Isaiah 8

Song of Solomon  «  Isaiah 7  ‹  Isaiah 8  ›  Isaiah 9  »  Jeremiah

ԵՍԱՅԻԻ ՈՐԴԻՆ ՈՐՊԷՍ ՆՇԱՆ ԻՐ ԺՈՂՈՎՈՒՐԴԻՆ

Տէրը ինծի ըսաւ. «Դուն քեզի մեծ պնակիտ մը առ եւ անոր վրայ մարդու ¹գրիչով գրէ. “Մահեր-Շալալ-Հաշ-Պազին”»։

Ես ալ ինծի հետ հաւատարիմ վկաներ առի, Ուրիա քահանան ու Բարաքիայի որդին՝ Զաքարիան, որ վկայեն։

Մերձեցայ մարգարէուհիին, եւ ան յղացաւ ու որդի մը ծնաւ։ Տէրը ինծի ըսաւ. «Անոր անունը ²“Մահեր-Շալալ-Հաշ- Պազ” դիր.

որովհետեւ դեռ տղան “հայրս եւ մայրս” կանչելը ³չսորված՝ Դամասկոսի հարստութիւններն ու Սամարիայի աւարը Ասորեստանի թագաւորին առջեւ պիտի տարուին»։

ԱՍՈՐԵՍՏԱՆԻ ԹԱԳԱՒՈՐԻՆ ԳԱԼՈՒՍՏԸ

Տէրը դարձեալ խօսեցաւ ինծի եւ ըսաւ.

«Քանի այս ժողովուրդը Սիլովայի կամաց ⁴հոսող ջուրերը ⁵կը մերժէ՝՝ եւ Ռասինի ու Ռովմելայի որդիով կը բերկրի,

Ահա՛ Տէրը իրենց վրայ Գետին զօրաւոր եւ առատ ջուրերը, Այսինքն՝ Ասորեստանի թագաւորն ու անոր ամբողջ ⁶զօրութիւնը պիտի բարձրացնէ. Անիկա իր ամբողջ հունէն վեր պիտի ելլէ Եւ իր բոլոր ⁷ափերը պիտի ողողէ՝՝։

Յուդայի մէջէն անցնելով՝ պիտի յորդի ու ⁸հեռանայ, Մինչեւ մարդոց վիզը պիտի հասնի, Եւ անոր թեւերուն տարածումը Քու երկրիդ լայնութիւնը պիտի լեցնէ, ո՛վ Էմմանուէլ»։

⁹Դաշնակցեցէ՛ք, ո՛վ ժողովուրդներ. բայց պիտի խորտակուիք։ Ունկնդրեցէ՛ք դուք բոլորդ, ո՛վ հեռաւոր երկիրներ բնակողներ. Գօտեւորուեցէ՛ք, բայց պիտի խորտակուիք. Գօտեւորուեցէ՛ք, բայց պիտի խորտակուիք.

Խորհրդակցեցէ՛ք, սակայն պիտի ձախողիք. Խօ՛սք մը ըսէք, սակայն ան պիտի չհաստատուի. Քանի որ Աստուած մեզի հետ է։

ՏԷՐԸ ԿԸ ԽՐԱՏԷ ՄԱՐԳԱՐԷՆ

Արդարեւ Տէրը հզօր ձեռքով սա՛ խօսեցաւ ինծի, Ու խրատեց զիս թէ պէտք չէ այս ժողովուրդին ճամբային մէջ քալել՝ ըսելով.

«Դաւադրութիւն մի՛ ¹⁰կոչէք Ինչ բան որ այս ժողովուրդը դաւադրութիւն կը կոչէ. Անոր երկիւղով մի՛ վախնաք ու մի՛ ահաբեկիք։

Միա՛յն զօրքերու Տէրը ¹¹փառաւորեցէք. Ի՛նք ըլլայ ձեր երկիւղը, ի՛նք ըլլայ ձեր ահաբեկումը։

Ինք ձեզի սրբարան պիտի ըլլայ, Իսկ Իսրայէլի երկու տուներուն՝ Սայթաքումի քար եւ գլորելու վէմ, Ու Երուսաղէմի բնակիչներուն՝ վարմ ու որոգայթ։

Անոնցմէ շատերը պիտի գայթին, Եւ իյնալով ջախջախուին. Որոգայթի մէջ իյնալով պիտի բռնուին»։

ԶԳՈՒՇԱՑՈՒՄ ՄԵՌԵԼԱՀԱՐՑՈՒԹԵՆԷ

Կապէ՛ վկայութիւնը, Կնքէ՛ օրէնքը ¹²աշակերտներուս մէջ։

Ուրեմն ես պիտի սպասեմ Տէրոջ, Որ Յակոբի տունէն իր երեսը ծածկած է, Եւ անո՛ր պիտի յուսամ։

Ահա՛ւասիկ ես ու այն զաւակները՝ որ Տէրը ինծի տուաւ, Նշաններ եւ սքանչելիքներ ըլլալու Իսրայէլի մէջ՝ Սիոն լեռը բնակող զօրքերու Տէրոջմէն։

Ու երբ ձեզի ըսեն. «Մրմնջող եւ ¹³քրթմնջող վհուկներո՛ւն Ու նշանագէտներո՛ւն հարցուցէք», Այն ատեն պատասխանեց՛էք. «Ժողովուրդը իր Աստուծոյն պիտի չհարցնէ՞. Ապրողներուն համար մեռեալներո՞ւն պիտի հարցնէ»։

Օրէնքին ու վկայութեան թող հարցնեն, Եթէ այս խօսքին համաձայն չխօսին, Անոնք ամենեւին լոյս չունին։

ՏԱԳՆԱՊԻ ԺԱՄԱՆԱԿ ՄԸ

Ժողովուրդը վիշտ ու սով կրելով պիտի անցնի անկէ. Երբ անօթենայ, պիտի բարկանայ, Իր թագաւորը եւ իր Աստուածը պիտի անիծէ, ու վեր նայի։

Դէպի երկիր պիտի նայի, Եւ ահա՛ տագնապ ու խաւար կայ, տուայտանքի մէգ. Դէպի մթութիւն պիտի քշուի։