Isaiah 65

Song of Solomon  «  Isaiah 64  ‹  Isaiah 65  ›  Isaiah 66  »  Jeremiah

ԱՍՏՈՒԾՈՅ ՊԱՏԻԺԸ ԱՊՍՏԱՄԲՆԵՐՈՒՆ

Ինծի խորհուրդ չհարցնողներէն փնտռուեցայ, Զիս չփնտռողներէն գտնուեցայ. Իմ ¹անունս չկանչող՝՝ ազգին ըսի. «Ահա՛ հոս եմ, ահա՛ հոս եմ»։

Ամէն օր իմ ձեռքերս ²երկարեցի ապստամբ ժողովուրդի մը, Անոնց՝ որ կը քալեն այնպիսի ճամբայի մը մէջ՝ որ լաւ չէ, Իրենց մտածումներուն հետեւելով.

Այնպիսի ժողովուրդի մը՝ որ շարունակ դիմացս զիս կը գրգռէ. Պարտէզներու մէջ կը զոհեն, Աղիւսներու վրայ խունկ կը ծխեն,

Գերեզմաններու մէջ կը մնան, ³Քարանձաւներու մէջ կը գիշերեն, Խոզի միս կ’ուտեն, Եւ իրենց ամաններուն մէջ պիղծ բաներու արգանակ կայ։

Անոնք կ’ըսեն. «Հեռո՛ւն կեցիր, ինծի մի՛ մօտենար, Քանի որ ես քեզմէ սուրբ եմ»։ Ասոնք իմ ռունգերուս մէջ ծուխ են, Ամբողջ օրը վառող կրակ են։

Ահա՛ իմ առջեւս գրուած է. «Պիտի չլռեմ, հապա պիտի հատուցանեմ. Այո՛, անոնց ծոցին մէջ պիտի հատուցանեմ

Ձեր անօրէնութիւնները՝ ձեր հայրերուն անօրէնութիւններուն հետ, Որոնք լեռներուն վրայ խունկ ծխեցին Ու բլուրներուն վրայ զիս նախատեցին,— կը յայտարարէ Տէրը.— Ուստի անոնց նախկին գործերը իրենց ծոցերուն մէջ պիտի ⁴լեցնեմ»։

Տէրը սա՛ կը յայտարարէ. «Ինչպէս երբ ողկոյզի մը մէջ քաղցու գտնուի՝ կ’ըսեն. “Զայն մի՛ կտրեր, Քանի որ ատոր մէջ օրհնութիւն կայ”, Ես ալ այնպէս պիտի ընեմ իմ ծառաներուս սիրոյն համար, Որպէսզի բոլորը չկոտորեմ։

Յակոբէն զարմ պիտի հանեմ, Յուդայէն՝ իմ լեռներուս ժառանգորդ. Իմ ընտրեալներս այդ երկրին պիտի տիրանան, Ու ծառաներս հոն պիտի բնակին։

Զիս փնտռող ժողովուրդիս համար՝ Սարոն հօտերու արօտավայր պիտի ըլլայ, Եւ Աքովրի հովիտը՝ արջառներու մակաղատեղ։

Քանի դուք Տէրը լքեցիք Ու սուրբ լեռս մոռցաք, ⁵Գադ կուռքին՝՝ սեղան պատրաստեցիք, Եւ ⁶Մենիի ⁷թափելիք նուէր՝՝ լեցուցիք,

Ես ալ ձեզ սուրի պիտի ⁸մատնեմ, Ու բոլորդ պիտի ծռիք մորթուելու համար. Որովհետեւ կանչեցի՝ բայց չպատասխանեցիք, Խօսեցայ՝ սակայն մտիկ չըրիք, Հապա իմ ⁹առջեւս չարիք գործեցիք, Եւ ինծի հաճելի չեղածը ընտրեցիք»։

