Ezra 8

2 Chronicles  «  Ezra 7  ‹  Ezra 8  ›  Ezra 9  »  Nehemiah

ՏԱՐԱԳՐՈՒԹԵՆԷՆ ՎԵՐԱԴԱՐՁՈՂ ԺՈՂՈՎՈՒՐԴԸ

Ահա՛ւասիկ Արտաշէս թագաւորին թագաւորութեան ատենը՝ ինծի հետ Բաբելոնէն բարձրացողներուն նահապետներն ու ազգահամարը.—

Փենեհէսի որդիներէն՝ Գերսոն. Իթամարի որդիներէն՝ Դանիէլ. Դաւիթի որդիներէն՝ Քետտուս.

Սեքենիայի որդիներէն՝ Փարոսի որդիներէն՝ Զաքարիա, եւ անոր հետ՝ ազգահամարի մէջ արձանագրուած հարիւր յիսուն այր ¹մարդ՝՝.

Փահաթ-Մովաբի որդիներէն՝ Զարիայի որդին՝ Եղիովենայի, եւ անոր հետ՝ երկու հարիւր այր մարդ.

Սեքենիայի որդիներէն՝ Յազիէլի որդին, եւ անոր հետ՝ երեք հարիւր այր մարդ.

Ադինի որդիներէն՝ Յովնաթանի որդին՝ Աբեդ, եւ անոր հետ՝ յիսուն այր մարդ.

Եղամի որդիներէն՝ Գոթողիայի որդին՝ Եսայի, եւ անոր հետ՝ եօթանասուն այր մարդ.

Սափատիայի որդիներէն՝ Միքայէլի որդին՝ Զաբադիա, եւ անոր հետ՝ ութսուն այր մարդ.

Յովաբի որդիներէն՝ Յեքիէլի որդին՝ Աբդիա, եւ անոր հետ՝ երկու հարիւր տասնութ այր մարդ.

Սաղոմիդի որդիներէն՝ Յոսեփիայի որդին, եւ անոր հետ՝ հարիւր վաթսուն այր մարդ.

Բերայիի որդիներէն՝ Բերայիի որդին՝ Զաքարիա, եւ անոր հետ՝ քսանութ այր մարդ.

Ազգադի որդիներէն՝ Ակատանի որդին՝ Յոհանան, եւ անոր հետ՝ հարիւր տասը այր մարդ.

Ադոնիկամի որդիներէն՝ վերջինները, ահա՛ւասիկ անոնց անունները.— Եղիփաղէտ, Յէիէլ ու Սեմայիա, եւ անոնց հետ՝ վաթսուն այր մարդ.

Բագուէի որդիներէն՝ Ութայի ու Զաբուդ, եւ անոնց հետ՝ եօթանասուն այր մարդ։

ԵԶՐԱՍ ՂԵՒՏԱՑԻՆԵՐ ԿԸ ԳՏՆԷ ՏԱՃԱՐԻՆ ՀԱՄԱՐ

Ասոնք դէպի Ահավա ²հոսող գետին եզերքը հաւաքեցի, ու հոն երեք օր բանակեցանք։ Ժողովուրդին ու քահանաներուն ³ուշադրութիւն դարձուցի՝՝, ու հոն Ղեւտացիներու որդիներէն ո՛չ մէկը գտայ։

Այն ատեն կանչել տուի գլխաւոր ⁴մարդիկը՝ Եղիազար, Արիէլ, Սեմայիա, Եղնաթան, Հարիպ, Եղնաթան, Նաթան, Զաքարիա ու Մեսուղամ, եւ խելացի մարդիկը՝ Յովարիբ ու Եղնաթան,

եւ զանոնք Քասիփիա կոչուած տեղին գլխաւորին՝ Ադդովի ⁵ղրկեցի։ Ադդովի եւ անոր եղբայրներուն՝ Քասիփիա կոչուած տեղը եղող Նաթանայիմներուն ըսուելիք խօսքերը անոնց բերանը դրի, որպէսզի մեր Աստուծոյն տան համար մեզի սպասարկուներ բերեն։

Քանի մեր Աստուծոյն բարի ձեռքը մեր վրայ էր, Իսրայէլեան Ղեւիի որդիին՝ Մոհողիի որդիներէն ուշիմ մարդ մը բերին մեզի, այսինքն՝ Սարաբիան, անոր որդիներն ու եղբայրները, տասնութ հոգի.

նաեւ Ասաբիան, եւ անոր հետ՝ Մերարիի որդիներէն՝ Եսային, անոր եղբայրներն ու անոնց որդիները՝ քսան հոգի.

