Isaiah 3

Song of Solomon  «  Isaiah 2  ‹  Isaiah 3  ›  Isaiah 4  »  Jeremiah

ՔԱՈՍ ԵՐՈՒՍԱՂԷՄԻ ՄԷՋ

Արդարեւ ահա՛ զօրքերու Տէրը՝ Եհովան Երուսաղէմէն եւ Յուդայէն պիտի վերցնէ նեցուկն ու ցուպը, Հացին ամբողջ նեցուկը եւ ջուրին ամբողջ նեցուկը,

Զօրաւորն ու պատերազմիկը, Դատաւորն ու մարգարէն, դիւթն ու երէցը,

Յիսնապետն ու պատուաւոր մարդը, Խորհրդականը, ¹վարպետ արհեստաւորն ու խելացի հմայողը։

Անոնց վրայ տղանե՛ր իշխանաւոր պիտի կարգեմ, Անոնց վրայ երախանե՛ր պիտի տիրեն։

Ժողովուրդը պիտի ճնշուի, Մէկը միւսէն, եւ իւրաքանչիւրը իր ընկերէն. ²Մանուկները ³երէցներուն դէմ պիտի հպարտանան, Եւ անարգները՝ պատուականներուն դէմ։

Այն ատեն մարդ իր հօր տունէն եղող եղբայրը պիտի բռնէ ու ըսէ. «Դուն հանդերձ ունիս, Մեր վրայ մեծաւո՛ր եղիր, Եւ այս աւերակը քու ձեռքիդ տակ թող ըլլայ»։

Այդ օրը ան ⁴երդում պիտի ընէ՝՝ ու ըսէ. «Ես ⁵առաջնորդ չեմ ըլլար, Որովհետեւ իմ տանս մէջ ո՛չ հաց կայ, ո՛չ ալ հանդերձ. Զիս մեծաւոր մի՛ նշանակէք ժողովուրդին վրայ»։

Արդարեւ Երուսաղէմ ⁶կործանեցաւ եւ Յուդա ինկաւ, Քանի որ անոնց լեզուներն ու արարքները Տէրոջ դէմ են, Որպէսզի դառնացնեն անոր փառաւոր աչքերը։

Անոնց երեսին տեսքը իրենց դէմ կը վկայէ, Եւ իրենց մեղքերը Սոդոմի պէս կը յայտնեն, չեն ծածկեր։ Վա՜յ անոնց անձին, որովհետեւ իրենց վրայ չարիք բերին։

Արդարներուն ըսէ՛ք թէ բարօրութիւն պիտի ունենան, Որովհետեւ իրենց արարքներուն պտուղը պիտի ուտեն։

Վա՜յ ամբարիշտին, չարիք պիտի ըլլայ անոր, Քանի որ անոր ձեռքերուն գործերուն փոխարէնը պիտի տրուի իրեն։

Բայց իմ ժողովուրդս ճնշողները երախանե՛ր են, Եւ անոր վրայ կինե՛ր կը տիրեն։ Ո՛վ իմ ժողովուրդս, քու առաջնորդներդ քեզ կը մոլորեցնեն, Եւ քու ⁷ճամբաներուդ ուղղութիւնը կը շրջեն՝՝։

ԱՍՏՈՒԱԾ ԿԸ ԴԱՏԷ ԻՐ ԺՈՂՈՎՈՒՐԴԸ

Տէրը կայնած է դատ վարելու, Ոտքի ելած է՝ ժողովուրդները դատելու։

Տէրը դատաստանի պիտի ⁸կանչէ Իր ժողովուրդին երէցներն ու իշխանաւորները՝ ըսելով. «Արդարեւ դուք այգին այրեցիք, Եւ դժբախտէն յափշտակուածը ձեր տունն է։

Ի՞նչ իրաւունքով իմ ժողովուրդս կը ճզմէք, Ու դժբախտներուն երեսը կը ⁹կոխկռտէք», Կը պատգամէ Եհովան, զօրքերու Տէրը։

Ապա Տէրը սա՛ ըսաւ. «Քանի Սիոնի աղջիկները խրոխտացան Եւ բարձրապարանոց կը քալեն՝ Լկտի ակնարկներով, Մանրաքայլ կ’երթան Ու ոտքերով շաչիւն կը հանեն,

Տէրն ալ Սիոնի աղջիկներուն գագաթը պիտի կնտացնէ, Եւ անոնց մերկութիւնը պիտի բանայ»։

ԱԶԴԱՐԱՐՈՒԹԻՒՆ ԵՐՈՒՍԱՂԷՄԻ ԿԻՆԵՐՈՒՆ

Այդ օրը Տէրը պիտի հանէ Անոնց շքեղ ոտքի մեհեւանդները, Ցանցակերպ ծամակալները եւ մահիկները,

Գինդերը, ապարանջաններն ու շղարշները,

Խոյրերը, ոտքի շղթաներն ու կամարները, Անուշահոտութիւններու սրուակները, հմայեակները,

Մատանիները եւ քիթի օղակները,

Պատուական զգեստները, վերարկուները, Ծածկոցներն ու քսակները,

Հայելիներն ու շապիկները, Խոյրերն ու քօղերը.

Որպէսզի բուրմունքի տեղ նեխութիւն ըլլայ, Գօտիի տեղ՝ չուան, ¹⁰Յարդարուած հիւսքերու տեղ՝ կնտութիւն, Լանջագեղ կամարի տեղ՝ քուրձէ գօտի, Ու գեղեցկութեան տեղ՝ խալ։

Քու ¹¹մարդիկդ սուրով պիտի իյնան, Եւ զօրաւորներդ՝ պատերազմի մէջ։

Անոր դռները պիտի տառապին ու սգան, Եւ ան ¹²ամայանալով՝ գետինը պիտի նստի։