Ezekiel 13

Lamentations  «  Ezekiel 12  ‹  Ezekiel 13  ›  Ezekiel 14  »  Daniel

ԳՈՒՇԱԿՈՒԹԻՒՆ ՍՈՒՏ ՄԱՐԳԱՐԷՆԵՐՈՒ ԴԷՄ

Տէրը խօսեցաւ՝՝ ինծի՝ ըսելով.

«Մարդո՛ւ որդի, մարգարէացող Իսրայէլի մարգարէներուն դէմ մարգարէացի՛ր, Եւ իրենց սիրտէն մարգարէացողներուն ըսէ՛. “Մտի՛կ ըրէք Տէրոջ խօսքը.

Տէրը՝ Եհովան սա՛ կը յայտարարէ. "Վա՜յ անզգամ մարգարէներուն, Որոնք իրենց հոգիին կը հետեւին, Ու ոչինչ տեսեր են"”։

Քու մարգարէներդ, ո՛վ Իսրայէլ, Անապատներու մէջ եղող աղուէսներու պէս են։

Խրամատը չբարձրացաք, Ո՛չ ալ Իսրայէլի տունը ցանկապատով փակեցիք, Պատերազմին մէջ դիմանալու համար՝ Տէրոջ օրը։

Անոնց տեսիլքը ունայնութիւն է, եւ ¹գուշակութիւնը՝ ստութիւն, Երբ կ’ըսեն. “Տէ՛րը պատգամեց”, — Թէպէտ Տէրը զանոնք ղրկած չէ —, Ու կը յուսադրեն թէ իրենց խօսքը պիտի իրագործուի։

Միթէ դուք ունայն տեսիլքներ չտեսա՞ք Եւ սուտ գուշակութիւններ ²չըրի՞ք՝ Ըսելով. “Տէ՛րը պատգամեց”, Մինչդեռ ես խօսած չէի»։

Հետեւաբար Տէրը՝ Եհովան սա՛ կը յայտարարէ. «Ձեր ունայն խօսքերուն Ու սուտ տեսիլքներուն պատճառով՝ Ահա՛ ես ձեզի դէմ եմ,— Կը պատգամէ Տէրը՝ Եհովան։—

Իմ ձեռքս ունայն տեսիլք տեսնող Եւ սուտ դիւթութիւն ընող մարգարէներուն դէմ պիտի ըլլայ. Անոնք իմ ժողովուրդիս խորհրդաժողովին մէջ պիտի չըլլան, Իսրայէլի տան գիրքին մէջ պիտի չարձանագրուին, Իսրայէլի ³երկիրը պիտի չմտնեն, Ու պիտի գիտնաք թէ ե՛ս եմ Տէրը՝ Եհովան։

Քանի անոնք իմ ժողովուրդս կը մոլորեցնեն՝ Ըսելով. “Խաղաղութիւն է”, երբ խաղաղութիւն չկայ, Եւ ան պատ կը կառուցանէ, Անոնք ալ շաղախով կը ծեփեն զայն,

Ըսէ՛ շաղախով ծեփողներուն թէ ան պիտի փլչի. Յորդահոս տեղատարափ պիտի ըլլայ, Եւ դուք, ո՛վ կարկուտի քարեր, պիտի իյնաք, Ու զայն մրրկալից հովը պիտի ճեղքէ։

Ահա՛ երբ պատը փլչի, Ձեզի պիտի չըսե՞ն. “Ո՞ւր է այն ծեփը՝ որով դուք ծեփեցիք”։

Հետեւաբար Տէրը՝ Եհովան սա՛ կը յայտարարէ. “Իմ ցասումովս մրրկալից հովով մը զայն պիտի ճեղքեմ. Իմ բարկութեամբս՝ յորդահոս տեղատարափ պիտի ըլլայ, Ու ցասումովս՝ կարկուտի քարեր, Որպէսզի զայն ⁴անհետացնեն։

