Isaiah 28

Song of Solomon  «  Isaiah 27  ‹  Isaiah 28  ›  Isaiah 29  »  Jeremiah

ԱԶԴԱՐԱՐՈՒԹԻՒՆ ՀԻՒՍԻՍԱՅԻՆ ԹԱԳԱՒՈՐՈՒԹԵԱՆ

Վա՜յ Եփրեմի գինովներուն ամբարտաւանութեան պսակին, Որուն փառաւոր ¹զարդը թառամած ծաղիկ մըն է՝ Գինիով ²թմրածներուն բերրի հովիտին գագաթը։

Ահա՛ Տէրոջ կողմէն քաջ եւ ուժեղ թշնամի մը, Կարկուտի հեղեղի պէս, աւերիչ մրրիկի պէս, Ու հզօր ջուրերու յորդահոս հեղեղի պէս, Ձեռքովը գետին պիտի ³զարնէ զանոնք։

Եփրեմի գինովներուն ամբարտաւանութեան պսակը Ոտքերով պիտի կոխկռտուի,

Եւ բերրի հովիտին գագաթը եղող անոր փառաւոր զարդը, Որ թառամած ծաղիկ մըն է, Ամառէն առաջ վաղահաս թուզի պէս պիտի ըլլայ, Որ տեսնողը՝ երբ ձեռքը առնէ՝ անմիջապէս զայն կը կլլէ։

Այդ օրը զօրքերու Տէրը՝ իր ժողովուրդին մնացորդին Փառաւոր պսակ ու շքեղ թագ պիտի ըլլայ,

Եւ ⁴դատելու նստողին՝ ⁵արդարութեան ոգի, Ու պատերազմը դէպի թշնամիին դուռը ⁶մղողներուն՝ զօրութիւն։

ԵՍԱՅԻ ԵՒ ՅՈՒԴԱՅԻ ԳԻՆՈՎ ՄԱՐԳԱՐԷՆԵՐԸ

Բայց ասոնք ալ գինիով կը մոլորին Եւ օղիով կը դեդեւին։ Քահանան ու մարգարէն օղիով կը մոլորին. Անոնք գինիէն ⁷կ’ընկղմին, օղիէն կը դեդեւին, Տեսիլքի մէջ կը մոլորին ու դատաստանի մէջ ⁸կ’երերան.

Արդարեւ անոնց բոլոր սեղանները աղտոտ փսխունքով ⁹ծածկուած են, Այնպէս որ մաքուր տեղ մը չկայ։

Որո՞ւ գիտութիւն սորվեցնէ, Որո՞ւ ¹⁰խրատ հասկցնէ. Կաթէ կտրուածներո՞ւն, Ծիծէ զատուածներո՞ւն.

Որովհետեւ պատուէր պատուէրի վրայ, պատուէր պատուէրի վրայ կը տրուի, ¹¹Հրաման հրամանի վրայ, հրաման հրամանի վրայ, Քիչ մը հոս, քիչ մը հոն։

Արդարեւ թոթովախօս շրթունքով եւ օտար լեզուով Պիտի խօսի այս ժողովուրդին,

Որուն ըսած էր. «Ահա՛ւասիկ հանգստավայրը, հանգստացուցէ՛ք պարտասածը. Ահա՛ւասիկ կազդոյրը»։ Բայց անոնք չուզեցին մտիկ ընել։

Ուստի Տէրոջ խօսքը անոնց պիտի ըլլայ Պատուէր՝ պատուէրի վրայ, պատուէր՝ պատուէրի վրայ, Հրաման՝ հրամանի վրայ, հրաման՝ հրամանի վրայ, Քիչ մը հոս, քիչ մը հոն. Որպէսզի երթան, կռնակի վրայ ¹²իյնան ու ջախջախուին, Եւ որոգայթի մէջ իյնալով բռնուին։

ՍԻՈՆԻ ՀԱՄԱՐ ԱՆԿԻՒՆԱՔԱՐ ՄԸ

Ուրեմն մտի՛կ ըրէք Տէրոջ խօսքը, Ո՛վ ծաղրող մարդիկ, Որ Երուսաղէմի մէջ բնակող այս ժողովուրդին վրայ կը տիրէք,

