Ezekiel 24

Lamentations  «  Ezekiel 23  ‹  Ezekiel 24  ›  Ezekiel 25  »  Daniel

ԺԱՆԳՈՏԱԾ ԿԱԹՍԱՆ

Իններորդ տարուան տասներորդ ամիսը, ամսուան տասներորդ օրը, ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ²քու քովդ՝՝ արձանագրէ՛ օրուան — այս նոյն օրուան — ³թուականը. Բաբելոնի թագաւորը այս նոյն օրը Երուսաղէմի դիմաց ⁴բանակեցաւ։

Առա՛կ մը խօսէ այդ ըմբոստներու տան, եւ ըսէ՛ անոնց. “Տէրը՝ Եհովան սա՛ կը յայտարարէ. "Դի՛ր կաթսան, դի՛ր զայն, ու մէջն ալ ջո՛ւր լեցուր։

Հաւաքէ՛ անոր մէջ անոր կտորները, բոլոր լաւ կտորները՝ զիստը եւ ուսը. լեցո՛ւր զայն ընտիր ոսկորներով։

Ոչխարներուն ընտիրնե՛րը առ, ու ոսկորներն ալ տա՛կը դիզէ. զայն ⁵սաստի՛կ եռացուր, որ մէջի ոսկորներն ալ խաշին"”»։

Հետեւաբար Տէրը՝ Եհովան սա՛ կը յայտարարէ. «Վա՜յ արիւնահեղ քաղաքին, այն կաթսային՝ որուն ժանգը իր մէջն է։ Անոր ժանգը մէջէն ելած չէ. զայն կտո՛ր-կտոր դուրս հանէ, առանց անոր վրայ վիճակ ձգելու։

Արդարեւ անոր թափած արիւնը իր մէջն է, զայն չոր ժայռի վրայ դրաւ. զայն գետինի վրայ չթափեց, որ զայն հողով ծածկէ։

Իմ ցասումս ⁶գրգռելու եւ վրէժ առնելու համար՝ անոր թափած արիւնը չոր ժայռի վրայ դրի, որպէսզի չծածկուի»։

Հետեւաբար Տէրը՝ Եհովան սա՛ կը յայտարարէ. «Վա՜յ արիւնահեղ քաղաքին. ես ալ խարոյկը պիտի մեծցնեմ։

Փայտերը շատցո՛ւր, կրակը ⁷բռնկեցո՛ւր, որպէսզի միսը ⁸հալի. լա՛ւ ⁹համեմէ, որ ոսկորները ¹⁰բոցավառին։

Յետոյ կայծերո՛ւն վրայ դիր պարապ կաթսան, որպէսզի պղինձը տաքնայ, հրաբորբոք ըլլայ, անոր անմաքրութիւնը իր մէջ հալի, եւ ժանգը սպառի։

Անիկա ճիգերով ինքզինք հիւծեց, բայց անոր մեծաքանակ ժանգը իրմէ ¹¹չգնաց. անոր ժանգը կրակով չգնաց։

¹²Քու անմաքրութեանդ մէջ լրբութիւն կայ, որովհետեւ քեզ ջանացի մաքրել, բայց դուն չմաքրուեցար։ Ա՛լ անմաքրութենէդ պիտի չմաքրուիս, մինչեւ որ իմ ցասումս քու վրադ ¹³իջեցնեմ։

Ես՝ Տէրս խօսեցայ. ասիկա պիտի ¹⁴պատահի, եւ ե՛ս զայն պիտի իրագործեմ. պիտի ¹⁵չընկրկիմ, պիտի չխղճամ ու պիտի չզղջամ. քու ¹⁶ընթացքիդ եւ արարքներուդ համեմատ պիտի դատուիս», կը պատգամէ Տէրը՝ Եհովան։

ՄԱՐԳԱՐԷԻՆ ԿՆՈՋ ՄԱՀԸ

¹⁷Տէրը խօսեցաւ՝՝ ինծի՝ ըսելով.

«Մարդո՛ւ որդի, ահա՛ ես ¹⁸հարուածով մը քու աչքերուդ ցանկութիւնը քեզմէ պիտի յափշտակեմ. ո՛չ հեծեծէ, ո՛չ լաց, ո՛չ ալ աչքերէդ արցունք թող գայ։

Լռութեա՛մբ հեծեծէ. մեռելի սուգ մի՛ պահեր։ Խոյրդ գլո՛ւխդ փաթթէ, կօշիկներդ ¹⁹հագի՛ր, պեխդ մի՛ ծածկեր ու մարդոց հացը մի՛ ուտեր»։

Առտուն ժողովուրդին խօսեցայ, իրիկունը կինս մեռաւ, ու հետեւեալ առտուն ինծի հրամայուածը ըրի։

Ժողովուրդը ինծի ըսաւ. «Մեզի չե՞ս բացատրեր թէ այս ըրածներդ մեզի համար ի՞նչ կը նշանակեն”»։

Ես ալ անոնց պատասխանեցի. «²⁰Տէրը խօսեցաւ՝՝ ինծի՝ ըսելով. “Ըսէ՛ Իսրայէլի տան.

"Տէրը՝ Եհովան սա՛ կը յայտարարէ. «Ահա՛ ես պիտի պղծեմ իմ սրբարանս, ձեր զօրութեան մեծափառութիւնը, ձեր աչքերուն ցանկութիւնն ու ձեր անձին գորովի առարկան. իսկ ձեր երկիրը թողուցած որդիներն ու աղջիկները սուրով պիտի իյնան։

Դուք ալ իմ ըրածիս պէս պիտի ընէք. ձեր պեխը պիտի չծածկէք, եւ մարդոց հացը պիտի չուտէք.

ձեր խոյրերը ձեր գլուխը պիտի ըլլան, ու ձեր կօշիկները՝ ձեր ոտքերը. պիտի չհեծեծէք ու չլաք, հապա ձեր անօրէնութիւններով պիտի մաշիք եւ իրարու հետ պիտի ²¹հառաչէք։

Եզեկիէլ ձեզի ²²նշան մըն է. դուք անոր բոլոր ըրածներուն պէս պիտի ընէք, ու երբ ասիկա ²³պատահի, պիտի գիտնաք թէ ե՛ս եմ Տէրը՝ Եհովան»"”։

«Իսկ դո՛ւն, մարդո՛ւ որդի, երբ ես անոնցմէ յափշտակեմ իրենց ²⁴զօրութիւնը, իրենց պարծանքին բերկրանքը, իրենց աչքերուն ցանկութիւնը եւ իրենց անձին գորովի առարկան՝ որդիներն ու աղջիկները,

ահա՛ այդ օրը ազատած մը քեզի պիտի գայ եւ լուրը քու ականջներուդ լսել պիտի տայ։

Այդ օրը քու բերանդ պիտի բացուի ազատածին, ու պիտի խօսիս եւ ա՛լ համր պիտի չըլլաս։ Դուն անոնց նշան պիտի ըլլաս, եւ պիտի գիտնան թէ ե՛ս եմ Տէրը»։