Isaiah 46

Song of Solomon  «  Isaiah 45  ‹  Isaiah 46  ›  Isaiah 47  »  Jeremiah

Բէլ կքեցաւ, Նաբաւ ծռեցաւ. Անոնց կուռքերը կենդանիներու եւ անասուններու վրայ էին։ Ձեր կրած բեռները Պարտասած անասունին ծանրութիւն եղան։

Անոնք ծռեցան, միասին կքեցան. Չկրցան բեռը ազատել, Եւ իրենք ալ գերութեան գացին։

«Ինծի՛ մտիկ ըրէք, ո՛վ Յակոբի տունը, Իսրայէլի տան ամբողջ մնացորդը, Որ որովայնէն ի վեր կը շալկեմ եւ արգանդէն ի վեր կը կրեմ.

Մինչեւ ձեր ծերութիւնը ես նոյնն եմ, Մինչեւ ձեր ալեւորութիւնը ես ձեզ պիտի կրեմ. Ե՛ս ¹ստեղծեցի ու ե՛ս պիտի վերցնեմ, Ե՛ս պիտի կրեմ եւ ձեզ ազատեմ։

Զիս որո՞ւ կը նմանցնէք ու կը հաւասարեցնէք. Զիս որո՞ւ կը բաղդատէք, որ նման ըլլանք։

²Քսակէն ոսկի կը թափեն ու կշիռքով արծաթ կը կշռեն, ³Ձուլագործ կը վարձեն՝ որ անով աստուած շինէ, Զայն կը պաշտեն եւ անոր կ’երկրպագեն։

Զայն ուսերու վրայ կը վերցնեն, կը կրեն, Իր տեղը կը հաստատեն, ու կը կայնի։ Ան իր տեղէն չի հեռանար. Եթէ մէկը անոր աղաղակէ՝ չի պատասխաներ, Զայն իր տագնապէն չ’ազատեր։

Յիշեցէ՛ք ասիկա, ու մա՛րդ եղէք. ⁴Մտածեցէ՛ք, ո՛վ յանցաւորներ։

Յիշեցէ՛ք հնադարեան ⁵նախկին բաները, Քանի որ ե՛ս Աստուած եմ, եւ ինձմէ ուրիշը չկայ. Ե՛ս Աստուած եմ, եւ ո՛չ մէկը ինծի նման է.

Ես սկիզբէ՛ն կը յայտնեմ վերջաւորութիւնը, ⁶Առաջուընէ կ’իմացնեմ դեռ չկատարուածը, Ու կ’ըսեմ. “Իմ որոշումս պիտի հաստատուի, Եւ ամբողջ փափաքս պիտի իրագործեմ”։

Ե՛ս եմ որ արեւելքէն գիշատիչ թռչունը կը կանչեմ, Ու հեռաւոր երկրէն՝ իմ որոշումս գործադրող մարդը։ Ե՛ս խօսեցայ, ու պիտի իրագործեմ. Ե՛ս ⁷ծրագրեցի, եւ պիտի կատարեմ։

Ո՛վ արդարութենէ հեռացած ⁸խստասիրտներ, Ինծի՛ մտիկ ըրէք.

Իմ արդարութիւնս մօտեցուցի, Ան պիտի չհեռանայ. Իմ փրկութիւնս պիտի չուշանայ. Սիոնի մէջ փրկութիւն պիտի տամ, ⁹Իմ ¹⁰փառքիս՝ Իսրայէլի համար՝՝»։