Ecclesiastes 6

Proverbs  «  Ecclesiastes 5  ‹  Ecclesiastes 6  ›  Ecclesiastes 7  »  Song of Solomon

Արեւին տակ տեսայ թէ չարիք մը կայ, Որ մարդոց մէջ շատ կը գտնուի.—

Աստուած մարդու մը հարստութիւն, գոյք ու պատիւ կու տայ, Այնպէս որ իր անձին փափաքած որեւէ բանին կարօտ չ’ըլլար. Բայց Աստուած անոր իրաւասութիւն չի տար անկէ ուտելու, Հապա զայն օտարազգի մը կ’ուտէ։ Ասիկա՛ ալ ունայնութիւն եւ ¹ցաւառիթ չարիք՝՝ մըն է։

Եթէ մարդ մը հարիւր զաւակ ծնանի Ու շատ տարիներ ապրի, Եւ անոր տարիներուն օրերը շատ ըլլան Բայց անոր անձը բարօրութենէ չկշտանայ Եւ ան գերեզման ալ չունենայ, Կ’ըսեմ թէ վիժածը անկէ աւելի լաւ է։

Արդարեւ ասիկա ունայնութեամբ եկեր ու խաւարով գացեր է, Եւ իր անունը խաւարով պիտի ծածկուի.

Արեւն ալ չէ տեսեր, ու ոչինչ գիտցեր է. Ասիկա միւսէն աւելի հանգիստ է։

Իսկ եթէ անիկա երկու հազար տարի ալ ապրի Ու բարօրութիւն ²չվայելէ, Միթէ բոլորը նոյն տեղը չե՞ն երթար։

Մարդուն ամբողջ աշխատանքը իր բերանին համար է, Սակայն անոր ախորժակը չի յագենար։

Արդարեւ իմաստունը անմիտէն ի՞նչ առաւելութիւն ունի. Ապրողներուն մէջ շրջիլ գիտցող դժբախտը ի՞նչ օգուտ կ’ունենայ։

Աւելի լաւ է աչքերով տեսնել՝ քան անձով ³փափաքիլ. Ասիկա՛ ալ ունայնութիւն ու ⁴հոգիի տանջանք՝՝ է։

Ինչ որ եղած է՝ արդէն իր անունով կոչուած է, Եւ ⁵յայտնի է թէ մարդն է անուն դնողը. Սակայն ան իրմէ զօրաւորին հետ չի կրնար վիճիլ։

Քանի ունայնութիւնը շատցնող շատ բաներ կան, Մարդը ի՞նչ առաւելութիւն ունի։

Արդարեւ ո՞վ գիտէ թէ ի՛նչը լաւ է մարդուն՝ իր կեանքին մէջ, Ստուերի պէս անցուցած իր ունայն կեանքին ⁶բոլոր օրերուն՝՝ մէջ. Եւ ո՞վ պիտի իմացնէ մարդուն՝ Թէ իրմէ ետք արեւին տակ ի՛նչ պիտի ըլլայ։