Isaiah 22

Song of Solomon  «  Isaiah 21  ‹  Isaiah 22  ›  Isaiah 23  »  Jeremiah

ՊԱՏԳԱՄ ԵՐՈՒՍԱՂԷՄԻ ՄԱՍԻՆ

Տեսիլքի ձորին պատգամը.— Ուրեմն քեզի ի՞նչ եղաւ՝ Որ բոլորդ տանիքներու վրայ ելաք,

Ո՛վ վայնասունով լեցուած Դղրդացող քաղաք, հրճուալից բերդաքաղաք։ Քու ¹սպաննուածներդ սուրով խոցուած չեն, Ո՛չ ալ պատերազմի մէջ մեռած։

Բոլոր մեծաւորներդ միասին փախան, Աղեղնաւորներէն ²գերուեցան։ Քու ժողովուրդիդ հեռու փախչողներէն Բոլոր գտնուածները միասին գերուեցան։

Հետեւաբար ըսի. «Ձեր նայուածքը դարձուցէ՛ք ինձմէ, որ դառնապէս լամ. Մի՛ փութաք զիս մխիթարել Իմ ժողովուրդիս աղջիկին կործանումին համար»։

Արդարեւ խուճապի, կոխկռտումի ու շփոթութեան օրն է Զօրքերու Տէրոջ՝ Եհովայէն ղրկուած Տեսիլքի ձորին մէջ. Պարիսպը կը փլցնեն, եւ աղաղակը մինչեւ լեռը կը հասնի։

Եղամ կապարճը կը կրէ Մարդոցմով լեցուած կառքերով եւ ձիաւորներով. Կիր վահանը կը բանայ։

Քու ընտիր հովիտներդ կառքերով լեցուեցան, Ու ձիաւորները ³շարուեցան դռներուն քով։

Յուդայի ծածկոցը բացուեցաւ. Այդ օրը անտառին տան զէնքերուն նայեցաք,

Եւ տեսաք թէ Դաւիթի քաղաքին ճեղքերը բազմաթիւ են։ Ստորին աւազանին ջուրերը ⁴ամբարեցիք,

Երուսաղէմի տուները համրեցիք, Ու պարիսպը ամրացնելու համար տուներ փլցուցիք։

Հին աւազանին ջուրերուն համար՝ Երկու պարիսպներուն մէջտեղ ջրակոյտ մը շինեցիք. Բայց զայն շինողը չտեսաք, Նախապէս զայն ձեւակերպողին ⁵ուշադրութիւն չդարձուցիք՝՝։

Այդ օրը զօրքերու Տէրը՝ Եհովան ձեզ կանչեց Լացի ու կոծի, Գլուխ կնտելու եւ ⁶քուրձ հագնելու՝՝.

Բայց ահա՛ բերկրանքի եւ ուրախութեան մէջ էք, Արջառներ կը սպաննէք ու ոչխարներ կը մորթէք, Միս կ’ուտէք եւ գինի կը խմէք՝ ըսելով. «Ուտենք ու խմենք, Որովհետեւ վաղը պիտի մեռնինք»։

Բայց զօրքերու Տէրոջմէն ⁷ինծի յայտնուեցաւ՝՝. «Անշուշտ այս անօրէնութիւնը ձեզի պիտի չքաւուի՝ Մինչեւ որ մեռնիք», Կ’ըսէ զօրքերու Տէրը՝ Եհովան։

ԱԶԴԱՐԱՐՈՒԹԻՒՆ ՄԸ ՍԵԲՆԱՅԻ

Զօրքերու Տէրը՝ Եհովան սա՛ ըսաւ. «Գնա՛, մտի՛ր այդ խնամատարին՝ Սեբնայի քով, Որ ⁸պալատին վրայ նշանակուած է, եւ ըսէ՛.

“Դուն հոս ի՞նչ ունիս, եւ հոս ո՞վ ունիս, Որ հոս քեզի գերեզման փորեցիր, Ինչպէս ան՝ որ իր գերեզմանը բարձր վայրի մէջ կը փորէ, Եւ իրեն բնակարան կը ⁹կառուցանէ ժայռի մէջ”։

Ահա՛ Տէրը քեզ ¹⁰ուժգնօրէն պիտի նետէ, Ու քեզ բոլորովին պիտի ծածկէ։

Անտարակոյս քեզ պիտի ծրարէ, քեզ գնդակի պէս պիտի ¹¹գլորէ Դէպի ընդարձակ երկիր մը. Դուն հոն պիտի մեռնիս Եւ փառքիդ կառքերը հոն պիտի մնան, Ո՛վ ¹²քու տիրոջդ տան անարգանքը։

Քու դիրքէդ քեզ պիտի քշեմ, Քու աստիճանէդ քեզ պիտի տապալեմ։

Այդ օրը պիտի կանչեմ իմ ծառաս, Քեղկիայի որդին՝ Եղիակիմը,

Քու պատմուճանդ իրեն պիտի հագցնեմ, Քու գօտիովդ զինք պիտի ուժովցնեմ, Եւ քու ղեկավարութիւնդ իր ձեռքը պիտի յանձնեմ. Ինք ալ Երուսաղէմի բնակիչներուն Ու Յուդայի տան հայր մը պիտի ըլլայ։

Դաւիթի տան բանալին Իր ուսին վրայ պիտի դնեմ. Երբ ինք բանայ՝ ո՛չ մէկը պիտի գոցէ, Երբ ինք գոցէ՝ ո՛չ մէկը պիտի բանայ։

Զինք հաստատ տեղ մը Բեւեռի պէս պիտի գամեմ, Եւ իր հօր տան՝ Փառաւոր գահ մը պիտի ըլլայ։

Իր հօր տան ամբողջ փառքը իր վրայ պիտի կախուի.— Շառաւիղներն ու ընձիւղները, Բոլոր պզտիկ անօթները, Տեսակ-տեսակ ¹³բաժակներէն մինչեւ ամէն տեսակ ¹⁴կարասները։

Այդ օրը,— կը պատգամէ զօրքերու Տէրը,— Հաստատ տեղը գամուած այդ բեւեռը պիտի ¹⁵հանուի, Պիտի կոտրի ու իյնայ, Եւ անոր վրայ եղած բեռը պիտի փճանայ», Որովհետեւ Տէրը խօսեցաւ։