Հետեւաբար Տէրը՝ Եհովան սա՛ կը յայտարարէ. «Ահա՛ իմ ծառաներս պիտի ուտեն, Բայց դուք պիտի անօթենաք. Ահա՛ իմ ծառաներս պիտի խմեն, Իսկ դուք պիտի ծարաւնաք. Ահա՛ իմ ծառաներս պիտի ուրախանան, Սակայն դուք պիտի ամչնաք։

Ահա՛ իմ ծառաներս սիրտի զուարթութեամբ պիտի օրհներգեն, Բայց դուք սիրտի կոտտանքէ պիտի աղաղակէք, Ու հոգիի բեկանումէ պիտի գոռաք։

Ձեր անունը ¹⁰անէծքի համար պիտի թողուք իմ ընտրեալներուս, որոնք պիտի ըսեն. “Ա՛յդպէս Տէրը՝ Եհովան քեզ թող մեռցնէ”։ Իսկ իր ծառաները ուրիշ անունով պիտի կոչէ,

Որպէսզի երկրի վրայ օրհնուողը “Ճշմարիտ Աստուծմով” օրհնուի, Ու երկրի վրայ երդում ընողը “Ճշմարիտ Աստուծմով” երդում ընէ. Որովհետեւ նախկին տագնապները պիտի մոռցուին, Անոնք իմ աչքերէս պիտի ծածկուին»։

ՆՈՐ ՍՏԵՂԾԱԳՈՐԾՈՒԹԻՒՆ

«Արդարեւ ահա՛ ես նոր երկինք մը ու նոր երկիր մը պիտի ստեղծեմ, Եւ նախկինները պիտի չյիշուին ու ¹¹չմտաբերուին։

Իսկ դուք իմ ստեղծագործութեամբս Յաւե՛րժ բերկրեցէք եւ խայտացէք. Արդարեւ ահա՛ ես Երուսաղէմը խայտանքի համար պիտի ստեղծեմ, Եւ անոր ժողովուրդը՝ բերկրանքի համար.

Երուսաղէմով պիտի խայտամ, Ու իմ ժողովուրդովս պիտի բերկրիմ։ Հոն անգա՛մ մըն ալ լացի ձայն պիտի չլսուի, ո՛չ ալ աղաղակի ձայն.

Հոն անգա՛մ մըն ալ քիչ օր ապրած ¹²երախայ պիտի չըլլայ, Ո՛չ ալ իր օրերը ¹³չամբողջացուցած ծեր, Քանի որ երիտասարդը հարիւր տարեկանին պիտի մեռնի, Եւ հարիւր տարեկան մեղաւորը պիտի անիծուի։

Տուներ պիտի կառուցանեն ու բնակին, Այգիներ պիտի տնկեն եւ անոնց պտուղը ուտեն։

Անոնք պիտի չկառուցանեն՝ որպէսզի ուրիշները բնակին, Անոնք պիտի չտնկեն՝ որպէսզի ուրիշները ուտեն. Արդարեւ իմ ժողովուրդիս օրերը ծառի օրերու չափ պիտի ըլլան, Եւ իմ ընտրեալներս իրենց ձեռքերուն գործերը իրե՛նք պիտի մաշեցնեն։

Անոնք պարապ տեղը պիտի չյոգնին, Ու արհաւիրքի համար զաւակներ պիտի չծնանին, Քանի որ անոնք Տէրոջ օրհնածներուն զարմն են, Իրենց շառաւիղներն ալ իրենց հետ։

Իրենց գոչելէն առաջ պիտի պատասխանեմ, Մինչ կը խօսին՝ պիտի լսեմ։

Գայլն ու գառը միասին պիտի արածին, Առիւծը ¹⁴արջառի պէս յարդ պիտի ուտէ, Եւ օձին ¹⁵կերը հող պիտի ըլլայ. Անոնք պիտի ¹⁶չվնասեն ու չփճացնեն Իմ ամբողջ սուրբ լերանս վրայ», կ’ըսէ Տէրը։