետ եղաւ։ Անոր բոյս ⁹կը կերցնէին՝՝ արջառներու պէս, եւ անոր մարմինը երկինքի ցօղով կը թրջուէր, մինչեւ որ գիտցաւ թէ մարդոց թագաւորութեան վրայ Ամենաբարձր Աստուածը կը տիրէ, ու անոր վրայ կը դնէ ո՛վ որ ուզէ։

Իսկ դո՛ւն, ո՛վ Բաղտասար, անոր որդին, քու սիրտդ չխոնարհեցուցիր, թէպէտ այս բոլորը գիտէիր.

հապա երկինքի Տէրոջ դէմ քեզ բարձրացուցիր, անոր տան անօթները քու առջեւդ բերին, ու դուն եւ քու մեծամեծներդ, կիներդ ու հարճերդ անոնցմով գինի խմեցիք։ Դուն արծաթէ, ոսկիէ, պղինձէ, երկաթէ, փայտէ եւ քարէ շինուած աստուածները դրուատեցիր, որոնք ո՛չ կը տեսնեն, ո՛չ կը լսեն, ո՛չ ալ բան մը գիտեն։ Իսկ այն Աստուածը, որուն ձեռքն է շունչդ եւ որունն են քու բոլոր ուղիներդ, չփառաւորեցիր.

ուստի իրմէ ղրկուեցաւ այդ ձեռքի ծայրամասը, եւ այս գրութիւնը գրուեցաւ։

Ահա՛ւասիկ գրուած գրութիւնը. “ ¹⁰Մանէ, մանէ, թեկեղ ու փարսին՝՝”։

Այս խօսքին մեկնութիւնը սա՛ է. “Մանէ՝ Աստուած քու թագաւորութիւնդ համրեց, ու զայն վերջացուց.

թեկեղ՝ կշիռքով կշռուեցար, եւ պակաս գտնուեցար.

փարես՝ քու թագաւորութիւնդ բաժնուեցաւ, ու Մարերու եւ Պարսիկներու յանձնուեցաւ”»։

Այն ատեն Բաղտասար հրամայեց, ու Դանիէլի ծիրանի հագցուցին, վիզը ոսկի մանեակ դրին, եւ անոր մասին մունետիկով յայտարարեցին թէ թագաւորութեան մէջ երրորդ կառավարիչ պիտի ըլլայ։

Նոյն գիշերը Քաղդէացիներու Բաղտասար թագաւորը սպաննուեցաւ, ու ¹¹Մարերու Դարեհ թագաւորը՝՝ ստացաւ թագաւորութիւնը, երբ գրեթէ վաթսուներկու տարեկան էր։