Hosea 8

Daniel  «  Hosea 7  ‹  Hosea 8  ›  Hosea 9  »  Joel

ՏԷՐԸ ԿԸ ՅԱՆԴԻՄԱՆԷ ԻՍՐԱՅԷԼԸ՝ ԿՌԱՊԱՇՏՈՒԹԵԱՆ ՀԱՄԱՐ

Շեփորը ¹բերա՛նդ դիր. Թշնամին կը խոյանայ Տէրոջ տան վրայ՝ արծիւի պէս, Քանի որ իմ ուխտս անտեսեցին Եւ իմ օրէնքիս դէմ յանցանք գործեցին։

Իսրայէլ ինծի կ’աղաղակէ. «Իմ Աստուա՛ծս, մենք քեզ կը ճանչնա՛նք»։

Իսրայէլ բարին մերժեց. Թշնամին զինք պիտի հետապնդէ։

Անոնք թագաւորներ նշանակեցին, բայց ինձմով չէր. Իշխանաւորներ նշանակեցին, սակայն զանոնք չէի ճանչնար։ Իրենց արծաթով ու ոսկիով իրենց կուռքեր կերտեցին, Որպէսզի բնաջնջուին։

Քու հորթդ մերժուեցաւ, ո՛վ Սամարիա. Իմ բարկութիւնս անոնց դէմ բորբոքեցաւ. Մինչեւ ե՞րբ պիտի չկարենան անմեղ ըլլալ։

Արդարեւ ասիկա ալ Իսրայէլէն է. Արհեստաւո՛րը կերտեց զայն, ուրեմն Աստուած չէ. Հետեւաբար Սամարիայի հորթը կտոր-կտոր պիտի ըլլայ։

Քանի հով սերմանեցին, փոթորիկ պիտի հնձեն. Ան հասուն ցորեն չունի. Եթէ բուսնի՝ ալիւր պիտի չտայ. Ու եթէ տայ՝ օտարները պիտի ուտեն զայն։

Իսրայէլ կլլուեցաւ. Հիմա ազգերուն մէջ անբաղձալի իրի պէս պիտի ըլլան։

Արդարեւ անոնք առանձնակեաց վայրենի իշու պէս Ասորեստան գացին. Եփրեմ հոմանիներ պարգեւատրեց։

Թէպէտ իրենք ազգերը պարգեւատրեցին, ես հիմա զանոնք պիտի հաւաքեմ. Իշխանաւորներու թագաւորին բեռէն պիտի սկսին քիչ մը հանգստանալ.

²Արդարեւ Եփրեմ բագինները բազմապատկեց՝ մեղանչելու համար, Եւ այդ բագինները իրեն համար մեղանչելու պատճառ եղան։

Իմ օրէնքիս բիւրաւոր կանոնները գրեցի անոր, Սակայն օտար բանի պէս սեպուեցան։

Իմ ընծաներուս զոհերուն համար՝ Անոնք միս կը զոհեն, ու զայն կ’ուտեն, Բայց Տէրը անոնց չի հաւանիր։ Հիմա իրենց անօրէնութիւնը պիտի յիշէ Եւ իրենց մեղքերը պիտի հատուցանէ. Անոնք Եգիպտոս պիտի վերադառնան։

Արդարեւ Իսրայէլ իր Արարիչը մոռցաւ, ու ³մեհեաններ կառուցանեց. Յուդա պարսպապատ քաղաքները շատցուց, Բայց ես անոր քաղաքներուն վրայ կրակ պիտի թափեմ, Եւ անոր պալատները պիտի սպառէ։