Isaiah 35

Song of Solomon  «  Isaiah 34  ‹  Isaiah 35  ›  Isaiah 36  »  Jeremiah

ՍՐԲՈՒԹԵԱՆ ՃԱՄԲԱՆ

Անապատն ու տափաստանը ¹պիտի բերկրին, Եւ անբնակ երկիրը պիտի խայտայ ու նարկիսի պէս պիտի ծաղկի։

Ան բոլորովին պիտի ծաղկի, Եւ խայտալով ու ցնծութեամբ պիտի ուրախանայ։ Անոր պիտի տրուի Լիբանանի փառքը, Կարմեղոսի եւ Սարոնի վայելչութիւնը. Անոնք պիտի տեսնեն Տէրոջ փառքը, Մեր Աստուծոյն վայելչութիւնը։

Թուլցած ձեռքերը ուժովցուցէ՛ք, Ու ²դողդոջուն ծունկերը զօրացուցէ՛ք։

³Այլայլած սիրտ ունեցողներուն ըսէ՛ք. «Ուժովցէ՛ք, մի՛ վախնաք. Ահա՛ ձեր Աստուածը վրէժխնդրութեամբ Եւ Աստուծոյ վարձատրութեամբ պիտի գայ. Ան պիտի գայ ու ձեզ ազատէ»։

Այն ատեն կոյրերուն աչքերը պիտի բացուին, Եւ խուլերուն ականջները պիտի բացուին։

Այն ատեն կաղը երջերուի պէս պիտի ոստնու, Ու համրին լեզուն պիտի օրհներգէ, Քանի որ անապատին մէջ ջուրեր պիտի ժայթքեն, Եւ անբնակ երկրին մէջ՝ վտակներ։

Խորշակահար երկիրը լիճի պիտի վերածուի, Ու ծարաւուտ երկիրը՝ ջուրի աղբիւրներու. Շնագայլերուն պառկած բնակարանը Խոտ, եղէգ եւ պրտու պիտի բուսցնէ։

Հոն պողոտայ ու ճամբայ պիտի ըլլայ, Եւ ան Սրբութեան պողոտայ պիտի կոչուի։ Անկէ անմաքուր մէկը պիտի չանցնի, Հապա ան միայն անոնց համար պիտի ըլլայ. Այդ ճամբայէն գացողները — մինչեւ անգամ յիմարները — պիտի չմոլորին։

Հոն առիւծ պիտի չըլլայ, Անոր վրայ պատառող գազան պիտի չբարձրանայ Ու հոն պիտի չգտնուի, Հապա փրկուածները հոն պիտի քալեն։

Տէրոջ ազատածները պիտի վերադառնան, Ցնծերգերով Սիոն պիտի գան, Ու անոնց գլուխին վրայ յաւիտենական ուրախութիւն պիտի ըլլայ. Անոնք բերկրանք եւ ուրախութիւն պիտի ստանան, Տրտմութիւնն ու հառաչանքը անոնցմէ պիտի ⁴հեռանան։