Ecclesiastes 1

Proverbs  «  Proverbs 31  ‹  Ecclesiastes 1  ›  Ecclesiastes 2  »  Song of Solomon

ԿԵԱՆՔԸ ԱՆՕԳՈՒՏ Է

Երուսաղէմի մէջ թագաւորող Դաւիթի որդիին՝ Ժողովողին խօսքերը.—

Ունայնութիւններո՜ւ ունայնութիւն,— յայտարարեց Ժողովողը,— Ունայնութիւններո՜ւ ունայնութիւն, ամէն ինչ ունայնութիւն է։

Ի՞նչ օգուտ կ’ունենայ մարդ՝ Արեւին տակ կրած ամբողջ տաժանքէն։

Սերունդ մը կ’երթայ ու սերունդ մը կու գայ, Բայց երկիրը յաւիտեան կը գոյատեւէ։

Նաեւ արեւը կը ծագի, արեւը մայր կը մտնէ, Եւ ¹կ’արտորայ դէպի իր ծագած տեղը։

Հովը դէպի հարաւ կ’երթայ, Ու կը դառնայ դէպի հիւսիս. Հովը ասդին-անդին շրջելով կ’երթայ, Ապա կը վերադառնայ իր շրջաններուն համեմատ։

Բոլոր վտակները ծով կ’երթան, Բայց ծովը չի լեցուիր. Այն տեղը՝ ուր վտակները կ’երթային, Դա՛րձեալ հոն կ’երթան։

Բոլոր ²խօսքերը կը հատնին՝՝. Մարդ ա՛լ չի կրնար խօսիլ։ Աչքը տեսնելով չի կշտանար, Եւ ականջը լսելով չի լեցուիր։

Ինչ որ եղած է, նոյնը պիտի ըլլայ. Ինչ որ կատարուած է, նոյնը պիտի կատարուի. Ոչինչ նոր է արեւին տակ։

Արդեօք կա՞յ բան մը՝ Որուն համար կարելի ըլլայ ըսել. «Տեսէ՛ք, ասիկա նոր է». Ան արդէն գոյութիւն ունէր Մեզմէ առաջուան դարերուն մէջ։

Նախկին բաներուն յիշատակը չկայ. Նոյնպէս՝ յետագայ բաներուն յիշատակը պիտի չըլլայ Մեզմէ ետք եկողներուն մօտ։

ԻՄԱՍՏԱՍԷՐԻՆ ՓՈՐՁԱՌՈՒԹԻՒՆԸ

Ես՝ Ժողովողը, Երուսաղէմի մէջ Իսրայէլի վրայ թագաւոր եղայ։

Իմ սիրտս ³յատկացուցի իմաստութեամբ փնտռելու եւ հետախուզելու Ամէն ինչ որ երկինքի տակ կը կատարուի. Աստուած այս ⁴չարչարալից զբաղումը մարդոց որդիներուն տուաւ, Որպէսզի անով ⁵զբաղին։

Արեւին տակ բոլոր կատարուող գործերը տեսայ, Եւ ահա՛ ամէն ինչ ունայնութիւն ու ⁶հոգիի տանջանք՝՝ է։

Ինչ որ ծուռ է՝ չի կրնար շտկուիլ, Եւ ինչ որ պակաս է՝ չի կրնար համրուիլ։

Իմ սիրտիս մէջ ըսի. «Ահա՛ ես մեծցայ, իմաստութիւն ստացայ՝ Երուսաղէմի մէջ ինձմէ առաջ եղող բոլորէն աւելի, Եւ իմ սիրտս շատ իմաստութիւն ու գիտութիւն տեսաւ»։

Իմ սիրտս յատկացուցի իմաստութիւնը գիտնալու, Նաեւ խենթութիւնն ու անմտութիւնը գիտնալու. Հասկցայ թէ ասիկա ալ հոգիի տանջանք է։

Արդարեւ շատ իմաստութեան մէջ շատ վիշտ կայ, Եւ իր գիտութիւնը աւելցնողը՝ իր կոտտանքը կ’աւելցնէ։