Ezekiel 11

Lamentations  «  Ezekiel 10  ‹  Ezekiel 11  ›  Ezekiel 12  »  Daniel

ԵՐՈՒՍԱՂԷՄ ԿԸ ԴԱՏԱՊԱՐՏՈՒԻ

¹Հոգին զիս յափշտակեց ու Տէրոջ տան արեւելեան դուռը տարաւ, որ դէպի արեւելք կը նայի, եւ ահա՛ դրան մուտքը քսանհինգ մարդ կար. անոնց մէջ Ազուրի որդին՝ Յեզոնիան ու Բանեայի որդին՝ Փաղատիան տեսայ — ժողովուրդին իշխանաւորները։

Ան ինծի ըսաւ. «Մարդո՛ւ որդի, Ահա՛ւասիկ այն մարդիկը՝ որ անօրէնութիւն կը մտածեն, Ու չար խորհուրդ կու տան այս քաղաքին։

Անոնք կ’ըսեն. “²Ատենը չէ տուներ կառուցանելու. Այս քաղաքը կաթսան է, ու մենք միսն ենք”։

Ուստի մարգարէացի՛ր անոնց դէմ, Մարգարէացի՛ր, մարդո՛ւ որդի»։

Այն ատեն Տէրոջ Հոգին ³զիս համակեց՝՝ Եւ ինծի ըսաւ. «Ըսէ՛. “Տէրը սա՛ կը յայտարարէ. "Դուք ատիկա կ’ըսէք, ո՛վ Իսրայէլի տունը. Բայց ես ձեր ⁴մտածումը գիտեմ։

Դուք այս քաղաքին մէջ ձեր ⁵սպաննուածները շատցուցիք, Եւ անոր փողոցները սպաննուածներով լեցուցիք"”»։

Հետեւաբար Տէրը՝ Եհովան սա՛ կը յայտարարէ. «Ձեր սպաննուածները՝ որ անոր մէջ դրիք, Անոնք միսն են, ան ալ կաթսան է. Բայց ձեզ անոր մէջէն պիտի հանեմ։

Դուք սուրէն վախցաք, Ու ես սուրը պիտի բերեմ ձեր վրայ,— Կը պատգամէ Տէրը՝ Եհովան։—

Ձեզ անոր մէջէն պիտի հանեմ, Ձեզ օտարներուն ձեռքը պիտի մատնեմ, Եւ ձեզի դէմ իմ դատավճիռներս պիտի կիրարկեմ։

Դուք սուրով պիտի իյնաք. Իսրայէլի հողամասին մէջ ձեզ պիտի դատեմ, Ու պիտի գիտնաք թէ ե՛ս եմ Տէրը։

Այս քաղաքը ձեզի համար կաթսայ պիտի չըլլայ, Որ դուք անոր մէջ միս ըլլաք. Իսրայէլի հողամասին մէջ ձեզ պիտի դատեմ,

Ու պիտի գիտնաք թէ ե՛ս եմ Տէրը. Քանի որ իմ կանոններովս չընթացաք Եւ իմ որոշումներս չկիրարկեցիք, Հապա ձեր շուրջը եղող ⁶հեթանոսներուն սովորութիւններուն համաձայն վարուեցաք»։

Մինչ կը մարգարէանայի, Բանեայի որդին՝ Փաղատիա մեռաւ։ Այն ատեն երեսիս վրայ ինկայ ու բարձր ձայնով աղաղակեցի. «Ո՜հ, Տէ՛ր Եհովա, միթէ Իսրայէլի մնացորդը ամբողջովին պիտի ⁷բնաջնջե՞ս»։

ԱՍՏՈՒԾՈՅ ԽՈՍՏՈՒՄԸ ԱՔՍՈՐԱԿԱՆՆԵՐՈՒՆ

Այն ատեն ⁸Տէրը խօսեցաւ՝՝ ինծի՝ ըսելով.

«Մարդո՛ւ որդի, քու եղբայրներդ, այսինքն՝ եղբայրներդ, ազգականներդ եւ ամբողջ Իսրայէլի տունը, բոլորը այն մարդիկն են՝ որոնց Երուսաղէմի բնակիչները ըսին. “Հեռացէ՛ք Տէրոջ քովէն. այս երկիրը մեզի՛ տրուած է իբր ստացուածք”»։

«Հետեւաբար ըսէ՛. “Տէրը՝ Եհովան սա՛ կը յայտարարէ. Թէպէտ զանոնք հեռացուցի հեթանոսներուն մէջ Ու ցրուեցի երկիրներուն մէջ, Անոնց գացած երկիրներուն մէջ Իրենց սրբարան պիտի ըլլամ քիչ մը ատեն"”»։

«Հետեւաբար ըսէ՛. “Տէրը՝ Եհովան սա՛ կը յայտարարէ. "Ձեզ պիտի հաւաքեմ ժողովուրդներէն, Ձեզ պիտի ժողվեմ այն երկիրներէն՝ Ուր դուք ցրուած էք, Ու ձեզի պիտի տամ Իսրայէլի ⁹երկիրը։

Հոն պիտի երթան, Եւ անոր բոլոր պղծութիւնները, Անոր բոլոր գարշութիւնները անկէ պիտի հեռացնեն։

Անոնց մէ՛կ սիրտ պիտի տամ, ¹⁰Անոնց ներսը նոր հոգի պիտի դնեմ. Անոնց մարմինէն քարեղէն սիրտը պիտի հանեմ, Եւ անոնց մարմնեղէն սիրտ պիտի տամ.

Որպէսզի իմ կանոններովս ընթանան, Իմ որոշումներս պահեն ու զանոնք գործադրեն։ Անոնք իմ ժողովուրդս ըլլան, Ես ալ անոնց Աստուածը ըլլամ։

Բայց անոնց՝ որոնց սիրտը կ’ընթանայ իրենց ¹¹կամքին պղծութիւններուն Ու գարշութիւններուն համաձայն, Անոնց ¹²արարքներուն պատիժը իրենց վրայ պիտի բերեմ՝՝", Կը պատգամէ Տէրը՝ Եհովան”»։

ԱՍՏՈՒԾՈՅ ՓԱՌՔԸ ԿԸ ՀԵՌԱՆԱՅ ԵՐՈՒՍԱՂԷՄԷՆ

Քերովբէները իրենց թեւերը վերցուցին. անիւները անոնց հետ էին, եւ Իսրայէլի Աստուծոյն փառքը անոնց վրայ էր՝ վերեւը։

Տէրոջ փառքը քաղաքին մէջտեղէն բարձրացաւ, ու քաղաքին արեւելեան կողմը եղող լերան վրայ կեցաւ։

Յետոյ Հոգին զիս յափշտակեց եւ Քաղդէաստան տարաւ, տարագիրներուն քով. ասիկա եղաւ տեսիլքի մէջ՝ Աստուծոյ Հոգիով, ու տեսած տեսիլքս իմ վրայէս ¹³անհետացաւ։

Ես ալ տարագիրներուն խօսեցայ այն բոլոր բաներուն մասին՝ որ Տէրը ինծի ցոյց տուեր էր։