Jeremiah 22

Isaiah  «  Jeremiah 21  ‹  Jeremiah 22  ›  Jeremiah 23  »  Lamentations

ԵՐԵՄԻԱՅԻ ՊԱՏԳԱՄԸ ՅՈՒԴԱՅԻ ԱՐՔԱՅԱԿԱՆ ՏԱՆ

Տէրը սա՛ կը յայտարարէ. «Յուդայի թագաւորին տո՛ւնը իջիր, Ու հոն սա՛ խօսքը ըսէ.

“Ո՛վ Դաւիթի գահին վրայ բազմող Յուդայի թագաւոր, Մտի՛կ ըրէ Տէրոջ խօսքը, Թէ՛ դուն, թէ՛ քու ծառաներդ ու ժողովուրդդ, Որ այս դռներէն կը մտնէք։

Տէրը սա՛ կը յայտարարէ. "Իրաւո՛ւնք եւ արդարութի՛ւն կիրարկեցէք. Ազատեցէ՛ք յափշտակութեան ենթարկուողը հարստահարիչին ձեռքէն. Գաղթականը, որբը եւ այրին Մի՛ կեղեքէք, բռնութիւն մի՛ բանեցնէք, Եւ այս տեղը անմեղ արիւն մի՛ թափէք։

Արդարեւ եթէ ի՛րապէս այս խօսքը գործադրէք, Դաւիթի գահին վրայ բազմող թագաւորները՝ Կառքերու եւ ձիերու վրայ հեծած՝ Այս տան դռներէն պիտի մտնեն, ¹Իրե՛նք, եւ իրենց ծառաներն ու ժողովուրդը։

Բայց եթէ այս խօսքերը մտիկ չընէք, ²Իմ անձիս վրայ՝՝ երդում կ’ընեմ,— կը պատգամէ Տէրը,— Թէ այս տունը աւերակ պիտի ըլլայ"”»։

Որովհետեւ Յուդայի թագաւորին տան մասին՝ Տէրը սա՛ կը յայտարարէ. «Դուն ինծի Գաղաադի պէս Ու Լիբանանի գագաթին պէս ես, Սակայն անշուշտ քեզ անապատի Եւ անբնակ քաղաքներու պիտի ³վերածեմ,

Ու քեզի դէմ բնաջնջողներ պիտի ⁴պատրաստեմ. Իւրաքանչիւրը իր զէնքով պիտի գայ, Եւ քու ընտիր մայրիներդ պիտի կտրեն Ու կրակը ձգեն»։

Այս քաղաքէն շատ ազգեր պիտի անցնին Եւ իրարու ըսեն. “Ինչո՞ւ Տէրը այս մեծ քաղաքին հետ այսպէս վարուեցաւ”։

Ու պիտի պատասխանեն. “Որովհետեւ Տէրոջ՝ իրենց Աստուծոյն ուխտը լքեցին, Եւ ուրիշ աստուածներու երկրպագեցին ու զանոնք պաշտեցին”։

Մեռնողին համար մի՛ լաք, Անոր համար մի՛ ողբաք. Հապա գացողի՛ն համար դառնապէս լացէք, Որովհետեւ ա՛լ պիտի չվերադառնայ Եւ իր ⁵ծննդավայրը պիտի չտեսնէ»։

Արդարեւ Տէրը սա՛ կը յայտարարէ Յուդայի թագաւորին՝ Յովսիայի որդիին Սեղղումի մասին, Որ իր հօր՝ Յովսիայի տեղ թագաւորեց Ու այս տեղէն դուրս ելաւ. «Ան ա՛լ հոս պիտի չվերադառնայ,

Հապա իր տարագրուած տեղը պիտի մեռնի. Ա՛լ այս երկիրը պիտի չտեսնէ»։

«Վա՜յ անոր՝ որ իր տունը անարդարութեամբ կը կառուցանէ, Եւ իր վերնատունները՝ անիրաւութեամբ. Որ իր ընկերը առանց վճարումի կ’աշխատցնէ, Ու անոր ⁶գործը չի վարձատրեր՝՝.

