Isaiah 31

Song of Solomon  «  Isaiah 30  ‹  Isaiah 31  ›  Isaiah 32  »  Jeremiah

ԱՍՏՈՒԱԾ ՊԻՏԻ ՊԱՇՏՊԱՆԷ ԵՐՈՒՍԱՂԷՄԸ

Վա՜յ անոնց՝ որ օգնութեան համար Եգիպտոս կ’իջնեն. Ձիերու ¹կ’ապաւինին ու կառքերու կը վստահին՝ որովհետեւ շատ են, Նաեւ ձիաւորներու՝ որովհետեւ յոյժ ²հզօր են, Սակայն իրենց նայուածքը Իսրայէլի Սուրբին չեն դարձներ, Ու Տէրը չեն փնտռեր։

Բայց ինք ալ իմաստուն է. ձախորդութիւն կը բերէ, Իր խօսքերը զանց չ’ըներ. Չարերուն տան դէմ պիտի կանգնի, Եւ անօրէնութիւն գործողներուն օգնութեան դէմ։

Եգիպտացիները մարդ են, ո՛չ թէ Աստուած. Անոնց ձիերը մարմին են, ո՛չ թէ հոգի։ Երբ Տէրը իր ձեռքը երկարէ՝ Թէ՛ օգնողը պիտի գայթի, Թէ՛ օգնութիւն ստացողը պիտի իյնայ, Եւ բոլորը միասին պիտի ³կորսուին։

Արդարեւ Տէրը ինծի սա՛ ըսաւ. «Ինչպէս առիւծը կամ կորիւնը իր որսին համար կը ⁴մռնչէ, Ու երբ հովիւներուն ⁵բազմութիւնը անոր դէմ ⁶համախմբուի՝ Անոնց ձայնէն չի զարհուրիր, Եւ անոնց դղրդիւնէն չի հպատակիր, Այնպէս ալ զօրքերու Տէրը Սիոն լերան համար Ու անոր բլուրին համար պատերազմելու պիտի իջնէ։

Ինչպէս թռչնազգիները իրենց ձագերուն վրայ իրենց թեւերը կը տարածեն, Այնպէս զօրքերու Տէրը Երուսաղէմը պիտի պաշտպանէ. Զայն պաշտպանելով պիտի ազատէ, Անոր ⁷վրայէն անցնելով՝՝ պիտի փրկէ»։

Իսրայէլի որդինե՛ր, վերադարձէ՛ք այն Աստուծոյն՝ Որուն դէմ ⁸չափազանց ապստամբեցաք.

Արդարեւ այդ օրը ամէն մարդ պիտի մերժէ Իր արծաթէ չաստուածներն ու ոսկիէ չաստուածները, Որոնք ձեր մեղաւոր ձեռքերը շինեցին ձեզի։

«Ասորեստանցին սուրով պիտի իյնայ, բայց ո՛չ թէ ազնուական մարդու սուրով. Այն սուրը որ զինք պիտի սպառէ՝ ռամիկ մարդու չէ։ Ան սուրէն պիտի փախչի, Եւ անոր երիտասարդները հարկատու պիտի ըլլան։

⁹Իր ժայռը երկիւղէն պիտի հեռանայ՝՝, Եւ անոր իշխանաւորները դրօշակէն պիտի զարհուրին», Կը պատգամէ Տէրը, որուն կրակը Սիոնի մէջ է, Ու փուռը՝ Երուսաղէմի մէջ։