Ecclesiastes 7

Proverbs  «  Ecclesiastes 6  ‹  Ecclesiastes 7  ›  Ecclesiastes 8  »  Song of Solomon

ԽՈՐՀՈՒՐԴՆԵՐ ԿԵԱՆՔԻ ՄԱՍԻՆ

Աւելի լաւ է բարի անունը՝ քան ¹հոտաւէտ իւղը, Ու մահուան օրը՝ քան ծնունդին օրը։

Աւելի լաւ է սուգի տուն երթալ՝ Քան խնճոյքի տուն երթալ. Որովհետեւ ա՛յս է ամէն մարդու վախճանը, Եւ ապրողը ասոր ²ուշադրութիւն դարձնելու է՝՝։

Աւելի լաւ է վիշտը՝ քան ծիծաղը, Քանի որ երեսին տրտմութեամբ սիրտը կը բարելաւուի։

Իմաստուններուն սիրտը սուգի տունը կ’ըլլայ, Իսկ անմիտներուն սիրտը՝ ուրախութեան տունը։

Աւելի լաւ է իմաստունին սաստը լսել, Քան անմիտներուն երգը ³լսել.

Արդարեւ ինչպէս է փուշերուն ձայնը՝ կաթսային տակ, Այնպէս է անմիտներուն ծիծաղը. Ասիկա՛ ալ ունայնութիւն է։

Ի՛րապէս հարստահարութիւնը իմաստունը կը խենթացնէ, Ու ⁴կաշառքը մարդուն սիրտը ⁵կ’ապականէ։

Աւելի լաւ է բանի մը վախճանը՝ քան սկիզբը. Աւելի լաւ է ⁶համբերատար ոգին՝ քան ⁷խրոխտ ոգին։

Մի՛ արտորար հոգիովդ բարկանալու, Քանի որ գրգռութիւնը անմիտներուն ծոցին մէջ կը հանգչի։

Մի՛ ըսեր. «Ինչո՞ւ նախկին օրերը այս օրերէն լաւ էին», Որովհետեւ այս մասին ուղղած հարցումդ իմաստութեամբ չէ։

Իմաստութիւնը ժառանգութեան պէս լաւ է, Եւ արեւը տեսնողներուն օգտակար է։

Արդարեւ իմաստութիւնը հովանի է, Արծաթն ալ հովանի է, Բայց գիտութեան օգտակարութիւնը սա՛ է.— Իմաստութիւնը ⁸զինք ունեցողները՝՝ կ’ապրեցնէ։

Նայէ՛ Աստուծոյ գործին, Որովհետեւ անոր ծռածը ո՞վ կրնայ շտկել։

Բարօրութեան օրը զուա՛րթ եղիր, Իսկ ձախորդ օրը ⁹զգուշացի՛ր. Աստուած ասոնք իրարու դիմաց դրաւ, ¹⁰Որպէսզի մարդ չգտնէ իրմէ ետք ըլլալիքը։

Իմ ¹¹ունայն կեանքիս՝՝ մէջ ամէն բան տեսայ.— Արդար կայ՝ որ իր արդարութեան մէջ կը կորսուի, Եւ ամբարիշտ կայ՝ որ իր չարութեան մէջ կեանքը կ’երկարէ։

Յոյժ շատ արդար մի՛ ըլլար, Ու դուն քեզ չափազանց իմաստուն մի՛ կարծեր. Ինչո՞ւ ¹²փճանաս։

Յոյժ շատ ամբարիշտ մի՛ ըլլար, եւ անմիտ մի՛ ըլլար. Ինչո՞ւ ատենէդ առաջ մեռնիս։

Լաւ է որ ասիկա բռնես եւ անկէ ալ ձեռքդ չքաշես, Քանի Աստուծմէ վախցողը ամենէն ապահով կ’ելլէ։

Իմաստութիւնը աւելի կը զօրացնէ իմաստունը, Քան քաղաքի մը մէջ եղող տասը կառավարիչ՝ այդ քաղաքը։

Ի՛րապէս երկրի վրայ չկայ արդար մարդ՝ Որ բարիք ընէ ու երբեք չմեղանչէ։

Ուստի ¹³ուշադրութիւն մի՛ դարձներ՝՝ ամէն ըսուած խօսքի, Որպէսզի չլսես քու ծառայիդ քեզ անիծելը.

Արդարեւ քու սիրտդ գիտէ թէ Դո՛ւն ալ շատ անգամ ուրիշները անիծեր ես։

Այս բոլորը իմաստութեամբ փորձարկեցի. Ես ըսի. «Իմաստուն պիտի ըլլամ». Բայց ան ինձմէ հեռու էր։

Ինչ որ հեռուն է, Ու չափազանց խորունկ, ո՞վ կրնայ յայտնաբերել։

Ես ¹⁴ուշադրութիւնս դարձուցի՝՝, որպէսզի գիտնամ, հետախուզեմ Եւ փնտռեմ իմաստութիւնն ու հնարամտութիւնը. Նաեւ գիտնամ ամբարշտութեան ¹⁵յիմարութիւնը Եւ անմտութեան խենթութիւնը։

Ես մահէն աւելի դառն գտայ այն կինը՝ Որուն սիրտին մէջ ցանցեր եւ ուռկաններ կան, Ու ձեռքերուն մէջ՝ կապեր. Աստուծոյ առջեւ հաճելի եղողը անկէ կ’ազատի, Բայց մեղաւորը անկէ կը բռնուի։

Ահա՛ սա՛ գտայ,— կը յայտարարէ Ժողովողը,— Մէկ առ մէկ բաները քննելով՝ անոնց պատճառը յայտնաբերելու համար.

(Ինչ որ անձս տակաւին կը փնտռէ, Բայց գտած չէ.) Այր մարդ՝ հազարէն մէկ գտայ, Բայց բոլոր ասոնց մէջ մէկ կին չգտայ։

Ահա՛ միայն սա՛ գտայ.— Աստուած մարդը ուղիղ ¹⁶ստեղծեց, Բայց անոնք շատ հնարքներ փնտռեցին։