Որ կ’ըսէ. “Ինծի ընդարձակ տուն Ու հանգստաւէտ վերնատուններ կառուցանեմ”, Եւ իրեն պատուհաններ կը բանայ, Զայն մայրիի փայտով կը պատէ Ու ⁷նօթով կը ներկէ։

Արդեօք պիտի թագաւորե՞ս Մայրիի փայտերու ⁸զարդարանքովդ։ Միթէ քու հայրդ, որ կերաւ ու խմեց, Իրաւունք եւ արդարութիւն կիրարկեց, Բարօրութիւն չունեցա՞ւ։

Դժբախտին եւ աղքատին դատը պաշտպանեց, Ուստի անոր բարիք եղաւ։ Միթէ զիս ճանչնալը ասիկա չէ՞,— կը պատգամէ Տէրը։—

Սակայն քու աչքերդ ու սիրտդ Միայն ագահութեանդ ուղղուած են, Որպէսզի անմեղ արիւն թափես, Եւ հարստահարութիւն ու վայրագութիւն բանեցնես»։

ԵՐԵՄԻԱՅԻ ՊԱՏԳԱՄԸ ՅՈՎԱԿԻՄԻ ՄԱՍԻՆ

Հետեւաբար Տէրը սա՛ կը յայտարարէ Յուդայի թագաւորին՝ Յովսիայի որդիին Յովակիմի մասին. «Անոր վրայ պիտի չհեծեծեն՝ ըսելով. “Վա՜յ, եղբայրս”, կամ. “Վա՜յ քոյրս”. Անոր վրայ պիտի չհեծեծեն՝ ըսելով. “Վա՜յ, իմ տէ՛րս”, կամ. “Վա՜յ անոր պատիւին”։

Ան իշու թաղումով պիտի թաղուի. Պիտի քաշկռտուի, Ու Երուսաղէմի դռներէն դուրս նետուի»։

ԵՐԵՄԻԱՅԻ ՊԱՏԳԱՄԸ ԵՐՈՒՍԱՂԷՄԻ ՃԱԿԱՏԱԳՐԻՆ ՄԱՍԻՆ

«Լիբանա՛ն բարձրացիր եւ աղաղակէ՛. Ձայնդ լսե՛լ տուր Բասանի մէջ, Եւ աղաղակէ՛ Աբիրամէ. Որովհետեւ քու բոլոր հոմանիներդ ջախջախուեցան։

Երբ դուն անդորրութեան մէջ էիր՝ քեզի խօսեցայ, Բայց դուն ըսիր. “Մտիկ չեմ ըներ”։ Քու երիտասարդութենէդ ի վեր ա՛յս է ⁹ընթացքդ, Որ իմ խօսքս մտիկ չընես։

Քու բոլոր հովիւներդ հովին ճարակ պիտի ըլլան, Ու հոմանիներդ գերութեան պիտի երթան։ Անշուշտ այն ատեն պիտի ամչնաս եւ խայտառակուիս Ամբողջ չարութեանդ համար։

Ո՛վ Լիբանանի մէջ բնակող Ու մայրիներու մէջ բոյն ունեցող, Ո՜րչափ ողորմելի պիտի ըլլաս՝ երբ վրադ երկունքի ցաւեր հասնին, Ծննդաբերող կնոջ երկունքի ցաւին պէս»։

ՅԵՔՈՆԻԱՅԻ ԴԱՏԱՍՏԱՆԸ

«Ես կ’ապրի՛մ,— կը պատգամէ Տէրը,— Ո՛վ Յուդայի թագաւոր, Յովակիմի որդի՝ Յեքոնիա. Թէեւ իմ աջ ձեռքիս մէջ կնիք ըլլաս, Անկէ ալ քեզ պիտի փրցնեմ։

Քեզ պիտի մատնեմ կեանքդ փնտռողներուն ձեռքը, Այն մարդոց ձեռքը՝ ¹⁰որոնցմէ դուն կը վախնաս.— Բաբելոնի Նաբուգոդոնոսոր թագաւորին ձեռքը, Ու Քաղդէացիներուն ձեռքը։

Քեզ ու մայրդ՝ որ քեզ ծնաւ, Օտար երկիր պիտի նետեմ՝ Ուր ծնած չէք, Եւ հոն պիտի մեռնիք.

Պիտի չվերադառնան այն երկիրը՝ Ուր վերադառնալ ¹¹կը տենչան՝՝»։

Միթէ այս մարդը՝ Յեքոնիա արհամարհուած ու կոտրտած սափո՞ր մըն է, Կամ թէ այնպիսի անօ՞թ մը՝ որմէ ո՛չ մէկը կ’ախորժի։ Ինչո՞ւ ինք եւ իր զարմը վտարուեցան, Ու նետուեցան երկիր մը՝ որ չէին ճանչնար։

Ո՛վ երկիր, երկիր, երկիր, Մտի՛կ ըրէ Տէրոջ խօսքը։

Տէրը սա՛ կը յայտարարէ. «Իբր անզաւա՛կ արձանագրեցէք այս մարդը, ¹²Մարդ մը՝ որ իր օրերուն մէջ պիտի չյաջողի. Արդարեւ անոր զարմէն ո՛չ մէկը պիտի յաջողի Դաւիթի գահին վրայ բազմիլ, Ու երբեք Յուդայի վրայ տիրել»։