Isaiah 59

Song of Solomon  «  Isaiah 58  ‹  Isaiah 59  ›  Isaiah 60  »  Jeremiah

ՄԱՐԳԱՐԷՆ ԿԸ ԴԱՏԱՊԱՐՏԷ ԺՈՂՈՎՈՒՐԴԻՆ ՄԵՂՔԸ

Ահա՛ Տէրոջ ձեռքը կարճցած չէ՝ որ չկարենայ փրկել, Ո՛չ ալ անոր ականջը ծանրացած՝ լսելու համար։

Հապա ձեզ ձեր Աստուծմէն ¹բաժնողը Ձեր անօրէնութիւննե՛րը եղան. Ձեր մեղքե՛րը անոր երեսը ձեզմէ ծածկեցին, որ չլսէ։

Արդարեւ ձեր ձեռքերը արիւնով պղծուեցան, Ու ձեր մատները՝ անօրէնութեամբ. Ձեր շրթունքը սուտ խօսեցաւ, Եւ ձեր լեզուն անիրաւութիւն ²արտայայտեց։

Ո՛չ մէկը արդարութեամբ գանգատ կը ներկայացնէ, Ո՛չ մէկը ³հաւատարմութեամբ կը դատէ. Անոնք ոչնչութիւններու կը վստահին եւ ⁴ունայնութիւն կը խօսին. Անիրաւութիւն կը յղանան եւ անօրէնութիւն կը ծնանին։

Իժի հաւկիթներ կը թխսեն, Ու սարդի ոստայն կը հիւսեն։ Անոնց հաւկիթները ուտողը կը մեռնի. Եթէ հատ մը ճնշուի՝ իժ ⁵կ’ելլէ։

Անոնց ոստայնները հագուստ չեն ըլլար, Եւ իրենց ⁶բանուածքներով չեն կրնար ծածկուիլ. Անոնց գործերը անօրէնութեան գործեր են, Ու իրենց ձեռքերուն մէջ բռնութեան արարք կայ։

Անոնց ոտքերը չարութեան կը վազեն, Եւ անմեղ արիւն թափելու կը շտապեն. Անոնց մտածումները անօրէնութեան մտածումներ են, Անոնց պողոտաներուն մէջ կործանում ու փլուզում կայ։

Խաղաղութեան ճամբան չեն ճանչնար, Եւ անոնց արահետներուն մէջ իրաւունք չկայ։ Իրենց շաւիղները ծռեցին. Ո՛վ որ անոնց մէջ քալէ՝ խաղաղութիւն չի ճանչնար։

ԺՈՂՈՎՈՒՐԴԸ ԿԸ ԽՈՍՏՈՎԱՆԻ ԻՐ ՄԵՂՔԸ

Հետեւաբար իրաւունքը մեզմէ հեռացաւ, Ու արդարութիւնը մեզի չի հասնիր. Լոյսի կը սպասենք, եւ ահա՛ խաւար կ’ըլլայ, Պայծառութեան կը սպասենք, բայց մթութեան մէջ կը շրջինք։

Կոյրերու պէս պատերը կը շօշափենք, Աչք չունեցողներու պէս կը խարխափենք. Կէսօրի՛ն կը գայթինք՝ ինչպէս մթնշաղին. ⁷Առողջներու մէջ մեռելներու պէս ենք։

Բոլորս արջերու պէս կը գոռանք, Աղաւնիներու պէս անդադար կը մնչենք. Դատաստանի կը սպասենք, բայց չկայ. Փրկութիւն կ’ակնկալենք, բայց ան մեզմէ հեռու է։

Արդարեւ մեր յանցանքները քու առջեւդ շատցան, Եւ մեր մեղքերը մեզի դէմ կը վկայեն, Որովհետեւ մեր յանցանքները մեր քով են, Ու մեր անօրէնութիւնները գիտենք։

Յանցանք գործեցինք, Տէրը ուրացանք, Մեր Աստուծոյն հետեւելէն ⁸հրաժարեցանք։ Հարստահարութիւն եւ ապստամբութիւն ⁹ծրագրեցինք, Մեր սիրտին մէջ սուտ խօսքեր յղացանք ու ըսինք։

Իրաւունքը ետ քաշուեցաւ Եւ արդարութիւնը հեռացաւ, Քանի որ ճշմարտութիւնը հրապարակին մէջ գայթեցաւ, Եւ ուղղամտութիւնը չի կրնար ներս գալ.

Ճշմարտութիւնը կը պակսի, Չարութենէ հեռացողը ¹⁰կը կողոպտուի՝՝։ Տէրը տեսաւ եւ ասիկա անոր ¹¹անհաճոյ եղաւ, Քանի որ իրաւունք չմնաց։

ՏԷՐԸ ԿԸ ՊԱՏՐԱՍՏՈՒԻ ԻՐ ԺՈՂՈՎՈՒՐԴԸ ՓՐԿԵԼ

Ան տեսաւ թէ ո՛չ մէկը կար, Ապշեցաւ որ միջնորդ մը չկար. Ուստի իր բազուկը զինք փրկեց, Եւ իր արդարութիւնը իրեն նեցուկ եղաւ։

Արդարութիւնը զրահի պէս հագաւ, Փրկութեան սաղաւարտը իր գլուխը դրաւ. Վրէժխնդրութեան հագուստը իբր պատմուճան հագաւ, Նախանձախնդրութեամբ ծածկուեցաւ՝ պարեգօտի մը պէս։

Իրենց ¹²վարմունքին համեմատ պիտի հատուցանէ.— Ցասում՝ իր հակառակորդներուն, Վարձատրութիւն՝ իր թշնամիներուն. ¹³Կղզիներուն ¹⁴հատուցում պիտի ընէ՝՝։

Արեւմուտքը՝ Տէրոջ անունէն, Եւ արեւելքը անոր փառքէն պիտի վախնան. Երբ թշնամին գետի պէս գայ, Տէրոջ Հոգին ¹⁵անոր դէմ դրօշակ պիտի բարձրացնէ՝՝։

«Փրկարար պիտի գայ Սիոնի, Անոնց՝ որ իրենց յանցանքներէն դարձի կու գան Յակոբի մէջ»,— կը պատգամէ Տէրը։—

Ես ալ անոնց հետ սա՛ ուխտը պիտի կնքեմ,— կը յայտարարէ Տէրը.— Իմ Հոգիս՝ որ քու վրադ է, Եւ իմ խօսքերս՝ որ բերանդ դրեր եմ, Պիտի չհեռանան քու բերանէդ, ¹⁶զաւակներուդ բերանէն, Ու զաւակներուդ զաւակներուն բերանէն, Ասկէ ետք մինչեւ յաւիտեան», կը յայտարարէ Տէրը։