Jeremiah 16

Isaiah  «  Jeremiah 15  ‹  Jeremiah 16  ›  Jeremiah 17  »  Lamentations

ԱՍՏՈՒԾՈՅ ԿԱՄՔԸ ԵՐԵՄԻԱՅԻ ԿԵԱՆՔԻՆ ՀԱՄԱՐ

Տէրը խօսեցաւ՝՝ ինծի՝ ըսելով.

«Քեզի կին մի՛ առներ, Ու որդիներ եւ աղջիկներ մի՛ ունենար այս տեղը.

Արդարեւ այս տեղը ծնած որդիներուն եւ աղջիկներուն համար, Զանոնք ծննդաբերող մայրերուն համար, Եւ այս երկրին մէջ զանոնք ծնանող հայրերուն համար՝ Տէրը սա՛ կը յայտարարէ.

“Անոնք ¹մահառիթ հիւանդութիւններով՝՝ պիտի մեռնին. Անոնց վրայ պիտի չհեծեծեն եւ անոնք պիտի չթաղուին. Աղբի պէս պիտի ըլլան գետինի մակերեսին վրայ։ Սուրով ու սովով պիտի ²բնաջնջուին. Անոնց դիակները երկինքի թռչուններուն Ու երկրի գազաններուն ուտելիք պիտի ըլլան”»։

Արդարեւ Տէրը սա՛ կը յայտարարէ. «Սուգի տուն մի՛ մտներ, հեծեծելու մի՛ երթար, Անոնց համար մի՛ ողբար. Քանի այս ժողովուրդէն ³վերցուցի իմ խաղաղութիւնս,— կը պատգամէ Տէրը,— Կարեկցութիւնս եւ գթութիւնս։

Այս երկրին մէջ մեծերն ու պզտիկները Պիտի մեռնին, բայց պիտի չթաղուին. Անոնց համար մարդիկ պիտի չհեծեծեն, Իրենք զիրենք պիտի չկտրատեն, Անոնց համար կնտակ պիտի չըլլան.

Սգաւորներուն հետ հաց պիտի ⁴չկիսեն՝ Որպէսզի զանոնք մխիթարեն մեռելի մը համար, Ո՛չ ալ անոնց մխիթարութեան բաժակը պիտի խմցնեն՝ Իրենց հօր կամ մօր համար։

Խնճոյքի տուն ալ մի՛ մտներ, Որ անոնց հետ նստիս՝ ուտելու եւ խմելու համար»։

Արդարեւ զօրքերու Տէրը՝ Իսրայէլի Աստուածը սա՛ կը յայտարարէ. «Ահա՛ ես այս տեղէն՝ ձեր աչքերուն առջեւ ու ձեր օրերուն մէջ՝ Պիտի դադրեցնեմ բերկրանքի ձայնը եւ ուրախութեան ձայնը, Փեսային ձայնն ու հարսին ձայնը։

Ու երբ այս բոլոր խօսքերը այս ժողովուրդին յայտարարես, եւ անոնք քեզի հարցնեն. “Ինչո՞ւ Տէրը այս ամբողջ մեծ չարիքը մեզի դէմ ⁵վճռեց, Եւ ի՞նչ է մեր անօրէնութիւնն ու մեր մեղքը՝ Որ Տէրոջ՝ մեր Աստուծոյն դէմ գործեր ենք”,

Դուն անոնց պատասխանէ՛. “Որովհետեւ ձեր հայրերը զիս լքեցին,— կը պատգամէ Տէրը,— Եւ ուրիշ աստուածներու հետեւեցան, Զանոնք պաշտեցին ու անոնց երկրպագեցին. Զիս լքեցին եւ իմ օրէնքս չպահեցին։

Իսկ դուք ձեր հայրերէն աւելի ⁶չար եղաք՝՝. Ահա՛ ինծի մտիկ չընելով՝ Ձեզմէ իւրաքանչիւրը իր չար սիրտին կամակորութեան հետեւեցաւ։

Ուստի ես այս երկրէն ձեզ պիտի նետեմ Այնպիսի երկիր մը՝ որ չէք ճանչնար, Ո՛չ դուք, ո՛չ ալ ձեր հայրերը. Հոն ցերեկ ու գիշեր ուրիշ աստուածներ պիտի պաշտէք, Որովհետեւ ձեզի ողորմութիւն ⁷ցոյց պիտի չտամ”»։

ՎԵՐԱԴԱՐՁ ԱՔՍՈՐԷՆ

«Հետեւաբար ահա՛ պիտի գան օրերը,— կը պատգամէ Տէրը,— Երբ ա՛լ պիտի չըսուի. “Կ’ապրի՛ Տէրը՝ Որ Իսրայէլի որդիները բարձրացուց Եգիպտոսի երկրէն”,

Հապա. “Կ’ապրի՛ Տէրը՝ Որ Իսրայէլի որդիները բարձրացուց հիւսիսի երկրէն, Եւ այն բոլոր երկիրներէն՝ ուր զանոնք աքսորեր էր”. Արդարեւ զանոնք պիտի վերադարձնեմ իրենց ⁸երկիրը՝ Որ իրենց հայրերուն տուեր եմ»։

ԳԱԼԻՔ ՊԱՏՈՒՀԱՍԸ

«Ահա՛ ես շատ ձկնորսներ պիտի ղրկեմ,— կը պատգամէ Տէրը,— Որ զանոնք որսան. Յետոյ շատ որսորդներ պիտի ղրկեմ, Որ զանոնք որսան ամէն լերան վրայէն, Ամէն բլուրի վրայէն, Ու ժայռերու ծակերէն։

Արդարեւ իմ աչքերս անոնց բոլոր ⁹ճամբաներուն վրայ են. Իմ երեսէս ծածկուած չեն, Անոնց անօրէնութիւնը իմ աչքերուս առջեւէն պահուած չէ։

Սակայն նախ անոնց անօրէնութիւնն ու մեղքը Կրկնապատիկ պիտի հատուցանեմ, Քանի իմ երկիրս պղծեցին, Եւ իմ ժառանգութիւնս լեցուցին Իրենց պղծութիւններուն ու գարշութիւններուն դիակներով»։

ԵՐԵՄԻԱՅԻ ՎՍՏԱՀՈՒԹԵԱՆ ԱՂՕԹՔԸ

Ո՛վ Տէր, իմ զօրութիւնս, իմ ամրոցս, Եւ ապաստանարանս՝ տագնապի օրը, Երկրի ծայրերէն ¹⁰հեթանոսները քեզի պիտի գան Ու պիտի ըսեն. «Ի՛րապէս մեր հայրերը ստութիւն, Ունայնութիւն եւ անօգուտ բաներ ժառանգեր են»։

Միթէ մարդը կրնա՞յ իրեն աստուածներ կերտել, Որոնք աստուածներ չեն։

«Հետեւաբար ահա՛ այս անգամ ես անոնց պիտի ¹¹ցուցնեմ, Իմ ձեռքս ու զօրութիւնս անոնց պիտի ցուցնեմ, Եւ պիտի գիտնան թէ իմ անունս Եհովա է»։