Ezekiel 25

Lamentations  «  Ezekiel 24  ‹  Ezekiel 25  ›  Ezekiel 26  »  Daniel

ՄԱՐԳԱՐԷՈՒԹԻՒՆ ԱՄՄՈՆԻ ԴԷՄ

Դարձեալ ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ²ուղղէ՛ երեսդ Ամմոնի որդիներուն, ու մարգարէացի՛ր անոնց դէմ.

Ամմոնի որդիներուն ըսէ՛. “Մտի՛կ ըրէք Տէրոջ՝ Եհովայի խօսքը. Տէրը՝ Եհովան սա՛ կը յայտարարէ. "Քանի դուն «Վա՜շ» ըսիր իմ սրբարանիս դէմ՝ երբ պղծուեցաւ, Իսրայէլի ³երկրին դէմ՝ երբ ամայացաւ, եւ Յուդայի տան դէմ՝ երբ տարագրութեան գնաց,

ահա՛ ես քեզ ⁴արեւելքցիներուն իբր ստացուածք պիտի տամ. քու մէջդ պիտի ⁵հաստատեն իրենց գիւղակները, քու մէջդ պիտի դնեն իրենց բնակարանները, քու պտուղներդ պիտի ուտեն եւ քու կաթդ պիտի խմեն։

Ռաբբան ուղտերու արօտավայրի պիտի ⁶վերածեմ, եւ Ամմոնի որդիներուն երկիրը՝ հօտերու մակաղատեղ, ու պիտի գիտնաք թէ ե՛ս եմ Տէրը"”։

Արդարեւ Տէրը՝ Եհովան սա՛ կը յայտարարէ. “Քանի դուն ծափ զարկիր, ոտքդ գետինը զարկիր եւ Իսրայէլի երկրին մասին ուրախացար քու անձիդ ամբողջ արհամարհանքով,

ահա՛ ես իմ ձեռքս քու վրադ պիտի երկարեմ, եւ քեզ ⁷ազգերուն պիտի մատնեմ իբր կողոպուտ. քեզ ժողովուրդներէն պիտի կտրեմ, ու երկիրներուն մէջէն կորսնցնեմ. քեզ պիտի բնաջնջեմ, եւ պիտի գիտնաս թէ ե՛ս եմ Տէրը”»։

ՄԱՐԳԱՐԷՈՒԹԻՒՆ ՄՈՎԱԲԻ ԴԷՄ

Տէրը՝ Եհովան սա՛ կը յայտարարէ. «Քանի Մովաբ ու Սէիր ըսին. “Ահա՛ Յուդայի տունը բոլոր ազգերուն պէս է”,

ահա՛ ես պիտի բանամ Մովաբի ⁸սահմանը՝ իր քաղաքներուն կողմէն — իր ծայրը եղող քաղաքներուն՝ երկրին պարծանքը եղող Բեթեսիմոթի, Բահաղ-Մէոնի ու Կարիաթէմի կողմէն —

արեւելքցիներուն առջեւ, նաեւ Ամմոնի որդիներուն երկիրը։ Զանոնք իբր ստացուածք պիտի տամ, որպէսզի Ամմոնի որդիները ազգերուն մէջ չյիշուին։

Մովաբի մէջ ալ դատավճիռներ պիտի կիրարկեմ, ու պիտի գիտնան թէ ե՛ս եմ Տէրը»։

ՄԱՐԳԱՐԷՈՒԹԻՒՆ ԵԴՈՎՄԻ ԴԷՄ

Տէրը՝ Եհովան սա՛ կը յայտարարէ. «Քանի Եդովմ Յուդայի տան հետ վրէժխնդրութեամբ վարուեցաւ, եւ անկէ վրէժ առնելով՝ մեծապէս յանցաւոր եղաւ,

Տէրը՝ Եհովան սա՛ կը յայտարարէ. “Եդովմի վրայ անշուշտ ձեռքս պիտի երկարեմ. մարդն ու անասունը անկէ պիտի բնաջնջեմ եւ զայն անապատի պիտի վերածեմ՝ Թեմանէն մինչեւ Դեդան. անոնք սուրով պիտի իյնան։

Իմ ժողովուրդիս՝ Իսրայէլի ձեռքով վրէժս պիտի առնեմ Եդովմէն. անոնք իմ բարկութեանս ու ցասումիս համեմատ պիտի վարուին Եդովմի հետ, եւ իմ վրէժխնդրութիւնս պիտի գիտնան”, կը պատգամէ Տէրը՝ Եհովան»։

ՄԱՐԳԱՐԷՈՒԹԻՒՆ ՓՂՇՏԱՑԻՆԵՐՈՒՆ ԴԷՄ

Տէրը՝ Եհովան սա՛ կը յայտարարէ. «Քանի Փղշտացիները վրէժխնդրութեամբ վարուեցան, եւ իրենց անձին ամբողջ արհամարհանքով վրէժ առին՝ հնադարեան թշնամութեամբ կոտորելով,

Տէրը՝ Եհովան սա՛ կը յայտարարէ. “Ահա՛ ես իմ ձեռքս Փղշտացիներուն վրայ պիտի երկարեմ. Քերեթիները պիտի կոտորեմ եւ ծովեզերքը եղողներուն մնացորդը պիտի բնաջնջեմ։

Անոնց վրայ իմ ցասումիս յանդիմանութիւններով մեծ վրէժխնդրութիւններ պիտի կիրարկեմ, ու երբ իմ վրէժս անոնցմէ առնեմ՝ պիտի գիտնան թէ ե՛ս եմ Տէրը”»։