Նաթանայիմներէն ալ, որոնք Դաւիթ եւ իր իշխանաւորները Ղեւտացիներու ծառայութեան ⁶յատկացուցեր էին, երկու հարիւր քսան Նաթանայիմ. իրենցմէ բոլորն ալ անուններով որոշուած էին։

ԵԶՐԱՍ Կ’ԱՌԱՋՆՈՐԴԷ ԺՈՂՈՎՈՒՐԴԸ ԾՈՄԱՊԱՀՈՒԹԵԱՆ ԵՒ ԱՂՕԹՔԻ

Հոն՝ Ահավայի գետին քով՝ ծոմապահութիւն յայտարարեցի, որպէսզի խոնարհինք Տէրոջ՝ մեր Աստուծոյն առջեւ, եւ իրմէ ⁷յաջող ճամբորդութիւն խնդրենք մեզի, մեր մանուկներուն ու մեր ամբողջ ինչքին համար։

Արդարեւ ամչցայ թագաւորէն զօրագունդ ու ձիաւորներ խնդրել՝ ճամբային մէջ ⁸մեզ թշնամիներէն պաշտպանելու՝՝ համար, որովհետեւ թագաւորին ըսեր էինք. «Մեր Աստուծոյն ձեռքը բոլոր զինք փնտռողներուն վրայ է՝ բարիքի համար, իսկ իր զօրութիւնն ու բարկութիւնը բոլոր զինք լքողներուն դէմ են»։

Ուստի ծոմ պահեցինք, եւ ասոր համար մեր Աստուծոյն թախանձեցինք. ան ալ մեր թախանձանքը ընդունեց։

ՆՈՒԷՐՆԵՐ ՏԱՃԱՐԻՆ ՀԱՄԱՐ

Քահանաներու պետերէն տասներկու մարդ զատեցի — Սարաբիան, Ասաբիան, ու անոնց հետ՝ իրենց եղբայրներէն տասը մարդ —,

եւ անոնց առջեւ կշռեցի արծաթը, ոսկին ու առարկաները, այսինքն՝ թագաւորին, անոր խորհրդականներուն եւ իշխանաւորներուն, ու հոն գտնուող ամբողջ Իսրայէլի ⁹մատուցանած ¹⁰ընծաները՝ մեր Աստուծոյն տան համար։

Նաեւ անոնց ձեռքերուն մէջ կշռեցի վեց հարիւր յիսուն տաղանդ արծաթ, հարիւր տաղանդ արծաթէ առարկաներ, հարիւր տաղանդ ոսկի,

հազար դրամ արժող քսան ոսկի ըմպանակ, եւ գեղեցիկ, փայլուն, ոսկիի պէս ¹¹թանկագին պղինձէ երկու անօթ։

Անոնց ըսի. «Դուք Տէրոջ սրբացած էք, այս առարկաներն ալ սուրբ են, իսկ արծաթն ու ոսկին յօժարակամ ընծայ են Տէրոջ՝ ձեր հայրերուն Աստուծոյն։

Հսկեցէ՛ք ու պահեցէ՛ք զանոնք, մինչեւ որ զանոնք Երուսաղէմ կշռէք՝ Տէրոջ տան սենեակներուն մէջ, քահանաներուն, Ղեւտացիներու պետերուն եւ Իսրայէլի ¹²նահապետներուն առջեւ»։

Ուստի քահանաներն ու Ղեւտացիները արծաթը, ոսկին եւ առարկաները կշիռով ստացան, որպէսզի Երուսաղէմ՝ մեր Աստուծոյն տունը տանին։

ՎԵՐԱԴԱՐՁ ԴԷՊԻ ԵՐՈՒՍԱՂԷՄ

Առաջին ամսուան տասներկրորդ օրը Ահավայի գետէն մեկնեցանք՝ Երուսաղէմ երթալու համար. մեր Աստուծոյն ձեռքը մեր վրայ էր, ու մեզ ճամբան թշնամիին ու դարանակալին ձեռքէն ազատեց։

Երբ Երուսաղէմ հասանք, հոն երեք օր մնացինք։

Չորրորդ օրը՝ արծաթը, ոսկին եւ առարկաները մեր Աստուծոյն տան մէջ կշռուեցան Ուրիա քահանային որդիին՝ Մերամոթի ձեռքով։ Անոր հետ էր Փենեհէսի որդին՝ Եղիազար, եւ անոնց հետ էին Յեսուի որդին՝ Յովզաբադ, ու Բանուիի որդին՝ Նովադիա Ղեւտացիները։

Բոլորը թիւով եւ կշիռով յանձնուեցան. այն ատեն ամբողջ կշիռը արձանագրուեցաւ։

Տարագրութեան որդիները, որոնք գերութենէն վերադարձած էին, Իսրայէլի Աստուծոյն ողջակէզներ մատուցանեցին.— ամբողջ Իսրայէլի համար՝ տասներկու զուարակ, իննսունվեց խոյ, եօթանասունեօթը գառ, ու մեղքի պատարագի համար՝ տասներկու քօշ. ասոնք բոլորը Տէրոջ ողջակէզ մատուցանեցին։

Անոնք թագաւորին հրովարտակը Գետին այս կողմը եղող թագաւորին սատրապներուն ու կուսակալներուն յանձնեցին, անոնք ալ ժողովուրդին եւ Աստուծոյ տան նեցուկ եղան։