Isaiah 66

Song of Solomon  «  Isaiah 65  ‹  Isaiah 66  ›  Jeremiah 1  »  Jeremiah

ՏԷՐԸ ԿԸ ԴԱՏԷ ԱԶԳԵՐԸ

Տէրը սա՛ կը յայտարարէ. «Երկինքը իմ գահս է, Ու երկիրը իմ ոտքերուս պատուանդանն է. Ի՞նչ տուն է որ ինծի համար կը կառուցանէք, Եւ ո՞ւր է իմ հանգստավայրիս տեղը,

Քանի ի՛մ ձեռքս ասոնք բոլորը շինեց, Ու ասոնք բոլորը գոյացան,— կը պատգամէ Տէրը։— Բայց ես սա՛ մարդոց պիտի նայիմ, Այսինքն՝ դժբախտին, ¹ընկճուած հոգի ունեցողին, Եւ իմ խօսքէս ²վախցողին։

Արջառ մորթողը մարդ մեռցնողի պէս է, Ոչխար զոհողը՝ շունի ծոծրակ կոտրողի պէս, Ընծայ մատուցանողը՝ խոզի արիւն թափողի պէս, Կնդրուկ ծխողը՝ ³կուռք պաշտողի՝՝ պէս։ Քանի անոնք իրենց ճամբաները ընտրեցին, Եւ անոնց անձերը իրենց պղծութիւններէն կ’ախորժին,

Ես ալ անոնց թշուառութիւնները պիտի ընտրեմ, Անոնց վրայ պիտի բերեմ իրենց երկիւղ տուող բաները. Արդարեւ կանչեցի՝ բայց ո՛չ մէկը պատասխանեց, Խօսեցայ՝ սակայն մտիկ չըրին, Հապա իմ ⁴առջեւս չարիք գործեցին, Եւ ինծի հաճելի չեղածը ընտրեցին»։

Մտի՛կ ըրէք Տէրոջ խօսքը՝ Ո՛վ անոր խօսքէն վախցողներ. «Ձեր եղբայրները՝ որ ձեզ կ’ատեն, Եւ իմ անունիս համար ձեզ կը վտարեն, ըսին. “Տէրը թող փառաւորուի, ⁵Ու ձեր ուրախութիւնը տեսնենք”. Բայց անոնք՝՝ պիտի ամչնան»։

Քաղաքէն ժխորի ձայն մը, տաճարէն ձայն մը կու գայ, Տէրոջ ձայնը՝ որ իր թշնամիներուն վարձատրութիւնը կը հատուցանէ։

Առանց երկնելու՝ ծնաւ, Երկունքի ցաւը չհասած՝ արու զաւակ մը ⁶աշխարհ բերաւ՝՝։

Ո՞վ լսեր է նման բան մը, ո՞վ տեսեր է այսպիսի բաներ. Միթէ երկիրը մէկ օրուան մէջ կ’երկնէ՞, Կամ ազգ մը մէկ անգամէն կը ծնի՞. Արդարեւ հազիւ երկունքի ցաւ քաշած՝ Սիոն իր որդիները ծնաւ։

«Ես՝ որ արգանդը կը ⁷բանամ, Ծնանիլ պիտի չտա՞մ», կ’ըսէ Տէրը. «Ես՝ որ ծնանիլ կու տամ, Արգանդը պիտի գոցե՞մ», կ’ըսէ քու Աստուածդ։

Երուսաղէմի հետ ուրախացէ՛ք եւ անոր հետ խայտացէ՛ք, Դո՛ւք բոլորդ՝ որ զայն կը սիրէք. Մե՛ծապէս բերկրեցէք անոր հետ, Դո՛ւք բոլորդ՝ որ անոր համար կը սգաք.

