Isaiah 45

Song of Solomon  «  Isaiah 44  ‹  Isaiah 45  ›  Isaiah 46  »  Jeremiah

ՏԷՐԸ ԿԸ ՆՇԱՆԱԿԷ ԿԻՒՐՈՍԸ

Սա՛ կը յայտարարէ Տէրը իր օծեալին՝ Կիւրոսի, Որուն աջ ձեռքը բռնեցի՝ Որպէսզի ազգերը անոր ենթարկեմ, Թագաւորներուն մէջքը ¹թուլցնեմ, Անոր առջեւ երկու փեղկերը բացուին, Ու դռները բնաւ չգոցուին.

«Ես քու առջեւէդ պիտի երթամ, ²Խորտուբորտ տեղերը՝՝ պիտի շտկեմ, Պղինձէ դռները պիտի փշրեմ, Երկաթէ նիգերը պիտի կոտրտեմ,

Եւ խաւարին գանձերը Ու ծածուկ տեղերու հարստութիւնները քեզի պիտի տամ, Որպէսզի գիտնաս թէ ե՛ս եմ Տէրը, Իսրայէլի Աստուածը, որ քեզ անունովդ կը կանչեմ։

Իմ ծառայիս՝ Յակոբի սիրոյն համար, Եւ իմ ընտրեալիս՝ Իսրայէլի համար Քեզ քու անունովդ կանչեցի. Քեզ մականուանեցի՝ թէեւ զիս չէիր ճանչնար։

Ե՛ս եմ Տէրը, եւ ուրիշ մը չկայ. Ինձմէ զատ Աստուած չկայ։ Ես քեզ գօտեւորեցի՝ թէեւ զիս չէիր ճանչնար,

Որպէսզի արեւելքէն եւ արեւմուտքէն գիտնան Թէ ինձմէ զատ ո՛չ մէկը կայ. Ե՛ս եմ Տէրը, ուրիշ մը չկայ։

Լոյսը ձեւակերպողը եւ խաւարը ստեղծողը, ³Բարօրութիւն տուողն՝՝ ու ձախորդութիւնը ստեղծողը, Այս բոլոր բաները ընողը ե՛ս եմ՝ Տէրը։

Ո՛վ երկինք, ցօ՛ղ կաթեցուր վերէն, Եւ նօսր ամպերը արդարութիւն թող հոսեցնեն։ Երկիրը թող բացուի ու փրկութիւն ⁴աճեցնէ, Ու միաժամանակ արդարութիւն բուսնի։ Ասոնք ստեղծողը ե՛ս եմ՝ Տէրը»։

ՍՏԵՂԾԱԳՈՐԾՈՒԹԵԱՆ ԵՒ ՊԱՏՄՈՒԹԵԱՆ ՏԷՐԸ

«Վա՜յ անոր՝ որ իր ⁵Արարիչին հետ կը վիճի, Թէեւ ինք ⁶գետինի ⁷խեցիներուն պէս խեցի մըն է՝՝. Միթէ կաւը զինք ձեւակերպողին կ’ըսէ՞. “Ի՞նչ կ’ընես”, Կամ քու գործդ քեզի կ’ըսէ՞. “Ձեռք ⁸չունիս”։

Վա՜յ անոր՝ որ իր հօր կ’ըսէ. “Ի՞նչ ծնար”, Կամ ⁹իր մօր՝՝. “Ի՞նչ երկնեցիր”»։

Սա՛ կը յայտարարէ Տէրը՝ Իսրայէլի Սուրբը եւ անոր Արարիչը. «Ինծի՛ հարցուցէք գալիքին մասին. Ինծի՞ պիտի հրամայէք Իմ որդիներուս համար, ու ձեռքերուս գործերուն համար։

Ե՛ս շինեցի երկիրը, Եւ անոր վրայ ստեղծեցի մարդը. Ե՛ս եմ, իմ ձեռքերս են որ սփռեցին երկինքը, Ու հրամայեցի անոր ամբողջ զօրքին։

