Isaiah 39

Song of Solomon  «  Isaiah 38  ‹  Isaiah 39  ›  Isaiah 40  »  Jeremiah

ԲԱԲԵԼՈՆԻ ՊԱՏԳԱՄԱՒՈՐՆԵՐԸ (Դ. Թագ. 20. 12-19)

Այդ ատեն Բաբելոնի թագաւորը, Բաղադանի որդին՝ Մարովդաք-Բաղադան, ¹նամակներ եւ ընծաներ ղրկեց Եզեկիայի, քանի որ անոր հիւանդանալն ու առողջանալը լսեր էր։

Եզեկիա ատոնց համար ուրախացաւ, եւ ցուցուց իր թանկարժէք առարկաներուն ²գանձատունը, — արծաթը, ոսկին, բուրաւէտ համեմներն ու ³հոտաւէտ իւղը —, իր ամբողջ ⁴զինանոցը եւ ամէն ինչ որ իր գանձերուն մէջ կը գտնուէր։ Ոչինչ մնաց իր տան մէջ եւ իր ամբողջ տէրութեան մէջ, որ Եզեկիա անոնց չցուցուց։

Եսայի մարգարէն Եզեկիա թագաւորին եկաւ եւ անոր ըսաւ. «Այդ մարդիկը ի՞նչ ըսին. ուրկէ՞ եկան քեզի»։ Եզեկիա պատասխանեց. «Ինծի հեռաւոր տեղէ՝ Բաբելոնէն եկան»։

Ան ըսաւ. «Քու տանդ մէջ ի՞նչ տեսան»։ Եզեկիա պատասխանեց. «Տանս մէջ ինչ որ կար՝ տեսան. գանձերուս մէջ ոչինչ ⁵մնաց՝ որ անոնց չցուցուցի»։

Այն ատեն Եսայի Եզեկիայի ըսաւ. «Զօրքերու Տէրոջ խօսքը մտի՛կ ըրէ.

“Ահա՛ օրերը կու գան, երբ ամէն ինչ որ տանդ մէջ կայ եւ ինչ որ քու հայրերդ մինչեւ այսօր կուտակած են՝ Բաբելոն պիտի տարուին. ոչինչ պիտի մնայ,— կը յայտարարէ Տէրը։—

Նաեւ որդիներէդ՝ որ քեզմէ պիտի ելլեն, որ դուն պիտի ծնանիս, պիտի բռնեն, եւ անոնք Բաբելոնի թագաւորին պալատին մէջ ներքինի պիտի ըլլան”»։

Եզեկիա Եսայիի պատասխանեց. «Տէրոջ խօսքը, որ դուն ըսիր, ⁶նպաստաւոր է»։ Յետոյ ըսաւ. «Որովհետեւ իմ օրերուս մէջ խաղաղութիւն եւ ⁷ապահովութիւն պիտի ըլլայ»։