Որովհետեւ անոր մխիթարութեան ⁸ստինքներէն Պիտի ծծէք ու կշտանաք, Որովհետեւ դուք կաթով պիտի սնանիք, Եւ անոր փառքին առատութիւնը պիտի վայելէք։

Արդարեւ Տէրը սա՛ կը յայտարարէ. «Ահա՛ ես անոր վրայ պիտի տարածեմ խաղաղութիւնը՝ գետի պէս, Եւ ազգերուն փառքը՝ յորդահոս ⁹հեղեղի պէս։ Կաթ պիտի ծծէք, ու ¹⁰գիրկի վրայ պիտի կրեն ձեզ. Ծունկերու վրայ պիտի գգուեն ձեզ։

Ինչպէս մայր մը ¹¹իր զաւակը՝՝ կը հանգստացնէ, Այնպէս ալ ես ձեզ պիտի հանգստացնեմ, Ու Երուսաղէմի մէջ պիտի հանգստանաք։

Պիտի տեսնէք եւ ձեր սիրտը պիտի բերկրի, Ձեր ոսկորները կանաչ դալարի պէս պիտի ծաղկին։ Տէրոջ ձեռքը իր ծառաներէն պիտի ճանչցուի, Իսկ անոր սրտմտութիւնը թշնամիներուն վրայ պիտի թափուի»։

Արդարեւ ահա՛ Տէրը կրակով կու գայ. Անոր կառքերը փոթորիկի պէս են, Որպէսզի իր բարկութիւնը ցասումով ¹²կիրարկէ, Եւ իր սաստը՝ կրակի բոցով։

Արդարեւ Տէրը կրակով ու իր սուրով պիտի դատէ ամէն մարմին, Եւ բազմաթիւ պիտի ըլլան Տէրոջմէն ¹³մեռցուածները։

«Իրենք զիրենք սրբացնողներն ու պարտէզներու մէջ մաքրուողները՝ Հետեւելով մէջտեղը եղող ¹⁴մէկին, Խոզի միս, պիղծ բաներ եւ մուկ ուտողները՝ Միասին պիտի բնաջնջուին,— կը պատգամէ Տէրը։—

Բայց ես անոնց գործերն ու մտածումները գիտեմ. Բոլոր ազգերն ու լեզուները պիտի հաւաքեմ, Անոնք պիտի գան եւ իմ փառքս տեսնեն։

Անոնց մէջ նշան մը պիտի դնեմ, Եւ անոնցմէ ազատածները ազգերուն պիտի ղրկեմ, Այսինքն դէպի Թարսիս, Փուղ եւ Ղուդ՝ (աղեղնաւորները,) Դէպի Թոբէլ ու Յաւան, Այն հեռաւոր կղզիները՝ որ իմ համբաւս չեն լսեր Ու փառքս չեն տեսեր, Եւ իմ փառքս ազգերուն մէջ պիտի հռչակեն։

Անոնք ձեր բոլոր եղբայրները՝ ձիերով ու կառքերով, Ծածկուած սայլերով, ջորիներով եւ տաճիկ ուղտերով, Բոլոր ազգերէն իմ սուրբ լեռս՝ Երուսաղէմ պիտի բերեն Իբր Տէրոջ ընծայ,— կ’ըսէ Տէրը,— Ինչպէս Իսրայէլի որդիները Մաքուր ամանով Տէրոջ տունը ընծայ կը բերեն։

Անոնցմէ ալ պիտի առնեմ՝ Քահանաներ եւ Ղեւտացիներ ընելու համար,— կ’ըսէ Տէրը։—

Արդարեւ ինչպէս նոր երկինքն ու նոր երկիրը՝ որ պիտի ¹⁵ստեղծեմ՝ Իմ առջեւս պիտի գոյատեւեն,— կը պատգամէ Տէրը,— Այնպէս ալ ձեր զարմն ու ձեր անունը պիտի գոյատեւեն։

¹⁶Ամէն ամսագլուխ՝՝ եւ ¹⁷ամէն Շաբաթ՝՝ Ամէն մարմին իմ առջեւս երկրպագելու պիտի գայ,— կը յայտարարէ Տէրը։—

Անոնք դուրս ելլելով՝ Ինծի դէմ ապստամբող մարդոց դիակները պիտի տեսնեն, Քանի որ անոնց ճճին պիտի չմեռնի, Անոնց կրակը պիտի չմարի, Եւ անոնք ամէն մարմինի պժգալի պիտի ըլլան»։