Ecclesiastes 12

Proverbs  «  Ecclesiastes 11  ‹  Ecclesiastes 12  ›  Song of Solomon 1  »  Song of Solomon

Յիշէ՛ Ստեղծիչդ երիտասարդութեանդ օրերուն մէջ՝ Դեռ վատ օրերը չեկած, Եւ այն տարիները չհասած՝ Որոնց մէջ պիտի ըսես. «Անոնցմէ չեմ ախորժիր».

Դեռ արեւը, լոյսը, լուսինն ու աստղերը չաղօտացած, Եւ տեղատարափին ետեւէն թանձր ամպերը չվերադարձած.

Այն օրը՝ երբ ¹տան պահապանները՝՝ պիտի դողան, ²Ուժեղ մարդիկը՝՝ պիտի ծռին, ³Աղացողները աշխատելէ պիտի դադրին՝ քանի որ պակսած են, Եւ ⁴պատուհաններէն նայողները՝՝ պիտի խաւարին.

Երբ ⁵աղօրիքին ձայնը պիտի ցածնայ՝ Որովհետեւ ⁶դռները պիտի գոցուին փողոցներուն մէջ, Ու մարդ ճնճղուկին ձայնով պիտի կանգնի, Եւ բոլոր երգող աղջիկները նկուն պիտի ըլլան։

Բարձրանալէն պիտի վախնայ, Ճամբային մէջ զարհուրանքներ պիտի ունենայ. Նշենին պիտի ընձիւղի, Մարախը ⁷ծանրութիւն պիտի սեպուի՝՝, Եւ ⁸ախորժակը պիտի կորսուի՝՝, Քանի մարդ իր յաւիտենական տունը կ’երթայ, Ու հեծեծողները փողոցներուն մէջ պիտի շրջին.

Դեռ արծաթէ լարը չփրթած, Ոսկիէ բաժակը չջախջախուած, Սափորը աղբիւրին քով չփշրուած, Եւ ջրհորին վրայի անիւը չջախջախուած։

Այն ատեն հողը գետինը պիտի վերադառնայ՝ ինչպէս որ առաջ հոն էր, Ու հոգին Աստուծոյ պիտի վերադառնայ՝ որ զայն տուաւ։

Ունայնութիւններո՜ւ ունայնութիւն,— յայտարարեց Ժողովողը,— Ամէն ինչ ունայնութիւն է։

ԱԶԴԱՐԱՐՈՒԹԻՒՆ

Ասկէ զատ, քանի Ժողովողը իմաստուն էր, Ժողովուրդին ալ գիտութիւն սորվեցուց. ⁹Ունկնդրեց, պրպտեց, Եւ շատ առակներ շարադրեց։

Ժողովողը փնտռեց՝ որ ախորժելի խօսքեր գտնէ. Անոնք ուղղամտութեամբ գրուած ճշմարտութեան խօսքեր են։

Իմաստուններուն խօսքերը խթաններու պէս են, Ու ժողովածուներու ¹⁰հեղինակներէն մխուած՝՝ գամերու պէս՝ մէկ հովիւէ տրուած։

Քեզի կը մնայ, որդեա՛կս, որ անոնցմէ խրատուիս. Շատ գիրք պատրաստելը վախճան չունի, Եւ շատ ¹¹ուսումը մարմինը կը յոգնեցնէ։

Այս ամբողջ խօսքին եզրակացութի՛ւնը լսենք.— Վախցի՛ր Աստուծմէ ու պահէ՛, անոր պատուիրանները Որովհետեւ ասիկա՛ է մարդուն ամբողջ պարտականութիւնը.

Արդարեւ Աստուած ամէն արարք դատաստանի պիտի ¹²կանչէ, Ամէն ինչ որ թաքուն է, Թէ՛ բարի եւ թէ չար։