Jeremiah 19

Isaiah  «  Jeremiah 18  ‹  Jeremiah 19  ›  Jeremiah 20  »  Lamentations

ԿՈՏՐԱԾ ԿՈՒԺԸ

Տէրը սա՛ ¹ըսաւ. «Գնա՛, բրուտի ձեռքով շինուած ²խեցիէ կո՛ւժ մը գնէ, եւ ա՛ռ քեզի հետ ժողովուրդէն քանի մը երէցներ ու քահանաներէն քանի մը երէցներ։

³Գնա՛ ⁴Խեցիներու դրան մուտքը եղող Ենովմի որդիին ձորը, եւ հոն ⁵արտասանէ՛ այն խօսքերը՝ որ քեզի պիտի հաղորդեմ»։

Ըսէ՛. «Ո՛վ Յուդայի թագաւորներ ու Երուսաղէմի բնակիչներ, մտի՛կ ըրէք Տէրոջ խօսքը։ Զօրքերու Տէրը՝ Իսրայէլի Աստուածը սա՛ կը յայտարարէ. “Ահա՛ ես այս տեղին վրայ այնպիսի չարիք մը պիտի բերեմ, որ զայն լսողին ականջները պիտի հնչեն։

Արդարեւ անոնք զիս լքեցին, այս տեղը ինձմէ օտարացուցին, ու հոս խունկ ծխեցին ուրիշ աստուածներու՝ որ ո՛չ իրենք կը ճանչնային, ո՛չ իրենց հայրերը, ո՛չ ալ Յուդայի թագաւորները, եւ այս տեղը անմեղ արիւնով լեցուցին.

Նաեւ Բահաղի բարձր տեղեր կառուցանեցին, որպէսզի իրենց որդիները կրակով այրեն իբր Բահաղի ողջակէզ, ինչ որ ես չհրամայեցի, ո՛չ ալ այդ մասին խօսեցայ կամ ⁶մտածեցի։

Ուստի ահա՛ կու գան օրերը,— կը պատգամէ Տէրը,— երբ անգամ մըն ալ այս տեղը Տոփէթ ու Ենովմի որդիին ձորը պիտի չկոչուի, հապա՝ Ջարդի ձոր։

Այս տեղը Յուդայի եւ Երուսաղէմի ծրագիրը պիտի ⁷ոչնչացնեմ. զանոնք իրենց թշնամիներուն առջեւ սուրով պիտի ⁸զարնեմ, իրենց կեանքը փնտռողներուն ձեռքով։ Անոնց դիակները երկինքի թռչուններուն ու երկրի գազաններուն պիտի տամ իբր ուտելիք։

Այս քաղաքը ամայի եւ սուլոցի առարկայ պիտի ⁹դարձնեմ։ Ո՛վ որ անոր քովէն անցնի՝ անոր բոլոր պատուհասներուն պատճառով պիտի ապշի ու սուլէ։

Իրենց որդիներուն միսը եւ իրենց աղջիկներուն միսը պիտի կերցնեմ անոնց. իրարու միս պիտի ուտեն պաշարումի ու տուայտանքի ընթացքին՝ որուն մէջ անոնց թշնամիները եւ անոնց կեանքը փնտռողները զիրենք պիտի ձգեն”»։

«Յետոյ այդ կուժը կոտրէ՛ քեզի հետ գացող մարդոց աչքերուն առջեւ,

եւ անոնց ըսէ՛. “Զօրքերու Տէրը սա՛ կը յայտարարէ. "Այս ժողովուրդն ու այս քաղաքը այնպէս պիտի կոտրեմ, ինչպէս մէկը բրուտի անօթը կը կոտրէ, որ ա՛լ ¹⁰չնորոգուի. զանոնք Տոփէթի մէջ պիտի թաղեն՝ ¹¹մինչեւ որ ա՛լ թաղելու տեղ չմնայ՝՝"”»։

«Ա՛յսպէս պիտի ընեմ այս տեղին եւ անոր բնակիչներուն,— կը պատգամէ Տէրը.— այս քաղաքը Տոփէթի պիտի ¹²վերածեմ։

Երուսաղէմի տուներն ու Յուդայի թագաւորներուն տուները Տոփէթի տեղին պէս անմաքուր պիտի ըլլան՝ ¹³այն բոլոր տուներուն պատճառով՝՝, որոնց տանիքներուն վրայ երկինքի ամբողջ զօրքին խունկ ծխեցին եւ ուրիշ աստուածներու թափելիք նուէրներ ¹⁴ընծայեցին»։

Երեմիա Տոփէթէն եկաւ, ուր Տէրը զինք ղրկեր էր մարգարէանալու համար, Տէրոջ տան գաւիթը կայնեցաւ եւ ամբողջ ժողովուրդին ըսաւ.

«Զօրքերու Տէրը՝ Իսրայէլի Աստուածը սա՛ կը յայտարարէ. “Ահա՛ այս քաղաքին վրայ ու անոր բոլոր ¹⁵գիւղաքաղաքներուն վրայ պիտի բերեմ ամբողջ չարիքը՝ որ ¹⁶վճռեցի անոր դէմ. որովհետեւ իրենց պարանոցը խստացուցին, որպէսզի իմ խօսքերս մտիկ չընեն”»։