Habakkuk 2

Nahum  «  Habakkuk 1  ‹  Habakkuk 2  ›  Habakkuk 3  »  Zephaniah

ԱՍՏՈՒԾՈՅ ՊԱՏԱՍԽԱՆԸ ԱՄԲԱԿՈՒՄԻ

Իմ պահպանութեանս տեղը պիտի կենամ, Ու պատնէշին վրայ պիտի կայնիմ. Պիտի ¹սպասեմ, որ տեսնեմ թէ ինծի հետ ի՛նչ պիտի խօսի, Եւ թէ ի՛նչ պիտի պատասխանեմ երբ զիս յանդիմանէ։

Տէրը ինծի պատասխանեց, եւ ըսաւ. «Գրէ՛ տեսիլքը, ու բացայայտէ՛ տախտակներու վրայ, Որպէսզի զայն կարդացողը ²դիւրութեամբ կարդայ՝՝։

Արդարեւ տեսիլքը դարձեալ սահմանուած ատենին համար է. Վախճանին մասին ³կ’արտայայտուի, եւ պիտի չստէ. Եթէ տնտնայ՝ սպասէ՛ անոր, Քանի որ անշուշտ պիտի գայ, պիտի չուշանայ։

Ահա՛ մեծամիտ մարդուն անձը իր ներսը ուղիղ չէ, Բայց արդարը իր հաւատքով պիտի ապրի»։

ԱՆԱՐԴԱՐՈՒԹԵԱՆ ՎՃԻՌԸ

Մանաւանդ գինին անհաւատարիմ կ’ընէ. Յանդուգն ⁴մարդը հանդարտ չի կենար, Որովհետեւ իր անձը ⁵դժոխքին պէս կ’ընդարձակէ, Ու մահուան պէս ըլլալով՝ չի կշտանար. Հապա բոլոր ազգերը իր քով կը հաւաքէ, Բոլոր ժողովուրդները իր քով կը ⁶դիզէ։

Միթէ ասոնք բոլորը ⁷զինք նշաւակ պիտի չընե՞ն՝՝, Եւ իր մասին այլաբանական հանելուկներով պիտի չըսե՞ն. «Վա՜յ անոր՝ որ իրը չեղածը կը շատցնէ, (Մինչեւ ե՞րբ պիտի տեւէ,) Եւ ինքզինք ⁸պարտքերով կը ծանրաբեռնէ»։

Միթէ յանկարծ վաշխառուներդ պիտի չկանգնի՞ն, ⁹Կեղեքիչներդ պիտի չարթննա՞ն, Դուն անոնց աւարը պիտի չըլլա՞ս։

Քանի դուն շատ ազգեր թալլեցիր, Քեզ ալ պիտի թալլեն ժողովուրդներուն բոլոր մնացորդները՝ Մարդոց արիւններուն Ու երկրին, քաղաքին եւ բոլոր անոր մէջ բնակողներուն եղած բռնութեան համար։

Վա՜յ անոր՝ որ իր տան համար վատ ագահութեամբ կը վաստկի, Որպէսզի իր բոյնը բարձր վայր դնէ՝ Չարիքին ձեռքէն ազատելու համար։

Բազմաթիւ ժողովուրդներ ¹⁰կոտորելով՝ Քու տանդ վրայ ամօթ բերել ծրագրեցիր, Եւ անձիդ դէմ մեղանչեցիր։

Արդարեւ քարը պատէն պիտի աղաղակէ, Ու գերանը շէնքին փայտերուն մէջէն պիտի պատասխանէ անոր։

Վա՜յ անոր՝ որ արիւններով քաղաք կը կառուցանէ, Եւ անիրաւութեամբ բերդաքաղաք կը հաստատէ։

Ահա՛ զօրքերու Տէրոջմէն չէ՞ Որ ժողովուրդները կրակի համար կը յոգնին, Ազգերը պարապ տեղը կը պարտասին.

Արդարեւ երկիրը Տէրոջ փառքին գիտութեամբ պիտի լեցուի, Ինչպէս ջուրերը ծովուն յատակը կը ծածկեն։

Վա՜յ քեզի, որ քու ընկերիդ գինի կը խմցնես. Տիկէդ կը լեցնես, Ուրիշներն ալ կը գինովցնես, Որպէսզի անոնց մերկութիւնը տեսնես։

Փառքէն աւելի անարգանքով ¹¹յագեցար. Դո՛ւն ալ խմէ ու ¹²մերկացի՛ր։ Տէրոջ աջ ձեռքին բաժակը քեզի պիտի փոխանցուի, Եւ փառքիդ վրայ ստորնացում պիտի գայ։

Արդարեւ Լիբանանի եղած բռնութիւնը քեզ պիտի ծածկէ, Նաեւ գազաններուն բնաջնջումը քեզ պիտի վախցնէ, Մարդոց արիւններուն Ու երկրին, քաղաքին եւ բոլոր անոր մէջ բնակողներուն եղած բռնութեան համար։

Ի՞նչ օգուտ ունի ¹³արհեստաւորին քանդակած ¹⁴կուռքը — Ձուլածոյ կուռքը եւ ստութիւն սորվեցնողը — Որ արհեստաւորը վստահի իր ձեւակերպածին, Մինչ համր չաստուածներ կը շինէ։

Վա՜յ անոր՝ որ փայտին կ’ըսէ. “Արթնցի՛ր”, Ու լուռ քարին. “Սթափէ՛”. Միթէ ան կրնա՞յ բան մը սորվեցնել։ Ահա՛ ան ոսկիով ու արծաթով պատուած է, Եւ անոր մէջ ամենեւին ¹⁵շունչ չկայ։

Սակայն Տէրը իր սուրբ տաճարին մէջ է. Լռէ՛ անոր առջեւ, ո՛վ ամբողջ երկիր։