Isaiah 54

Song of Solomon  «  Isaiah 53  ‹  Isaiah 54  ›  Isaiah 55  »  Jeremiah

ԱՍՏՈՒԾՈՅ ՍԷՐԸ ԻՍՐԱՅԷԼԻ ՀԱՆԴԷՊ

«Ո՛վ չծնանող ամուլ, ցնծա՛. Ո՛վ երկունքի ցաւ չքաշող, ցնծութեա՛մբ պոռթկա եւ աղաղակէ՛. Քանի որ միայնակին որդիները՝ Ամուսնացեալին որդիներէն շատ պիտի ըլլան,— կը յայտարարէ Տէրը։—

Լայնցո՛ւր վրանիդ տեղը, Թող տարածուին բնակարաններուդ վարագոյրները. Մի՛ խնայեր, երկնցո՛ւր չուաններդ եւ ամրացո՛ւր ցիցերդ։

Արդարեւ աջ ու ձախ կողմ պիտի ¹խուժես, Եւ քու զարմդ ²հեթանոսներուն պիտի տիրանայ, Ամայացած քաղաքները պիտի բնակեցնէ։

Մի՛ վախնար, քանի որ պիտի չամչնաս. Մի՛ խպնիր, որովհետեւ պիտի չշիկնիս։ Արդարեւ քու երիտասարդութեանդ ամօթը պիտի մոռնաս, Եւ այրիութեանդ նախատինքը անգա՛մ մըն ալ պիտի չյիշես,

Քանի որ քու ամուսինդ Արարիչդ է, Անոր անունը ³Զօրքերու Տէր՝՝ է, Ու քու Փրկարարդ Իսրայէլի Սուրբն է. Ան “ամբողջ երկրի Աստուածը” պիտի կոչուի։

Արդարեւ Տէրը քեզ կանչեց լքուած եւ հոգիով վշտացած կնոջ պէս, Երիտասարդութեան կնոջ պէս՝ որ ⁴արձակուած է,— կ’ըսէ քու Աստուածդ։—

⁵Կարճ վայրկեան մը քեզ լքեցի, Բայց մեծ ողորմութիւններով քեզ պիտի հաւաքեմ։

Զայրոյթի ⁶պոռթկումով՝ վայրկեան մը երեսս քեզմէ ծածկեցի, Բայց յաւիտենական կարեկցութեամբ քեզի պիտի գթամ,— Կը յայտարարէ քու Փրկարարդ՝ Եհովան։—

Արդարեւ ասիկա ինծի Նոյի ջուրերուն պէս է. Ինչպէս երդում ըրի թէ Նոյի ջուրերը անգա՛մ մըն ալ երկրի վրայէն պիտի չանցնին, Նոյնպէս երդում ըրի թէ ա՛լ պիտի չզայրանամ քեզի ու պիտի չսաստեմ քեզ։

Թէեւ լեռները հեռանան Եւ բլուրները երերան, Իմ կարեկցութիւնս քեզմէ պիտի չհեռանայ, Ու խաղաղութեանս ուխտը պիտի չերերայ,— Կը յայտարարէ Տէրը՝ որ քեզի կը գթայ»։

ԱՊԱԳԱՅ ԵՐՈՒՍԱՂԷՄԸ

«Ո՛վ մրրիկէն զարնուած անմխիթար դժբախտ, Ահա՛ ես քու քարերդ պիտի ⁷երանգաւորեմ, Քեզ շափիւղաներու վրայ պիտի հիմնադրեմ։

Քու մարտկոցներդ սուտակներով պիտի ⁸շինեմ, Դռներդ՝ կարկեհաններով, Ու բոլոր ⁹պարիսպներդ՝ ¹⁰թանկագին քարերով։

Քու բոլոր որդիներդ Տէրոջմէն պիտի սորվին, Եւ որդիներուդ խաղաղութիւնը մեծ պիտի ըլլայ։

Դուն արդարութեամբ պիտի հաստատուիս. Հարստահարութենէն ¹¹հեռու պիտի ըլլաս՝՝ որ չվախնաս, Նաեւ երկիւղէն՝ որ քեզի չմօտենայ։

Ահա՛ անշուշտ ¹²պիտի զինակցին, բայց ինձմէ չէ. Ո՛վ որ քեզի դէմ զինակցի՝՝, քու պատճառովդ պիտի իյնայ։

Ահա՛ ե՛ս ստեղծեցի ¹³դարբինը, որ կրակին մէջի ածուխներուն վրայ կը փչէ, Եւ իր ¹⁴գործով զէնք՝՝ մը կ’արտադրէ. Նաեւ ե՛ս ստեղծեցի կործանողը՝ որ ¹⁵բնաջնջէ։

Քեզի դէմ ¹⁶կռանուած ո՛չ մէկ զէնք ¹⁷արդիւնաւոր պիտի ըլլայ՝՝, Ու դատաստանի մէջ քեզի դէմ կանգնող ամէն լեզու պիտի դատապարտուի։ Ասիկա՛ է Տէրոջ ծառաներուն ժառանգութիւնը, Եւ անոնց արդարութիւնը ինձմէ է», կը պատգամէ Տէրը։