Ezekiel 12

Lamentations  «  Ezekiel 11  ‹  Ezekiel 12  ›  Ezekiel 13  »  Daniel

ՄԱՐԳԱՐԷՆ ԻԲՐ ՏԱՐԱԳԻՐ

¹Տէրը խօսեցաւ՝՝ ինծի՝ ըսելով.

«Մարդո՛ւ որդի, դուն ըմբոստներու տան մէջ կը բնակիս։ Անոնք աչքեր ունին՝ տեսնելու համար, բայց չեն տեսներ. ականջներ ունին՝ լսելու համար, սակայն չեն լսեր. որովհետեւ, անոնք ըմբոստներու տուն են։

Դո՛ւն, մարդո՛ւ որդի, քեզի տարագրութեա՛ն գոյքեր պատրաստէ, եւ ցերե՛կը տարագրուէ անոնց աչքերուն առջեւ։ Քու եղած տեղէդ ուրի՛շ տեղ մը տարագրուէ անոնց աչքերուն առջեւ. թերեւս ²ուշադրութիւն դարձնեն, թէեւ անոնք՝՝ ըմբոստներու տուն են։

Անոնց աչքերուն առջեւ ցերե՛կը դուրս հանէ գոյքերդ, տարագրութեան գոյքերու պէս. բայց դուն անոնց աչքերուն առջեւ իրիկո՛ւնը դուրս ելիր, տարագրութեան գացողներու պէս։

Անոնց աչքերուն առջեւ պարի՛սպը ծակէ եւ անկէ՛ հանէ գոյքերդ։

Անոնց աչքերուն առջեւ ուսի՛դ վրայ վերցուր զանոնք եւ աղջամուղջի՛ն դուրս հանէ. երե՛սդ ծածկէ, որպէսզի երկիրը չտեսնես. քանի որ քեզ ³նշան կարգեցի Իսրայէլի տան»։

Ինչպէս ինծի հրամայուեցաւ՝ այնպէս ըրի. գոյքերս տարագրութեան գոյքերու պէս ցերեկը դուրս հանեցի, իրիկունը ձեռքովս պարիսպը ծակեցի, եւ աղջամուղջին դուրս հանեցի. անոնց աչքերուն առջեւ ուսիս վրայ վերցուցի։

Առտուն ⁴Տէրը խօսեցաւ՝՝ ինծի՝ ըսելով.

«Մարդո՛ւ որդի, Իսրայէլի տունը, այդ ըմբոստներու տունը, քեզի չըսա՞ւ. “Այդ ի՞նչ կ’ընես”։

Անոնց ըսէ՛. “Տէրը՝ Եհովան սա՛ կը յայտարարէ. "Սա՛ պատգամը Երուսաղէմի մէջ եղող իշխանին ու հոն բնակող Իսրայէլի ամբողջ տան համար է"”։

Ըսէ՛. “Ես ձեզի համար նշան եմ։ Ես ինչպէս ըրի, անոնց այնպէս պիտի ըլլայ։ Անոնք պիտի հեռանան ու տարագրութեան երթան։

Անոնց մէջ եղող իշխանը Իր ուսին վրայ բեռ պիտի վերցնէ, Եւ աղջամուղջին դուրս պիտի ելլէ. Պարիսպը պիտի ծակեն, որպէսզի անկէ հանեն։ Ան իր երեսը պիտի ծածկէ, Որպէսզի երկիրը աչքով չտեսնէ։

Անոր վրայ իմ ցանցս պիտի տարածեմ, Ու որոգայթիս մէջ պիտի բռնուի։ Զինք Բաբելոն՝ Քաղդէացիներու երկիրը պիտի տանիմ. Ինք այդ տեղը պիտի չտեսնէ, Թէպէտ հոն պիտի մեռնի։

Իր շուրջը եղող բոլոր օգնականները Եւ իր բոլոր գումարտակները՝ Բոլոր հովերուն պիտի ցրուեմ. Անոնց ետեւէն սուր պիտի քաշեմ։

Երբ զանոնք ազգերուն մէջ ցրուեմ Ու երկիրներուն մէջ սփռեմ, Պիտի գիտնան թէ ե՛ս եմ Տէրը։