Այն պատը՝ որ շաղախով ծեփեցիք, պիտի փլցնեմ. Զայն գետինին պիտի ⁵հաւասարեցնեմ. Անոր հիմը պիտի յայտնուի, ան պիտի տապալի, Դուք ալ անոր մէջ պիտի ⁶բնաջնջուիք, Ու պիտի գիտնաք թէ ե՛ս եմ Տէրը։

Իմ ցասումս պատին վրայ Ու զայն շաղախով ծեփողներուն վրայ պիտի ⁷իրագործեմ, Եւ ձեզի պիտի ըսեմ. "Պատն ու զայն ծեփողները չքացան,

Այսինքն՝ Իսրայէլի մարգարէները, Որոնք Երուսաղէմի մասին կը մարգարէանային, Եւ անոր մասին խաղաղութեան տեսիլքներ կը տեսնէին, Մինչդեռ խաղաղութիւն չկար", կը պատգամէ Տէրը՝ Եհովան”»։

ԳՈՒՇԱԿՈՒԹԻՒՆ ՍՈՒՏ ԳՈՒՇԱԿՈՒԹԻՒՆՆԵՐՈՒ ԴԷՄ

«Նաեւ դո՛ւն, մարդո՛ւ որդի, ⁸ուղղէ՛ երեսդ քու ժողովուրդիդ աղջիկներուն դէմ, որոնք իրենց սիրտին համաձայն կը մարգարէանան. մարգարէացի՛ր անոնց դէմ,

եւ ըսէ՛. “Տէրը՝ Եհովան սա՛ կը յայտարարէ. "Վա՜յ այն կիներուն, որոնք բոլոր անութներուն համար մոգական բարձիկներ կը կարեն, եւ ամէն հասակի մարդոց գլուխներուն ⁹լաչակներ կը պատրաստեն, որպէսզի անձեր որսան"։ Միթէ դուք իմ ժողովուրդիս անձերը որսալով ձեր անձերը ո՞ղջ պիտի պահէք։

Իմ ժողովուրդիս առջեւ զիս կ’անպատուէք բուռ մը գարիի ու պատառ մը հացի համար, մեռցնելով անձեր՝ որ մեռնելու չեն, ողջ պահելով անձեր՝ որ ապրելու չեն, ստելով ժողովուրդիս՝ որ ձեր սուտերը մտիկ կ’ընէ”։

Հետեւաբար Տէրը՝ Եհովան սա՛ կը յայտարարէ. “Ահա՛ ես ձեր բարձիկներուն դէմ եմ, որոնցմով դուք անձերը կ’որսաք ¹⁰թռչուններու պէս՝՝։ Զանոնք ձեր բազուկներէն պիտի պատռեմ, եւ այդ անձերը պիտի արձակեմ, այսինքն այն անձերը՝ որ դուք կ’որսաք ¹¹թռչուններու պէս՝՝։

Ձեր լաչակներն ալ պիտի պատռեմ ու ժողովուրդս ձեր ձեռքէն ազատեմ. անգա՛մ մըն ալ ձեր ձեռքին մէջ որս պիտի չըլլան, եւ պիտի գիտնաք թէ ե՛ս եմ Տէրը”։

Արդարեւ դուք ձեր ստութիւններով յուսալքեցիք արդարին սիրտը, որ ես ¹²տրտմեցուցած չէի, եւ ուժովցուցիք ամբարիշտին ձեռքը, որպէսզի իր վատ ճամբայէն չհեռանայ՝ ապրելու համար։

Հետեւաբար անգա՛մ մըն ալ ունայն տեսիլք պիտի չտեսնէք ու դիւթութիւն պիտի ¹³չընէք. իմ ժողովուրդս ձեր ձեռքէն պիտի ազատեմ, եւ պիտի գիտնաք թէ ե՛ս եմ Տէրը”»։