Isaiah 27

Song of Solomon  «  Isaiah 26  ‹  Isaiah 27  ›  Isaiah 28  »  Jeremiah

Այդ օրը Տէրը իր ամրակուռ, մեծ եւ ուժեղ սուրով Պիտի ¹պատժէ ²Լեւիաթանը՝ փախչող օձը, Լեւիաթանը՝ այն գալարուող օձը, Ու պիտի մեռցնէ ծովուն մէջ եղող Վիշապը։

Այդ օրը ³գինիի այգիին մասին ⁴խմբերգեցէ՛ք.

«Ես՝ Տէրս, կը խնամեմ զայն. Ամէն վայրկեան պիտի ⁵ոռոգեմ զայն, Գիշեր ու ցերեկ զայն պիտի պահպանեմ, Որպէսզի ո՛չ մէկը անոր ⁶վնասէ։

Իմ մէջս ցասում չկայ. Երանի՜ թէ ցախերն ու փուշերը ինծի դէմ պատերազմի ⁷շարուէին. Ես անոնց դէմ կը քալէի, Ու զանոնք միասին կ’այրէի։

Թէ ոչ՝ թող իմ ⁸զօրութեանս ⁹ապաւինին, Թող ինծի հետ խաղաղութիւն ընեն. Թող ինծի հետ խաղաղութիւն ընեն»։

Ապագային Յակոբ պիտի արմատանայ, Իսրայէլ պիտի ընձիւղի եւ ծաղկի, Ու պտուղով երկրագունդի մակերեսը պիտի լեցնէ։

Միթէ Տէրը զայն զարնողներուն հարուածի՞ն պէս զարկաւ զայն, Կամ իրմէ սպաննուածներուն ջարդի՞ն պէս սպաննուեցաւ։

Չափաւորութեամբ անոր ¹⁰հետ վիճեցար՝՝ Երբ զայն վտարեցիր, Թէեւ սաստիկ հովով վերցուցիր արեւելեան հովին օրը։

Ուստի Յակոբի անօրէնութիւնը ¹¹ասով պիտի քաւուի, Անոր մեղքին ջնջուելուն ամբողջ պտուղը սա՛ պիտի ըլլայ.— Երբ բագիններուն բոլոր քարերը կիրի փշրուած քարերու ¹²վերածէ, Աստարովթներն ու արեւի սիւնարձանները ա՛լ պիտի չկանգնին։

Արդարեւ պարսպապատ քաղաքը ամայի պիտի ըլլայ, Բնակուած տեղը պիտի ¹³թողուի եւ անապատի պէս լքուի. Զուարակը հո՛ն պիտի արածի ու հո՛ն պառկի, Եւ անոր ճիւղերը պիտի ¹⁴հատցնէ։

Անոր ոստերը չորնալով պիտի կոտրին, Կիները պիտի գան ու զանոնք պիտի բռնկեցնեն։ Արդարեւ ան խելացի ժողովուրդ չէ, Ուստի զայն ¹⁵ստեղծողը անոր վրայ պիտի չգթայ, Ու զայն ձեւակերպողը անոր պիտի չողորմի։

Այդ օրը՝ Տէրը Գետին հոսանքէն մինչեւ Եգիպտոսի վտակը պիտի կամնէ, Եւ դո՛ւք, ո՛վ Իսրայէլի որդիներ, Մէկ առ մէկ պիտի հաւաքուիք։

Այդ օրը մեծ շեփորը պիտի հնչեցնեն, Եւ Ասորեստանի երկրին մէջ եղող ¹⁶թափառականները, Նաեւ Եգիպտոսի երկրին մէջ եղող աքսորականները պիտի գան Ու Երուսաղէմ՝ սուրբ լերան վրայ Տէրոջ պիտի երկրպագեն։