Ե՛ս ¹⁰զինք արդարութեամբ արթնցուցի Եւ իր բոլոր ճամբաները պիտի ¹¹ուղղեմ։ Ան իմ քաղաքս պիտի կառուցանէ, Ու տարագիրներս ազատ արձակէ՝ Առանց ¹²հատուցումի, ո՛չ ալ ¹³վարձատրութեան», Կ’ըսէ զօրքերու Տէրը։

Տէրը սա՛ կը յայտարարէ. «Եգիպտոսի վաստակը, Եթովպիացիներուն եւ երկայնահասակ Սաբայեցիներուն ¹⁴շահը Քեզի պիտի անցնին ու քուկդ պիտի ըլլան։ Անոնք քու ետեւէդ պիտի քալեն. Շղթաներով պիտի անցնին, Քեզի երկրպագելով՝ Քեզի պիտի ¹⁵աղաչեն եւ ըսեն. “Միայն քո՛ւ մէջդ Աստուած կայ. Ուրիշ ո՛չ մէկը կայ, անկէ զատ Աստուած չկայ”»։

Ի՛րապէս դուն քեզ ծածկող Աստուած մըն ես, Ո՛վ Իսրայէլի փրկիչ Աստուածը։

Անոնք բոլորը պիտի ամչնան ու խայտառակուին. ¹⁶Կուռք շինողները՝՝ միասին նախատինքով պիտի երթան։

Իսրայէլ յաւիտենական փրկութեամբ պիտի փրկուի Տէրոջմէն. Դուք ¹⁷յաւերժ պիտի չամչնաք եւ չխայտառակուիք։

Արդարեւ սա՛ կը յայտարարէ երկինքը ստեղծող Տէրը, Այն Աստուածը՝ որ երկիրը ձեւակերպեց, Զայն շինեց ու հաստատեց. Զայն ¹⁸զուր տեղը՝՝ չստեղծեց, Հապա բնակութեան համար ձեւակերպեց։ «Ե՛ս եմ Տէրը, ուրիշ մը չկայ։

Ես ծածկաբար չխօսեցայ՝ երկրի խաւար տեղի մը մէջ. Յակոբի զարմին չըսի. “Զո՛ւր տեղը զիս փնտռեցէք”. Ես՝ Տէրս, արդարութիւն կը խօսիմ Եւ ուղղամտութիւն կը յայտարարեմ»։

ԱՇԽԱՐՀԻ ՏԷՐԸ ԵՒ ԲԱԲԵԼՈՆԻ ԿՈՒՌՔԵՐԸ

«Հաւաքուեցէ՛ք ու եկէ՛ք, Միասին մօտեցէ՛ք, ո՛վ ազգերէն ազատածներ։ Գիտակից չեն անոնք՝ որ իրենց ¹⁹փայտէ կուռք կը կանգնեցնեն՝՝, Եւ ²⁰փրկելու անկարող՝՝ աստուծոյ մը կ’աղօթեն։

Յայտարարեցէ՛ք ու մօտեցուցէ՛ք զանոնք. Միասին թող խորհրդակցին։ Ո՞վ ասիկա վաղուց իմացուց, Այն ատենէն ո՞վ ²¹ծանուցանեց. Միթէ ես՝ Տէրս չե՞մ։ Ինձմէ զատ ուրիշ Աստուած չկայ, Ինձմէ ուրիշ արդար Աստուած ու Փրկիչ չկայ։

Ո՛վ երկրի բոլոր ծայրերը, ինծի՛ նայեցէք՝ որպէսզի փրկուիք, Քանի որ ե՛ս Աստուած եմ, եւ ուրիշ մը չկայ։

²²Իմ անձիս վրայ՝՝ երդում ըրի, Իմ բերանէս արդարութեան խօսք ելաւ, ու պիտի ²³չխափանուի. “Ամէն ծունկ իմ առջեւս պիտի կքի, Եւ ամէն լեզու ինձմով երդում պիտի ընէ”։

Պիտի ըսուի. “Միայն Տէրոջմով արդարութիւն ու զօրութիւն ունիմ”։ Մարդիկ անոր պիտի գան, Եւ անոր դէմ բոլոր բորբոքողները պիտի ամչնան։

Իսրայէլի ամբողջ զարմը Տէրոջմով պիտի արդարանայ ու պարծենայ»։