Isaiah 50

Song of Solomon  «  Isaiah 49  ‹  Isaiah 50  ›  Isaiah 51  »  Jeremiah

Տէրը սա՛ կ’ըսէ. «Ո՞ւր է ձեր մօր ամուսնալուծումի վկայագիրը, Որով ես զայն արձակեր եմ. Կամ իմ պարտատէրերէս ո՞վ է ան՝ Որուն ես ձեզ ծախեր եմ։ Ահա՛ ձեր անօրէնութիւններուն համար դուք ծախուեցաք, Ու ձեր յանցանքներուն համար ձեր մայրը արձակուեցաւ։

Ինչո՞ւ երբ եկայ՝ ո՛չ մէկը կար, Ու երբ կանչեցի՝ պատասխանող մը չկար։ Միթէ բնաւ ձեռքս կարճցա՞ւ՝ որ չկարենամ փրկել, Կամ թէ ազատելու կարողութիւն չունի՞մ։ Ահա՛ ես սաստելով ծովը կը ցամքեցնեմ. Գետերը անապատի ¹կը վերածեմ՝՝. Անոնց ձուկերը ջուր չըլլալուն համար գարշահոտ կ’ըլլան, Եւ ծարաւէն կը մեռնին։

Երկինքին խաւար կը հագցնեմ, Ու քուրձ կը դնեմ անոր վրայ՝ իբր ծածկոց»։

ՏԷՐՈՋ ԾԱՌԱՆԵՐՈՒՆ ՀՆԱԶԱՆԴՈՒԹԻՒՆԸ

Տէրը՝ Եհովան ինծի ուսեալներու լեզուն տուաւ, Որպէսզի գիտնամ խօսքով սփոփել պարտասածը։ Ամէն առտու զիս կ’արթնցնէ. Ի՛նք կ’արթնցնէ իմ ականջս, Որպէսզի ²աշակերտներու պէս լսեմ։

Տէրը՝ Եհովան իմ ականջս բացաւ, Ու ես անհնազանդ չեղայ, չընկրկեցայ։

Իմ կռնակս զարնողներուն տուի, Եւ այտերս՝ փետողներուն. Իմ երեսս նախատինքէն ու թուքէն չծածկեցի։

Բայց Տէրը՝ Եհովան ինծի կ’օգնէ, Ուստի պիտի չխայտառակուիմ. Հետեւաբար իմ երեսս գայլախազի պէս կարծր ըրի, Եւ գիտեմ թէ պիտի չամչնամ։

Զիս արդարացնողը մօտ է. Ո՞վ ինծի հետ պիտի վիճի. միասին դատարան ³ներկայանանք։ Ո՞վ ⁴զիս պիտի ամբաստանէ՝՝. թող ինծի մօտենայ։

Ահա՛ Տէրը՝ Եհովան ինծի պիտի օգնէ. Ո՞վ զիս պիտի դատապարտէ։ Ահա՛ բոլորը հագուստի պէս պիտի մաշին, Ցեցը պիտի կրծէ զանոնք։

Ձեր մէջ կա՞յ մէկը՝ որ Տէրոջմէն կը վախնայ, Անոր ծառային ձայնը մտիկ կ’ընէ, Խաւարի մէջ կը քալէ ու բնաւ լոյս չունի. Անիկա թող Տէրոջ անունին ⁵ապաւինի, Եւ իր Աստուծոյն կռթնի։

Ահա՛ դուք բոլորդ՝ որ կրակ կը վառէք Ու ⁶կրակի կայծերով՝՝ կը շրջապատուիք, Քալեցէ՛ք ձեր կրակին լոյսով՝ Ձեր վառած կրակի կայծերուն մէջ։ Ասիկա իմ ձեռքովս պիտի ըլլայ ձեզի. Դուք ցաւով պիտի պառկիք։