Hosea 10

Daniel  «  Hosea 9  ‹  Hosea 10  ›  Hosea 11  »  Joel

ՄԱՐԳԱՐԷՆ ԿԸ ԽՕՍԻ ԻՍՐԱՅԷԼԻ ՄԱՍԻՆ

Իսրայէլ բազմաճիւղ որթատունկ մըն է, Իրեն ¹համեմատ պտուղ կը բերէ. Իր պտուղին առատութեան չափ բագինները բազմապատկեց, Իր երկրին ²գեղեցկութեան համեմատ արձանները ³գեղեցկացուց։

Անոնց սիրտը ⁴փոփոխական է. հիմա յանցաւոր պիտի սեպուին։ ⁵Տէրը անոնց բագինները պիտի փլցնէ, Անոնց արձանները պիտի կործանէ։

Արդարեւ հիմա պիտի ըսեն. «Մենք թագաւոր չունինք, Քանի որ Տէրոջմէն չվախցանք. Թագաւորը մեզի ի՞նչ պիտի կարենայ ընել»։

Խօսքեր կ’արտասանեն, երբ ուխտ կնքեն՝ սուտ ⁶երդում կ’ընեն. Ուստի դատավճիռը թունաւոր խոտի պէս պիտի բուսնի արտին ակօսներուն մէջ։

Սամարիայի բնակիչները Բեթաւանի հորթերուն համար պիտի վախնան. Արդարեւ անոր ժողովուրդը ⁷կուռքին վրայ պիտի սգայ, Եւ անոր քուրմերը անոր փառքին համար պիտի ⁸դողան, Քանի որ ան իր քովէն փոխադրուեցաւ։

Ան ալ Ասորեստան պիտի տարուի՝ Իբր ընծայ ⁹Յարեբ թագաւորին։ Եփրեմ ամօթ պիտի ¹⁰զգայ, Եւ Իսրայէլ իր ծրագիրէն պիտի ամչնայ։

¹¹Սամարիա իր թագաւորով՝՝ պիտի բնաջնջուի Ջուրի մակերեսին վրայ եղող փրփուրի պէս։

Աւէնի բարձր տեղերը — Իսրայէլի մեղքը — պիտի կործանին. Անոնց բագիններուն վրայ փուշ ու տատասկ պիտի ¹²բուսնի. Լեռներուն պիտի ըսեն. «Ծածկեցէ՛ք մեզ», Եւ բլուրներուն. «Ինկէ՛ք մեր վրայ»։

ԱՍՏՈՒԱԾ Կ’ԻՄԱՑՆԷ ԻՍՐԱՅԷԼԻ ՎՃԻՌԸ

Գաբաայի օրերէն ի վեր մեղանչեցիր, ո՛վ Իսրայէլ. Անոնք հոն կեցան, Գաբաայի մէջ չարութեան որդիներուն դէմ եղած պատերազմը անոնց չհասաւ։

Զանոնք փափաքիս համաձայն պիտի պատժեմ. Ժողովուրդները անոնց դէմ պիտի հաւաքուին, Քանի իրենց երկու ¹³անօրէնութիւններուն կը կապուին։

Եփրեմ վարժուած երինջ մըն էր՝ որ կը սիրէր կամնել, Բայց ես անոր վայելչագեղ վիզին վրայ լուծ մը անցուցի. Եփրեմը արօրի պիտի լծեմ, Յուդա պիտի հերկէ, Յակոբ անոր ետեւէն պիտի տափանէ։

Արդարութեա՛մբ սերմանեցէք ձեզի, Եւ կարեկցութեա՛մբ հնձեցէք. Մշակեցէ՛ք ձեր խոպան հողերը, Քանի ատենն է Տէրը փնտռելու, Մինչեւ որ գայ ու ձեր վրայ արդարութիւն ¹⁴տեղացնէ։

Ամբարշտութիւն ¹⁵ցանեցիք եւ անիրաւութիւն հնձեցիք. Խարդախութեան պտուղը կերաք, Քանի որ դուն ¹⁶ճամբայիդ ¹⁷ապաւինեցար, քու զօրաւորներուդ շատութեան։

Ուստի քու ժողովուրդիդ մէջ ժխոր պիտի բարձրանայ, Եւ բոլոր ամրոցներդ պիտի կործանին, Ինչպէս Սաղման Բեթարբէլը կործանեց պատերազմին օրը, Երբ մայրը իր որդիներուն վրայ գետին զարնուեցաւ։

Բեթէլ նոյնպէս պիտի ընէ ձեզի՝ Ձեր չափազանց չարութեան ¹⁸պատճառով. Արշալոյսին՝ Իսրայէլի թագաւորը բոլորովին պիտի բնաջնջուի։