Isaiah 53

Song of Solomon  «  Isaiah 52  ‹  Isaiah 53  ›  Isaiah 54  »  Jeremiah

Ո՞վ հաւատաց մեր տուած լուրին, Տէրոջ բազուկը որո՞ւ յայտնուեցաւ։

¹Արդարեւ անիկա ²անոր առջեւ մատաղատունկի պէս աճեցաւ, Անջրդի հողէ ելլող ³ծիլի պէս։ Անիկա ո՛չ ⁴կերպարանք ունէր, ո՛չ ալ վայելչութիւն, որ անոր նայէինք. Տեսք չունէր՝ որ ⁵անկէ ախորժէինք՝՝։

Անիկա մարդոցմէ արհամարհուեցաւ ու երեսէ ձգուեցաւ. Կոտտանքի մարդ եղաւ, եւ ⁶կսկիծներու տեղեակ։ Անոր նմանեցաւ՝ որմէ երես կը ծածկեն. Արհամարհուեցաւ, ու համարում չունեցանք անոր հանդէպ։

Ի՛րապէս անիկա մեր կսկիծները կրեց, Եւ մեր կոտտանքները ստանձնեց։ Մենք զինք ⁷պատժուած, Աստուծմէ զարնուած Ու դժբախտացած համարեցինք։

Բայց անիկա մեր յանցանքներուն համար ⁸վիրաւորուեցաւ, Մեր անօրէնութիւններուն համար ճզմուեցաւ։ Մեզի խաղաղութիւն տուող պատիժը անոր վրայ եղաւ, Եւ իր ⁹վէրքերով մենք բուժուեցանք։

Բոլորս ոչխարներու պէս մոլորեցանք, Մեզմէ իւրաքանչիւրը իր ճամբային ¹⁰հետեւեցաւ, Ուստի Տէրը մեր բոլորին անօրէնութիւնը անոր վրայ ձգեց։

Անիկա ճնշուեցաւ ու տառապեցաւ, Բայց իր բերանը չբացաւ. Սպանդանոց տարուող գառի պէս, Զինք խուզողներուն առջեւ մունջ կեցող մաքիի պէս՝ Իր բերանը չբացաւ։

Կաշկանդումով եւ դատավճիռով ¹¹բռնուեցաւ. Անոր սերունդին ¹²ո՞վ պիտի գանգատի՝՝։ Արդարեւ ան ապրողներու երկրէն կտրուեցաւ, Իմ ժողովուրդիս յանցանքին համար ¹³պատժուեցաւ։

Անոր գերեզմանը ամբարիշտներուն հետ դրուեցաւ, Բայց երբ մեռաւ՝ հարուստին հետ եղաւ. ¹⁴Արդարեւ անիկա բռնութիւն մը գործած չէր, Եւ անոր բերանին մէջ խաբէութիւն չկար։

Տէրը հաճեցաւ որ ան ճզմուի, ու զինք ¹⁵ցաւերու մատնեց՝՝. Երբ իր անձը իբր յանցանքի պատարագ ¹⁶ընծայէ, Անիկա զարմ պիտի տեսնէ, իր օրերը պիտի երկարէ, Եւ Տէրոջ ¹⁷կամքը անոր ձեռքով պիտի ¹⁸գործադրուի։

Իր անձին ¹⁹տաժանքին պտուղը տեսնելով պիտի կշտանայ. Իմ արդար ծառաս իր գիտութեամբ շատերը պիտի արդարացնէ, Քանի որ անոնց անօրէնութիւնները ի՛նք պիտի կրէ։

Հետեւաբար մեծերուն հետ բաժին պիտի տամ անոր, Ու հզօրներուն հետ աւարը պիտի բաժնէ, Որովհետեւ իր անձը մահուան ²⁰մատնեց, Յանցաւորներուն հետ ²¹սեպուեցաւ, Շատերու մեղքը կրեց, Եւ յանցաւորներուն համար միջնորդեց։