Բայց անոնցմէ փոքրաթիւ մարդիկ պիտի թողում՝ Սուրէն, սովէն ու ժանտախտէն ազատած, Որպէսզի իրենց բոլոր գարշութիւնները պատմեն Այն ⁵ազգերուն մէջ՝ ուր պիտի երթան, Ու պիտի գիտնան թէ ե՛ս եմ Տէրը”»։

ԴՈՂԱՑՈՂ ՄԱՐԳԱՐԷԻՆ ՆՇԱՆԸ

⁶Տէրը խօսեցաւ՝՝ ինծի՝ ըսելով.

«Մարդո՛ւ որդի, քու հացդ դողալո՛վ կեր, Ջուրդ վրդովումո՛վ եւ մտահոգութեա՛մբ խմէ,

Ու երկրին ժողովուրդին ըսէ՛. “Իսրայէլի ⁷երկրին մէջ՝՝ եղող Երուսաղէմի բնակիչներուն մասին Տէրը՝ Եհովան սա՛ կը յայտարարէ. "Անոնք իրենց հացը մտահոգութեամբ պիտի ուտեն, Եւ իրենց ջուրը ապշութեամբ պիտի խմեն, Որովհետեւ իրենց երկիրը ⁸ամբողջովին պիտի ամայանայ Իր բոլոր բնակիչներուն բռնութեան պատճառով։

Բնակուած քաղաքները պիտի աւերուին, Երկիրը ամայի պիտի ըլլայ, Ու պիտի գիտնաք թէ ե՛ս եմ Տէրը"”»։

ԺՈՂՈՎՐԴԱԿԱՆ ԱՌԱԿ ՄԸ ԵՒ ԱՆԺՈՂՈՎՐԴԱԿԱՆ ՊԱՏԳԱՄ ՄԸ

⁹Տէրը խօսեցաւ՝՝ ինծի՝ ըսելով.

«Մարդո՛ւ որդի, ի՞նչ է այն առածը՝ Որ դուք Իսրայէլի ¹⁰երկրին մէջ՝՝ կը գործածէք Ու կ’ըսէք. “Օրերը կ’երկարին, Եւ ամէն տեսիլք կը կորսուի”։

Հետեւաբար ըսէ՛ անոնց. “Տէրը՝ Եհովան սա՛ կը յայտարարէ. "Այս առածը պիտի դադրեցնեմ. Այս առածը անգա՛մ մըն ալ Իսրայէլի մէջ պիտի չխօսուի"”։ Բայց ըսէ՛ անոնց. “Օրերը մօտեցան, Նաեւ իւրաքանչիւր տեսիլքի ¹¹իրագործումը.

Որովհետեւ Իսրայէլի տան մէջ անգա՛մ մըն ալ ունայն տեսիլք Եւ շողոքորթութեան ¹²գուշակութիւն պիտի չըլլայ։

Քանի որ ¹³ես՝ Տէրս՝ պիտի խօսիմ՝՝, Եւ ըսելիք խօսքս պիտի իրագործուի, Ա՛լ պիտի չյետաձգուի. Արդարեւ ձեր օրերուն մէջ, ո՛վ ըմբոստներու տունը, Խօսք մը պիտի ըսեմ ու պիտի իրագործեմ”, Կը պատգամէ Տէրը՝ Եհովան»։

¹⁴Տէրը խօսեցաւ՝՝ ինծի՝ ըսելով.

«Մարդո՛ւ որդի, ահա՛ Իսրայէլի տունը կ’ըսէ. “Ասոր տեսած տեսիլքը երկար օրերու համար է, Ասիկա հեռաւոր ժամանակներու համար կը մարգարէանայ”։

Ուստի ըսէ՛ անոնց. “Սա՛ կը յայտարարէ Տէրը՝ Եհովան. "Ա՛լ խօսքերէս ո՛չ մէկը պիտի յետաձգուի, Հապա իմ ըսելիք խօսքս պիտի իրագործուի", Կը պատգամէ Տէրը՝ Եհովան”»։