Ecclesiastes 10

Proverbs  «  Ecclesiastes 9  ‹  Ecclesiastes 10  ›  Ecclesiastes 11  »  Song of Solomon

Մեռած ճանճերը ¹բուրագործին հոտաւէտ ²իւղը գարշահոտ կ’ընեն՝՝. Քիչ մը անմտութիւնն ալ այդպէս կ’ընէ ան՝ որ յարգուած է իր իմաստութեան եւ պատիւին համար։

Իմաստունին սիրտը իր աջ կողմն է, Իսկ անմիտին սիրտը իր ձախ կողմն է։

Անմիտը՝ նոյնիսկ երբ ճամբայէն քալէ՝ Իր անմիտ ըլլալը բոլորին ³ցոյց կու տայ՝՝, քանի որ ⁴պակասամիտ է։

Եթէ կառավարիչին ⁵բարկութիւնը քեզի դէմ բորբոքի՝՝, Քու տեղդ մի՛ ձգեր, Որովհետեւ ⁶քաղցրութիւնը մեծ յանցանքները կը դարմանէ՝՝։

Արեւին տակ չարիք մըն ալ տեսայ, Որ իբր թէ կառավարիչէն ⁷եկած սխալմունք մը ըլլայ.—

Անմտութիւնը մեծ բարձունքներու վրայ կը դրուի, Ու հարուստները նուաստութեան մէջ կը մնան։

Տեսայ ստրուկներ՝ ձիերու վրայ հեծած, Եւ իշխանաւորներ՝ որոնք գետինի վրայ կը քալէին, ստրուկներու պէս։

Փոս փորողը՝ ինք անոր մէջ կ’իյնայ, Ու ցանկապատ ⁸քանդողը՝ օձը զինք կը խածնէ։

Քարեր ⁹փոխադրողը անոնցմէ ¹⁰կը վնասուի՝՝, Եւ փայտ ճեղքողը անկէ կը վտանգուի։

Եթէ երկաթը բթացած է, ու մարդ անոր ¹¹բերանը չսրէ՝ Իր ոյժը ¹²կրկնապատկելու է. Բայց իմաստութիւնը ¹³կ’օգնէ՝ որ յաջողի։

Եթէ օձը խածնէ՝ ¹⁴քանի որ չէ հմայուած՝՝, ¹⁵Թովիչը օգուտ չ’ունենար։

Իմաստունին բերանին խօսքերը շնորհալի են, Բայց անմիտին շրթունքը զինք կը կլլէ.

Անոր բերանին խօսքերուն սկզբնաւորութիւնը անմտութիւն է, Եւ անոր խօսքին վերջաւորութիւնը գէշ խենթութիւն է։

Անմիտը իր խօսքերը կը շատցնէ։ Մարդ ինչ ըլլալիքը չի գիտեր. Ո՞վ անոր պիտի իմացնէ Թէ իրմէ ետք ի՛նչ պիտի ըլլայ։

Անմիտներուն աշխատանքը զիրենք կը յոգնեցնէ, Քանի չեն գիտեր քաղաք երթալ։

Վա՜յ քեզի, երկի՛ր, երբ քու թագաւորդ ¹⁶մանուկ է, Եւ իշխանաւորներդ առտուն կերակուր կ’ուտեն։

Երանի՜ քեզի, երկի՛ր, երբ քու թագաւորդ ¹⁷ազնուազարմ է, Ու իշխանաւորներդ յարմար ատենին կ’ուտեն՝ Զօրութիւն ստանալու համար, եւ ո՛չ թէ ¹⁸գինովութեան համար։

Ծուլութեամբ ¹⁹շէնքը կը փլչի, Եւ ձեռքերու թուլութեամբ տունը կը կաթի։

Հացկերոյթը ծիծաղելու համար կը սարքեն, Ու գինին կեանքը կ’ուրախացնէ. Իսկ արծաթը ամէն ինչի ²⁰բաւարար է՝՝։

Միտքիդ մէջ անգամ թագաւորը մի՛ անիծեր, Եւ ննջասենեակիդ մէջ հարուստները մի՛ անիծեր. Որովհետեւ երկինքի թռչունը այդ ձայնը կը տանի, Ու թեւաւորը խօսքը կը յայտնէ։