Isaiah 57

Song of Solomon  «  Isaiah 56  ‹  Isaiah 57  ›  Isaiah 58  »  Jeremiah

ԻՍՐԱՅԷԼԻ ԿՌԱՊԱՇՏՈՒԹԻՒՆԸ ԿԸ ԴԱՏԱՊԱՐՏՈՒԻ

«Արդարը կը կորսուի, եւ ո՛չ մէկը ¹ուշադրութիւն կը դարձնէ՝՝. Կարեկից մարդիկը աշխարհէն ²կ’անհետանան. Ո՛չ մէկը կը նկատէ թէ արդարը գալիք ³չարիքին պատճառով՝՝ կ’անհետանայ։

Ան խաղաղութեան մէջ կը մտնէ. Ուղղամտութեամբ ընթացողները Իրենց անկողինին վրայ կը հանգստանան։

Բայց դուք, ո՛վ գուշակի որդիներ, Շնացողի ու պոռնիկի զարմ, հո՛ս մօտեցէք.

Դուք ո՞վ կը ⁴ծաղրէք, Ձեր բերանը որո՞ւ դէմ ⁵լայն կը բանաք՝՝, Եւ ձեր լեզուն կ’երկարէք. Միթէ դուք յանցանքի զաւակներ ու կեղծիքի զարմ չէ՞ք։

Դուք ամէն կանաչազարդ ծառի տակ՝ ⁶Չաստուածներուն քով՝՝ ցանկութեամբ կը տաքնաք. Ձեր զաւակները կը մորթէք ձորերու մէջ, Ժայռերու ծերպերուն մէջ։

Քու բաժինդ ձորին ողորկ քարերուն մէջ է. Քու վիճակդ անոնք են, անո՛նք։ Նոյնիսկ անո՛նց ⁷նուէր թափեցիր, հացի ընծայ մատուցանեցիր. Միթէ ես ⁸ասոնց կը հանդուրժե՞մ՝՝։

Դուն անկողինդ բարձր ու ⁹վեհ լերան վրայ դրիր, Հո՛ն ալ բարձրացար՝ զոհ մատուցանելու։

Դռներուն ու դրանդիներուն ետեւը դրիր քու յիշատակդ. Որովհետեւ բարձրանալով՝ ինձմէ ուրիշին առջեւ մերկացար. Անկողինդ լայնցուցիր եւ անոնց հետ ¹⁰համաձայնեցար. Անոնց անկողինը սիրեցիր, անոնց մերկութիւնը դիտեցիր։

Թագաւորին քով հոտաւէտ իւղով գացիր, Հոտաւէտ բաղադրութիւններդ բազմապատկեցիր, Դեսպաններդ հեռուն ղրկեցիր, Ու մինչեւ ¹¹դժոխք նուաստացար։

Քու ճամբայիդ երկարութենէն յոգնեցար, Բայց չըսիր. “Յոյս չկայ”. Քու ձեռքիդ կենսունակութիւնը վերստին գտար, Հետեւաբար չթուլցար։

Դուն որմէ՞ զարհուրեցար ու վախցար՝ որ ստեցիր, Զիս չյիշեցիր եւ ¹²իմ մասիս չմտածեցիր՝՝։ Շատոնց իմ լուռ կենալուս համար չէ՞, Որ ինձմէ չես վախնար։

Ես քու արդարութիւնդ ու գործերդ պիտի յայտարարեմ, Որոնք քեզի օգտակար պիտի չըլլան։

Երբ աղաղակես, հաւաքած կուռքե՛րդ թող քեզ ազատեն. Բայց հովը զանոնք բոլորը պիտի ¹³քշէ տանի՝՝, Շունչ մը զանոնք պիտի յափշտակէ. Սակայն ինծի ապաւինողները երկիրը պիտի ժառանգեն, Եւ իմ սուրբ լերանս պիտի տիրանան»։

ԱՍՏՈՒԱԾ ԿԸ ԽՈՍՏԱՆԱՅ ՕԳՆԵԼ ԵՒ ՓՐԿԵԼ

«Անոնք պիտի ըսեն. “Հարթեցէ՛ք, հարթեցէ՛ք. Ճամբա՛յ պատրաստեցէք, Վերցուցէ՛ք խոչընդոտը իմ ժողովուրդիս ճամբայէն”»։

Արդարեւ սա՛ կը յայտարարէ Բարձրն ու ¹⁴Վեհը, Որ յաւերժութեան մէջ կը բնակի, եւ անոր անունը Սուրբ է. «Ես բարձր ու սուրբ վայրը կը բնակիմ, Բայց ճմլուած եւ նուաստ հոգի ունեցողին հետ եմ, Որպէսզի նուաստներուն հոգին վերապրեցնեմ, Ու ճմլուած սիրտերը վերապրեցնեմ։

Արդարեւ յաւիտեան պիտի չվիճիմ Եւ ընդմիշտ պիտի չզայրանամ, Այլապէս իմ առջեւս հոգիները պիտի թալկանային, Նաեւ այն անձերը՝ որ ես ¹⁵ստեղծեցի։

Անոր ագահութեան անօրէնութեան համար զայրացայ Ու զայն զարկի. իմ երեսս ծածկեցի եւ զայրացայ, Բայց ուխտադրուժը իր սիրտին ճամբայէն ընթացաւ։

Իր ճամբաները տեսայ. սակայն զինք պիտի բուժեմ, Նաեւ զինք պիտի առաջնորդեմ, Զինք եւ իր սգաւորները պիտի մխիթարեմ։

Շրթունքներուն պտուղը ես կը ստեղծեմ։ Խաղաղութի՜ւն, խաղաղութի՜ւն ըլլայ հեռու եղողին, Նաեւ մօտը եղողին,— կ’ըսէ Տէրը.— Ես զինք պիտի բուժեմ։

Բայց ամբարիշտները ալեծուփ ծովու պէս են, որ չի կրնար հանդարտիլ, Որուն ջուրերը տիղմ ու ցեխ կ’արտաքսեն։

Ամբարիշտները խաղաղութիւն պիտի չունենան», կը յայտարարէ իմ Աստուածս։