Isaiah 23

Song of Solomon  «  Isaiah 22  ‹  Isaiah 23  ›  Isaiah 24  »  Jeremiah

ՊԱՏԳԱՄ ՓԻՒՆԻԿԷԻ ՄԱՍԻՆ

Տիւրոսի պատգամը.— Գոռացէ՛ք, ո՛վ Թարսիսի նաւեր, Քանի որ ան կործանեցաւ, հոն տուն կամ ¹դուռ չմնաց. Ասիկա Կիտացիներու երկրէն յայտնուեցաւ անոնց։

Ո՛վ ²ծովեզերքի բնակիչներ, լռեցէ՛ք. Ծովէն անցնող Սիդոնացիներու վաճառականները քեզ լեցուցեր էին։

Յորդառատ ջուրերու վրայէն փոխադրուող ³Սիովրի հունտերը, Գետին հունձքը անոր ⁴եկամուտն էին. Ան ազգերուն վաճառանոցն էր։

Ո՛վ Սիդոն, ամչցի՛ր, քանի որ ծովը կը խօսի. Ծովուն ⁵զօրութիւնը կը խօսի ու կ’ըսէ. «Ես երկունքի ցաւ քաշած չեմ եւ ծնանած չեմ. Երիտասարդներ սնուցանած չեմ ու կոյսեր մեծցուցած չեմ»։

Երբ այս լուրը Եգիպտացիներուն ականջը հասնի, Տիւրոսի լուրին համար պիտի սարսափին։

Թարսի՛ս անցէք, Գոռացէ՛ք, ո՛վ ծովեզերքի բնակիչներ.

Ա՞յս է ձեր հրճուալից քաղաքը, Որուն ⁶ծագումը վաղեմի օրերէն էր. Անոր ոտքերը զինք հեռու տեղ պիտի տանին՝ պանդխտանալու։

Ո՞վ ⁷տուաւ այս որոշումը՝՝ Տիւրոսի դէմ, Որ իր բնակիչները կը ⁸թագադրէր. Անոր վաճառականները իշխանաւորներ էին, Եւ ⁹առեւտրականները՝ երկրի պատուաւոր մարդիկը։

Զօրքերու Տէրը ¹⁰որոշեց ասիկա, Որպէսզի ամէն փառքի ամբարտաւանութիւնը աղարտէ, Ու երկրին բոլոր պատուաւորները անարգէ։

Գետի՛ պէս անցիր քու երկրէդ, Ո՛վ Թարսիսի աղջիկ. Ասկէ ետք ¹¹գօտի չկայ։

Իր ձեռքը ծովուն վրայ երկարեց, Թագաւորութիւնները սարսեց. Տէրը Քանանի դէմ պատուէր տուաւ, Որ անոր ամրոցները քանդեն.

Եւ ըսաւ. «Դուն անգա՛մ մըն ալ պիտի չհրճուիս, Ո՛վ Սիդոնի անարգուած կոյս. Կանգնէ՛, Կիտի՛մ անցիր, Բայց հոն ալ պիտի չհանգստանաս»։

Ահա՛ Քաղդէացիներու երկիրը, Որ ժամանակին ժողովուրդ չէր, Ասորեստանցինե՛րը հիմնեցին զայն՝ անապատի բնակիչներուն համար. Անոր աշտարակները կանգնեցուցին, անոր պալատները ¹²կառուցանեցին, Բայց հիմա զայն աւերակի ¹³վերածեց։

Գոռացէ՛ք, ո՛վ Թարսիսի նաւեր, Որովհետեւ ձեր ամրոցը կործանեցաւ։

Այդ օրը Տիւրոս մոռցուած պիտի մնայ եօթանասուն տարի, Մէկ թագաւորի օրերուն չափ։ Եօթանասուն տարուան վախճանին՝ Երգ մը պիտի երգեն Տիւրոսի, պոռնիկի երգին պէս.

«Ո՛վ մոռցուած պոռնիկ, քնա՛րը առ Ու շրջէ՛ քաղաքին մէջ. Լա՛ւ նուագէ, ¹⁴շատցո՛ւր երգերդ՝՝, Որպէսզի քեզ յիշեն»։

Եօթանասուն տարուան վախճանին՝ Տէրը պիտի այցելէ Տիւրոսի, Եւ ան իր վարձատրութեան պիտի վերադառնայ. Երկրագունդի մակերեսին վրայ եղող երկրի բոլոր թագաւորութիւններուն հետ Պիտի պոռնկի։

Անոր ¹⁵վաճառականութեան վարձատրութիւնը՝՝ Տէրոջ պիտի ¹⁶ընծայուի. Ան պիտի չկուտակուի ու չամբարուի, Հապա անոր վաճառականութեան վարձատրութիւնը Տէրոջ առջեւ բնակողներուն պիտի ըլլայ, Որպէսզի ուտեն եւ կշտանան, Ու երկարատեւ ¹⁷հանդերձներ հագնին։