Jeremiah 35

Isaiah  «  Jeremiah 34  ‹  Jeremiah 35  ›  Jeremiah 36  »  Lamentations

ԵՐԵՄԻԱ ԵՒ ՌԵՔԱԲԵԱՆՆԵՐԸ

Յուդայի թագաւորին՝ Յովսիայի որդիին Յովակիմի օրերը, Երեմիայի ¹ուղղուած խօսքը Տէրոջմէն՝ որ ըսաւ.

«Գնա՛ Ռեքաբեաններուն տունը, խօսէ՛ անոնց հետ, տա՛ր զանոնք Տէրոջ տունը՝ սենեակներէն մէկուն մէջ, եւ գինի՛ խմցուր անոնց»։

Ես ալ առի Քաբասինիայի որդիին՝ Երեմիայի որդին՝ Յեզոնիան, անոր եղբայրներն ու բոլոր որդիները, եւ Ռեքաբեաններուն ամբողջ տունը,

ու զանոնք Տէրոջ տունը տարի — Աստուծոյ մարդուն՝ Յեգդողիայի որդիին Անանի որդիներուն սենեակը —, որ Սեղղումի որդիին՝ Մաասիա դռնապանին սենեակին վրայ եղող իշխանաւորներուն սենեակին քով էր։

Ռեքաբեաններու տան որդիներուն առջեւ գինիով լեցուն սկահակներ ու բաժակներ դրի, եւ անոնց ըսի. «Գինի՛ խմեցէք»։

Անոնք պատասխանեցին. «Գինի չենք խմեր. քանի որ մեր հայրը, Ռեքաբի որդին՝ Յովնադաբ, մեզի հրամայեց. “Դուք ու ձեր որդիները երբե՛ք գինի մի՛ խմէք.

տուն մի՛ կառուցանէք, սերմ մի՛ ցանէք, այգի մի՛ տնկէք եւ մի՛ ունենաք, հապա ձեր բոլոր օրերը վրաններո՛ւ մէջ բնակեցէք, որպէսզի ձեր պանդխտացած ²երկրին վրայ շատ օրեր ապրիք”։

Ուստի մեր հօր՝ Ռեքաբի որդիին Յովնադաբի խօսքը մտիկ ըրինք՝ ամբողջ մեզի պատուիրածին համաձայն. մեր բոլոր օրերուն մէջ՝ մենք, մեր կիները, մեր որդիներն ու աղջիկները գինի չենք խմեր,

մեր բնակութեան համար տուներ չենք կառուցաներ, այգի, արտ եւ ցանք չենք ունենար.

հապա վրաններու մէջ կը բնակինք, ու հնազանդելով՝ մեր հօր Յովնադաբի ամբողջ մեզի հրամայածը կը գործադրենք։

Բայց երբ Բաբելոնի Նաբուգոդոնոսոր թագաւորը այս երկրին դէմ բարձրացաւ, ըսինք. “Եկէ՛ք Երուսաղէմ երթանք, Քաղդէացիներու զօրագունդին եւ ³Ասորիներու զօրագունդին ⁴առջեւէն”. այսպէս՝ Երուսաղէմ կը բնակինք»։

Այն ատեն ⁵Տէրը խօսեցաւ՝՝ Երեմիայի՝ ըսելով.

«Զօրքերու Տէրը՝ Իսրայէլի Աստուածը սա՛ կը յայտարարէ. “Գնա՛ եւ ըսէ՛ Յուդայի մարդոց ու Երուսաղէմի բնակիչներուն. "Իմ խօսքերս մտիկ ընելու համար խրատ չէ՞ք ընդունիր,— կը պատգամէ Տէրը։—

Ռեքաբի որդիին՝ Յովնադաբի խօսքերը — որ իր որդիներուն հրամայեր էր գինի չխմել — ⁶գործադրուեցան, որովհետեւ իրենց հօր հրամանին հնազանդելով՝ մինչեւ այսօր չեն խմեր. իսկ ես ձեզի խօսեցայ — կանուխ ելլելով խօսեցայ —, սակայն ինծի մտիկ չըրիք։

Իմ բոլոր ծառաներս՝ մարգարէները ձեզի ղրկեցի — կանուխ ելլելով ղրկեցի — եւ ըսի. «Ձեզմէ իւրաքանչիւրը իր չար ճամբայէն թող դարձի գայ. բարեփոխեցէ՛ք ձեր արարքները, ուրիշ աստուածներու մի՛ հետեւիք եւ զանոնք մի՛ պաշտէք, որպէսզի բնակիք այն ⁷երկրին մէջ՝՝ որ ձեզի ու ձեր հայրերուն տուի». բայց ձեր ականջը չդարձուցիք եւ ինծի մտիկ չըրիք։

Ի՛րապէս Ռեքաբի որդիին՝ Յովնադաբի որդիները իրենց հօր պատուիրած հրամանը ⁸գործադրեցին, բայց այս ժողովուրդը ինծի մտիկ չըրաւ"”։

Հետեւաբար Տէրը — զօրքերու Աստուածը, Իսրայէլի Աստուածը — սա՛ կը յայտարարէ. “Ահա՛ ես Յուդայի ու Երուսաղէմի բոլոր բնակիչներուն վրայ պիտի բերեմ այն ամբողջ չարիքը՝ որ անոնց դէմ ⁹վճռեր էի. որովհետեւ անոնց խօսեցայ, բայց մտիկ չըրին. զանոնք կանչեցի, բայց չպատասխանեցին”»։

Երեմիա Ռեքաբեաններու տան ըսաւ. «Զօրքերու Տէրը՝ Իսրայէլի Աստուածը սա՛ կը յայտարարէ. “Քանի ձեր հօր՝ Յովնադաբի պատուէրին հնազանդեցաք, անոր բոլոր հրամանները պահեցիք, եւ ամէն ինչ որ ձեզի պատուիրեց՝ գործադրեցիք,

զօրքերու Տէրը՝ Իսրայէլի Աստուածը սա՛ կը յայտարարէ. "Ռեքաբեան Յովնադաբէն իմ առջեւս կայնող մարդ ¹⁰ընդմիշտ պիտի չպակսի"”»։