Isaiah 48

Song of Solomon  «  Isaiah 47  ‹  Isaiah 48  ›  Isaiah 49  »  Jeremiah

ԱՍՏՈՒԱԾ ԱՊԱԳԱՅԻՆ ՏԷՐՆ Է

Լսեցէ՛ք ասիկա, ո՛վ Յակոբի տունը, Դո՛ւք՝ որ Իսրայէլի անունով կոչուած էք, Յուդայի ¹աղբիւրէն ելեր էք, Տէրոջ անունով երդում կ’ընէք Եւ Իսրայէլի Աստուածը կը յիշատակէք, Բայց ո՛չ ճշմարտութեամբ է, ո՛չ ալ արդարութեամբ։

(Արդարեւ իրենք զիրենք Սուրբ քաղաքին բնակիչները կը կոչեն, Եւ Իսրայէլի Աստուծոյն կը յենին, Որուն անունը ²Զօրքերու Տէր՝՝ է։)

³Առաջին բաները վաղուց յայտնեցի. Անոնք իմ բերանէս ելան, ու զանոնք իմացուցի. Զանոնք յանկարծ ըրի, եւ իրագործուեցան։

Քանի գիտէի թէ դուն խստասիրտ ես, Ծոծրակդ երկաթէ ջիղեր ունի, Ու ճակատդ պղինձէ է,

Քեզի վաղուց յայտնեցի, Դեռ չիրագործուած քեզի իմացուցի, Որ չըսես. «Զանոնք իմ կուռքս ըրաւ, Եւ իմ քանդակուած ու ⁴ձուլածոյ կուռքս՝՝ հրամայեց»։

Դուն զանոնք լսեցիր. նայէ՛, անոնք բոլորը կատարուեցան. Միթէ դուք ալ զանոնք պիտի չյայտարարէ՞ք։ Հիմա քեզի նոր բաներ կ’իմացնեմ, Պահուած բաներ՝ որ չէիր գիտեր.

Անոնք հիմա ստեղծուեցան, եւ ո՛չ թէ վաղուց. ⁵Ասկէ առաջ զանոնք չես լսած, Որ չըսես. “Ահա՛ զանոնք գիտէի”։

Դուն ո՛չ լսեցիր, ո՛չ գիտցար, Ո՛չ ալ ⁶սկիզբէն ականջդ բացուեցաւ. Որովհետեւ գիտէի թէ դուն ⁷չափազանց անհաւատարիմ ես, Եւ թէ “⁸որովայնէն ապստամբ” կոչուեցար։

Ես իմ անունիս համար բարկութիւնս պիտի յետաձգեմ, Իմ գովաբանութեանս համար զիս պիտի ⁹զսպեմ քեզի հանդէպ, Որպէսզի քեզ չբնաջնջեմ։

Ահա՛ քեզ զտեցի, բայց ո՛չ թէ ¹⁰արծաթի պէս՝՝. Քեզ տառապանքի քուրային մէջ ¹¹փորձարկեցի։

Ասիկա ինծի՛ համար, ինծի՛ համար պիտի ընեմ. Արդարեւ ի՞նչպէս արտօնեմ որ անունս աղարտուի. Ես իմ փառքս ուրիշի չեմ տար։

ԿԻՒՐՈՍ՝ ՏԷՐՈՋ ԸՆՏՐԱԾ ԱՌԱՋՆՈՐԴԸ

Ինծի՛ մտիկ ըրէ, ո՛վ Յակոբ, եւ Իսրայէլ՝ իմ կանչածս։ Ես նոյնն եմ. Ե՛ս եմ առաջինը, ու ե՛ս եմ վերջինը։

Նաեւ ի՛մ ձեռքս հիմնադրեց երկիրը, Եւ ի՛մ աջ ձեռքս տարածեց երկինքը. Երբ զանոնք կանչեմ, Միասին ¹²կը ներկայանան՝՝։

Հաւաքուեցէ՛ք դուք բոլորդ, ու մտի՛կ ըրէք. Անոնցմէ ո՞վ յայտնեց այս բաները։ Տէրոջ սիրածը Բաբելոնի մէջ անոր ¹³կամքը պիտի գործադրէ, Եւ իր բազուկը Քաղդէացիներուն վրայ պիտի երկարէ։

Ե՛ս, ե՛ս խօսեցայ, ու ե՛ս զինք կանչեցի. Զինք բերի, եւ իր ճամբան պիտի յաջողի։

Ինծի՛ մօտեցէք, սա՛ լսեցէք. Սկիզբէն ի վեր բնաւ ծածկաբար չխօսեցայ. Այս բաներուն գոյացած ատենէն ի վեր ես հոն եմ, Ու հիմա զիս Տէրը՝ Եհովան ղրկեց, ¹⁴եւ անոր Հոգին՝՝։

ՏԷՐՈՋ ԾՐԱԳԻՐԸ ԻՐ ԺՈՂՈՎՈՒՐԴԻՆ ՀԱՄԱՐ

Սա՛ կը յայտարարէ Տէրը՝ Քու Փրկարարդ, Իսրայէլի Սուրբը. «Ե՛ս եմ Տէրը՝ քու Աստուածդ, Որ քեզի օգտակար եղածը կը սորվեցնեմ, Քալելիք ճամբայիդ մէջ քեզ ¹⁵կ’առաջնորդեմ։

Երանի՜ թէ իմ պատուիրաններուս ուշադիր ըլլայիր. Այն ատեն քու խաղաղութիւնդ գետի պէս պիտի ըլլար, Եւ արդարութիւնդ՝ ծովու ալիքներուն պէս.

Քու զարմդ աւազի չափ պիտի ըլլար, Ու որովայնիդ ¹⁶պտուղը՝ անոր խիճին չափ։ Անոր անունը իմ առջեւէս պիտի չջնջուէր եւ ¹⁷չանհետանար»։

Բաբելոնէն ելէ՛ք, Քաղդէացիներէն փախէ՛ք. Սա՛ յայտարարեցէք ցնծութեան ձայնով, ու ¹⁸ծանուցանեցէք. Սա՛ ¹⁹տարածեցէք մինչեւ երկրի ծայրը, Ըսէ՛ք. «Տէրը փրկեց իր ծառան՝ Յակոբը»։

Երբ անոնց անապատներու մէջ քալել տուաւ՝ չծարաւցան. Անոնց համար վէմէն ջուրեր հոսեցուց, Վէմը ճեղքեց, եւ անկէ ջուրեր ²⁰բխեցան։

«Ամբարիշտները խաղաղութիւն պիտի չունենան», կը յայտարարէ Տէրը։