Որովհետեւ ըսիք. «Մենք մահուան հետ ուխտ կնքեցինք, Ու ¹³դժոխքին հետ դաշնակցեցանք, Որ եթէ յորդահոս ¹⁴հեղեղը ասկէ անցնի՝ մեր վրայ չգայ. Արդարեւ ստութիւնը մեզի ¹⁵ապաստանարան ըրինք, Եւ կեղծիքի մէջ պահուըտեցանք»։

Հետեւաբար Տէրը՝ Եհովան սա՛ կը յայտարարէ. «Ահա՛ ես Սիոնի մէջ քար մը կը դնեմ իբր հիմ, ¹⁶Ընտիր քար մը, պատուական անկիւնի քար մը, ¹⁷հաստատուն հիմ մը. “Ո՛վ որ հաւատայ անոր, պիտի չարտորայ փախչելու”։

Իրաւունքը լար պիտի ընեմ, Եւ արդարութիւնը՝ հարթաչափ. Կարկուտը պիտի քշէ տանի ստութեան ապաստանարանը, Ու ջուրերը պիտի ողողեն ¹⁸պատսպարանը։

Մահուան հետ ձեր կնքած ուխտը պիտի ջնջուի, Եւ դժոխքին հետ ձեր դաշնակցութիւնը պիտի չհաստատուի։ Երբ յորդահոս ¹⁹հեղեղը ասկէ անցնի, Դուք անկէ պիտի կոխկռտուիք.

Անցնելու ատեն ձեզ պիտի առնէ տանի, Քանի որ ամէն առտու պիտի անցնի, ցերեկ ու գիշեր, Եւ անոր լուրը ²⁰լսելն անգամ սոսկումի պիտի մատնէ»։

Արդարեւ անկողինը կարճ է՝ ընկողմանելու համար, Ու ծածկոցը նեղ է՝ փաթթուելու համար.

Որովհետեւ Տէրը պիտի կանգնի, ինչպէս Փարասին լերան վրայ կանգնեցաւ, Եւ պիտի ²¹վրդովի, ինչպէս Գաբաւոնի հովիտին մէջ բարկացաւ, Որպէսզի իր գործը, իր օտարոտի գործը ընէ, Եւ իր պաշտօնը, իր օտարոտի պաշտօնը կատարէ։

Հիմա ծաղրող մի՛ ըլլաք, Որպէսզի ձեր կապերը աւելի ²²չսեղմեն. Քանի որ զօրքերու Տէրոջմէն՝ Եհովայէն լսեցի ²³Բնաջնջումի վճիռ մը ամբողջ երկրին վրայ։

ԱՍՏՈՒԾՈՅ ԻՄԱՍՏՈՒԹԻՒՆԸ

Ունկնդրեցէ՛ք, եւ ձա՛յնս լսեցէք. Ուշադի՛ր եղէք, ու խօ՛սքս լսեցէք։

Միթէ հերկողը սերմանելու համար ²⁴միշտ կը հերկէ՞. Միշտ իր հողը կը բանա՞յ եւ կը տափանէ՞.

Անոր մակերեսը հարթելէն ետք՝ Միթէ արջնդեղը չի տարածեր ու չամանը չի՞ ցաներ, Ցորենը կարգով չի՞ դներ, գարին՝ որոշուած տեղը, Եւ հաճարը՝ եզերքները։

Արդարեւ իր Աստուածը կը խրատէ զինք, Ու կը սորվեցնէ կերպը.

Քանի որ արջնդեղը ցաքանով չի ծեծուիր, Եւ չամանին վրայ սայլին անիւը չի դառնար. Հապա արջնդեղը գաւազանով կը կամնուի, Ու չամանը՝ ցուպով։

Հացին ցորենը կը մանրէ, Բայց զայն միշտ չի ծեծեր. Սայլին անիւը զայն չի փշրեր, Եւ ²⁵ձիերը զայն չեն մանրեր։

Ա՛յս ալ զօրքերու Տէրոջմէն ²⁶կու գայ՝՝, Որուն խորհուրդը սքանչելի է, Եւ անոր խոհականութիւնը՝ ²⁷գերազանց։