Habakkuk 1

Nahum  «  Nahum 3  ‹  Habakkuk 1  ›  Habakkuk 2  »  Zephaniah

Ամբակում մարգարէին ¹տեսիլքով հաղորդուած՝՝ պատգամը.—

ԱՄԲԱԿՈՒՄ ԿԸ ԳԱՆԳԱՏԻ ԱՆԱՐԴԱՐՈՒԹԵԱՆ ԴԷՄ

Մինչեւ ե՞րբ, ո՛վ ²Տէր, օգնութեան պիտի կանչեմ, բայց պիտի չլսես, Բռնութեան համար քեզի պիտի աղաղակեմ, սակայն պիտի չազատես։

Ինչո՞ւ անօրէնութիւնը ցոյց կու տաս Եւ անիրաւութիւնը ³կը դիտես՝՝։ Արդարեւ իմ առջեւս զրկանք ու բռնութիւն կայ, Կռիւ եւ բանավէճ ⁴գրգռող կայ։

Հետեւաբար օրէնքը անզօր է, Եւ իրաւունքը ամենեւին ⁵չի գործադրուիր՝՝. Քանի ամբարիշտը արդարը կը շրջապատէ, Դատաստանը ծուռ ⁶կ’ըլլայ։

ԱՍՏՈՒԱԾ ԿԸ ՊԱՏԱՍԽԱՆԷ

Տեսէ՛ք ⁷ազգերուն մէջ, ⁸ուշադրութի՛ւն դարձուցէք՝՝, Եւ զարմանալով ապշեցէ՛ք, Որովհետեւ ձեր օրերուն մէջ այնպիսի արարք մը պիտի կատարեմ, Որ եթէ պատմուի ձեզի՝ պիտի չհաւատաք։

Արդարեւ ահա՛ ես ոտքի պիտի հանեմ Քաղդէացիները, Այդ դառն եւ արագաշարժ ազգը, Որ երկրի լայնքով կը շրջի՝ Իրեն չպատկանող բնակարաններու տիրանալու համար։

Ան սոսկալի եւ ահարկու է, Անոր դատաստանն ու իշխանութիւնը ⁹իրեն կը պատկանին՝՝։

Անոր ձիերը ինձերէն աւելի արագընթաց են, Եւ իրիկուան գայլերէն աւելի ¹⁰կատղած։ Անոր ձիաւորները պիտի տարածուին, Անոր ձիաւորները հեռուէն պիտի գան, Կերակուրի վրայ ¹¹սուրացող արծիւի պէս պիտի թռչին։

Անոնք բռնութեան համար պիտի գան, Գունդերուն երեսները դէպի ¹²յառաջ ուղղուած են, Եւ գերիներ պիտի հաւաքեն՝ աւազի պէս։

Ան թագաւորները պիտի ծաղրէ, Իշխանապետները անոր ծիծաղին առարկան պիտի ըլլան. Բոլոր ամրոցներուն վրայ պիտի ծիծաղի, Որովհետեւ հող պիտի դիզէ ու զանոնք պիտի գրաւէ։

Այն ատեն անոր ¹³միտքը պիտի փոխուի ու պիտի ¹⁴հպարտանայ, Եւ իր կարողութիւնը իր աստուծոյն վերագրելով՝ յանցաւոր պիտի ըլլայ։

ԱՄԲԱԿՈՒՄ ԿՐԿԻՆ ԿԸ ԳԱՆԳԱՏԻ

Միթէ դուն ¹⁵յաւիտենական չե՞ս, ո՛վ Տէր, իմ Աստուա՛ծս, իմ Սո՛ւրբս. Պիտի չմեռնինք։ Ո՛վ Տէր, զայն դատաստանի համար նշանակեցիր. Ո՛վ Վէմ, զայն յանդիմանելու համար հաստատեցիր։

Դո՛ւն, որուն մաքրամաքուր աչքերը կարող չեն չարութիւնը տեսնել, Եւ անիրաւութեան չեն կրնար նայիլ, Ինչո՞ւ անհաւատարիմներուն կը նայիս, Ու կը լռես՝ երբ ամբարիշտը իրմէ արդարը կը կլլէ։

Մարդը ծովու ձուկերուն պէս կ’ընես, Սողուններուն պէս՝ որոնք իրենց վրայ կառավարիչ չունին։

Անոնք բոլորը կարթով կը հանէ, Զանոնք իր ուռկանով կը բռնէ, Զանոնք իր ցանցով կը հաւաքէ. Ուստի կ’ուրախանայ ու կը խայտայ։

Հետեւաբար իր ուռկանին զոհ կը մատուցանէ, Իր ցանցին խունկ կը ծխէ, Որովհետեւ անոնցմով իր բաժինը պարարտ կ’ըլլայ, Եւ իր ուտելիքը՝ ¹⁶համադամ։

Արդեօք այս պատճառով իր ուռկանը պիտի պարպէ՞, Եւ շարունակ ազգերը պիտի ջարդէ՞ առանց խնայելու։