Isaiah 55

Song of Solomon  «  Isaiah 54  ‹  Isaiah 55  ›  Isaiah 56  »  Jeremiah

ԱՍՏՈՒԾՈՅ ՈՂՈՐՄՈՒԹԵԱՆ ԽՈՍՏՈՒՄԸ

«Ո՛վ բոլոր ծարաւցածներ, ջուրերո՛ւն եկէք. Դրա՛մ չունեցողներ, եկէ՛ք, գնեցէ՛ք եւ կերէ՛ք. Եկէ՛ք, գինի՛ ու կա՛թ գնեցէք՝ Առանց դրամի եւ ¹վճարումի։

Ինչո՞ւ ձեր դրամը կը վատնէք՝ ո՛չ թէ հացի համար, Ու ձեր վաստակը այնպիսի բանի համար՝ որ չի կշտացներ։ Ուշադրութեա՛մբ մտիկ ըրէք ինծի, որպէսզի ²համադամ կերակուրներ՝՝ ուտէք, Եւ ձեր անձը պարարտութիւն վայելէ։

Դարձո՛ւցէ՛ք ձեր ականջը, ու եկէ՛ք ինծի. Մտի՛կ ըրէք, ու ձեր անձը պիտի ապրի։ Ձեզի հետ յաւիտենական ուխտ մը պիտի կնքեմ, Դաւիթի ³մնայուն կարեկցութիւնները ձեզի տալով։

Ահա՛ զայն վկայ կարգեցի ⁴ժողովուրդներուն, Առաջնորդ ու հրամանատար՝ ⁵ազգերուն։

Ահա՛ անծանօթ ազգ մը պիտի կանչես, Եւ քեզ չճանչցող ազգերը քովդ պիտի ⁶փութան՝ Տէրոջ՝ քու Աստուծոյդ համար Ու Իսրայէլի Սուրբին համար, Քանի որ ան քեզ փառաւորեց։

Փնտռեցէ՛ք Տէրը՝ քանի ան կը գտնուի. Գոչեցէ՛ք անոր, քանի ան մօտ է։

Թող ամբարիշտը լքէ իր ճամբան, Եւ անօրէն մարդը՝ իր մտածումները, Ու վերադառնայ Տէրոջ, եւ ան պիտի գթայ իրեն, Ու մեր Աստուծոյն՝ որովհետեւ ան առատապէս կը ներէ։

Արդարեւ իմ մտածումներս ձեր մտածումները չեն, Եւ ձեր ⁷ճամբաները իմ ճամբաներս չեն,— կը պատգամէ Տէրը.—

Հապա որչափ երկինքը երկրէն բարձր է, Այնչափ իմ ճամբաներս ձեր ճամբաներէն բարձր են, Եւ իմ մտածումներս՝ ձեր մտածումներէն։

Որովհետեւ ինչպէս տեղատարափն ու ձիւնը երկինքէն կ’իջնեն եւ հոն չեն վերադառնար, Հապա երկիրը կ’ոռոգեն ու զայն ⁸պտղաբեր եւ ⁹արգասաւոր կ’ընեն, Սերմանողին հունտ կու տան, եւ ուտողին՝ հաց,

Իմ բերանէս ելած խօսքն ալ այնպէս պիտի ըլլայ. Ինծի ¹⁰ապարդիւն պիտի չվերադառնայ, Հապա իմ ¹¹կամքս պիտի գործադրէ, Ու յաջողցնէ այն բանը՝ որուն համար զայն ղրկեցի։

Արդարեւ դուք ուրախութեամբ դուրս պիտի ելլէք, Եւ խաղաղութեամբ պիտի առաջնորդուիք. Լեռներն ու բլուրները ձեր առջեւէն ցնծութեամբ պիտի պոռթկան, Եւ դաշտերուն բոլոր ծառերը ծափ պիտի զարնեն։

Թուփին տեղ եղեւին պիտի բուսնի, Ու ¹²եղիճին տեղ՝ մրտենի, Եւ ասիկա Տէրոջ համբաւին համար Յաւիտենական, անջինջ նշան մը պիտի ըլլայ»։