Ecclesiastes 8

Proverbs  «  Ecclesiastes 7  ‹  Ecclesiastes 8  ›  Ecclesiastes 9  »  Song of Solomon

Իմաստունին պէս ո՞վ կայ, Եւ խօսքի մեկնութիւնը ո՞վ գիտէ. Մարդուն իմաստութիւնը անոր երեսը կը փայլեցնէ, Ու երեսին պնդութիւնը կը փոխուի։

ԹԱԳԱՒՈՐԻՆ ՀՆԱԶԱՆԴԻԼ

Ես կը խրատեմ որ թագաւորին ¹հրամանը պահես Եւ գործադրես՝ Աստուծոյ եղած երդումին պատճառով։

Մի՛ արտորար՝ որ անոր առջեւէն երթաս, Մի՛ ²յարատեւեր չար արարքի մէջ, Որովհետեւ ան իր ամբողջ փափաքածը կ’ընէ.

Ուր որ թագաւորին խօսքը կայ՝ հոն իշխանութիւն կայ, Եւ ո՞վ կրնայ անոր ըսել. «Ի՞նչ կ’ընես»։

Պատուիրանը պահողը ո՛չ մէկ չար արարք կը ³գործէ, Եւ իմաստունին միտքը ժամանակն ու դատաստանը գիտէ,

Քանի որ ամէն ⁴բան իր ժամանակն ու դատաստանը ունի։ Արդարեւ մարդուն վրայ շատ ձախորդութիւն կը հասնի,

Որովհետեւ ան ըլլալիքը չի գիտեր, Եւ ո՞վ պիտի իմացնէ անոր թէ ի՛նչպէս պիտի ըլլայ։

Ո՛չ մէկը հոգիին վրայ կը տիրէ՝ որ հոգին արգելափակէ, Եւ մահուան օրուան վրայ տիրող չկայ. Այդ պատերազմին մէջ ազատ ⁵արձակում՝՝ չկայ, Եւ ամբարշտութիւնը ⁶զայն գործողը՝՝ չ’ազատեր։

ԱՄԲԱՐԻՇՏՆ ՈՒ ԱՐԴԱՐԸ

Ասոնք բոլորը տեսայ, Ու արեւին տակ կատարուող ամէն արարքի ⁷դարձուցի ուշադրութիւնս՝՝։ Ատեն կայ, երբ մարդը ուրիշ մարդուն վրայ կը տիրէ՝ Իր ձախորդութեան համար։

Այսպէս՝ տեսայ ամբարիշտներ որոնք թաղուեցան. Եկած ու գացած էին սուրբ տեղէն, Եւ մոռցուեցան այն քաղաքին մէջ՝ ուր այսպէս վարուած էին. Ասիկա՛ ալ ունայնութիւն է։

Քանի չար արարքին դէմ տրուած վճիռը շուտով չի գործադրուիր, Մարդոց որդիներուն սիրտը՝ Չարիք ընելու փափաքով լեցուած է իրենց մէջ։

Թէեւ մեղաւորը հարիւր անգամ չարիք գործէ Եւ իր օրերը երկարին, ⁸Ստուգապէս գիտեմ թէ Աստուծմէ վախցողնե՛րը բարօրութիւն պիտի ունենան, Որովհետեւ անոր երեսէն կը վախնան։

Իսկ ամբարիշտը բարօրութիւն պիտի չունենայ. Ան իր օրերը պիտի չերկարէ, հապա ստուերի պէս պիտի ըլլայ, Որովհետեւ Աստուծոյ երեսէն չի վախնար։

Ունայնութիւն մը կայ, որ երկրի վրայ կը կիրարկուի. Այսինքն արդարներ կան, որոնց կը ⁹հատուցանուի ամբարիշտներուն արարքին համեմատ, Եւ ամբարիշտներ ալ կան, որոնց կը հատուցանուի արդարներուն արարքին համեմատ. Ըսի. «Ասիկա՛ ալ ունայնութիւն է»։

Ես ուրախութիւնը դրուատեցի, Որովհետեւ մարդ արեւին տակ Աւելի լաւ բան չունի՝ Քան ուտել, խմել եւ ուրախանալ։ Արդարեւ ասիկա՛ իրեն պիտի մնայ իր աշխատանքէն՝ Արեւին տակ Աստուծոյ իրեն տուած կեանքին օրերուն մէջ։

Երբ ես ուշադրութիւնս դարձուցի իմաստութիւնը գիտնալու, Ու երկրի վրայ կատարուող զբաղումները տեսնելու, (Արդարեւ թէ՛ ցերեկ եւ թէ գիշեր Իր աչքը քուն չտեսնող մարդ կայ,)

Աստուծոյ բոլոր գործերէն ¹⁰հասկցայ Թէ մարդ չի կրնար յայտնաբերել այն գործը՝ որ արեւին տակ կը կատարուի. Որովհետեւ մարդ կ’աշխատի զայն փնտռել, բայց չի յայտնաբերեր. Թէեւ իմաստունը ըսէ թէ գիտէ, չի կրնար զայն յայտնաբերել։