Jeremiah 38

Isaiah  «  Jeremiah 37  ‹  Jeremiah 38  ›  Jeremiah 39  »  Lamentations

ԵՐԵՄԻԱ ՉՈՐ ՋՐՀՈՐԻ ՄԸ ՄԷՋ

Մատթանի որդին՝ Սափատիա, Փասուրի որդին՝ Գոդողիա, Սեղեմիայի որդին՝ Յուքազ ու Մեղքիայի որդին՝ Փասուր լսեցին Երեմիայի ըսած խօսքերը ամբողջ ժողովուրդին. ան ըսաւ. «Տէրը սա՛ կը յայտարարէ.

“Այս քաղաքին մէջ կեցողը սուրով, սովով ու ժանտախտով պիտի մեռնի։ Իսկ ո՛վ որ Քաղդէացիներուն ¹յանձնուի, ողջ պիտի մնայ. անոր կեանքը աւարի մը պէս պիտի ըլլայ իրեն, ու պիտի ապրի”։

Տէրը սա՛ կը յայտարարէ. “Այս քաղաքը անպատճառ Բաբելոնի թագաւորին զօրագունդին ձեռքը պիտի մատնուի, որ զայն պիտի գրաւէ”»։

Իշխանաւորները թագաւորին ըսին. «Կ’աղերսե՛նք, թող այս մարդը մեռցուի, որովհետեւ այս քաղաքին մէջ մնացած պատերազմիկներուն ձեռքերն ու ամբողջ ժողովուրդին ձեռքերը կը թուլցնէ՝ անոնց այսպիսի խօսքեր ըսելով. արդարեւ այս մարդը այս ժողովուրդին խաղաղութիւնը չ’ուզեր, հապա՝ անոր չարիքը»։

Սեդեկիա թագաւորը ըսաւ. «Ահա՛ անիկա ձեր ձեռքն է, որովհետեւ թագաւորը ձեզի հակառակ ոչինչ կրնայ ընել»։

Ուստի Երեմիան բռնեցին ու զայն թագաւորին որդիին՝ Մեղքիայի գուբը նետեցին, որ բանտին բակին մէջ էր. Երեմիան պարաններով իջեցուցին։ Այդ գուբին մէջ ջուր չկար, հապա միայն ²սիկ. ուստի Երեմիա սիկին մէջ մխրճուեցաւ։

Երբ թագաւորին տունը եղող պալատականներէն Եթովպիացի Աբդեմելէք լսեց թէ Երեմիան գուբը ³ձգեցին, թագաւորը Բենիամինի դուռը բազմած էր։

Աբդեմելէք թագաւորին տունէն ելաւ ու թագաւորին խօսեցաւ՝ ըսելով.

«Ո՛վ թագաւո՛ր, իմ տէ՛րս, այս մարդիկը չարիք գործեցին՝ այդ բոլորը Երեմիա մարգարէին ընելով եւ զայն գուբը նետելով. արդարեւ ան իր եղած տեղը անօթութենէն ⁴պիտի մեռնի՝՝, որովհետեւ քաղաքին մէջ ա՛լ հաց չկայ»։

Թագաւորը Եթովպիացի Աբդեմելէքի հրամայեց. «Ասկէ երեսո՛ւն մարդ առ քեզի հետ, ու գուբէն հանէ՛ Երեմիա մարգարէն՝ քանի մեռած չէ»։

Ուստի Աբդեմելէք իրեն հետ առաւ մարդիկը, եւ թագաւորին տունը գնաց՝ շտեմարանին տակ. անկէ մաշած քուրջեր ու մաշած ցնցոտիներ առաւ, եւ զանոնք պարաններով գուբը՝ Երեմիայի իջեցուց։

Եթովպիացի Աբդեմելէք Երեմիայի ըսաւ. «Դի՛ր այս մաշած քուրջերն ու ցնցոտիները անութներուդ տակ՝ պարաններուն տակ»։ Երեմիա ալ այդպէս ըրաւ։

Երեմիան պարաններով քաշեցին եւ զինք գուբէն դուրս հանեցին. ու Երեմիա բանտին բակին մէջ մնաց։

ՍԵԴԵԿԻԱ ԿԸ ԴԻՄԷ ԵՐԵՄԻԱՅԻ ԽՈՐՀՈՒՐԴԻՆ

Սեդեկիա թագաւորը մարդ ղրկեց, Երեմիա մարգարէն իր քով բերել տուաւ՝ Տէրոջ տան երրորդ մուտքը, ու թագաւորը Երեմիայի ըսաւ. «Քեզի բան մը պիտի հարցնեմ. ոչի՛նչ պահէ ինձմէ»։

Երեմիա Սեդեկիայի պատասխանեց. «Եթէ քեզի իմացնեմ, զիս անշուշտ պիտի չմեռցնե՞ս. ու եթէ քեզի խորհուրդ տամ, ինծի մտիկ պիտի չընես»։

Բայց Սեդեկիա թագաւորը Երեմիայի ծածկաբար երդում ըրաւ եւ ըսաւ. «Մեզի այս հոգին ⁵ստեղծող Տէրը կ’ապրի. քեզ պիտի չմեռցնեմ, ո՛չ ալ քեզ պիտի մատնեմ այս մարդոց ձեռքը, որոնք քու կեանքդ կը փնտռեն»։

Այն ատեն Երեմիա Սեդեկիայի ըսաւ. «Տէրը, զօրքերու Աստուածը, Իսրայէլի Աստուածը սա՛ կը յայտարարէ. “Եթէ ⁶յօժարութեամբ յանձնուիս՝՝ Բաբելոնի թագաւորին իշխանաւորներուն, քու անձդ ողջ պիտի մնայ, եւ այս քաղաքը կրակով պիտի չայրի. դուն ու տունդ պիտի ապրիք։

Բայց եթէ չյանձնուիս Բաբելոնի թագաւորին իշխանաւորներուն, այս քաղաքը Քաղդէացիներուն ձեռքը պիտի մատնուի, որոնք զայն կրակով պիտի այրեն, եւ դուն անոնց ձեռքէն պիտի չազատիս”»։

Սեդեկիա թագաւորը Երեմիայի ըսաւ. «Քաղդէացիներուն ⁷կողմը անցած՝՝ Հրեաներէն կը զարհուրիմ, որ զիս անոնց ձեռքը չմատնեն ու անոնք զիս չանպատուեն»։

Երեմիա պատասխանեց. «Պիտի չմատնեն. կ’աղերսե՛մ, մտի՛կ ըրէ Տէրոջ խօսքը՝ որ քեզի կ’ըսեմ, որպէսզի քեզի բարիք ըլլայ եւ անձդ ողջ մնայ։

Բայց եթէ մերժես յանձնուիլ, ահա՛ւասիկ Տէրոջ ինծի ցոյց տուած ⁸տեսիլքը.—

Ահա՛ Յուդայի թագաւորին տունը մնացած բոլոր կիները Բաբելոնի թագաւորին իշխանաւորներուն պիտի ⁹տարուին, եւ այդ կիները պիտի ըսեն. “¹⁰Քեզի խաղաղութիւն ծանուցանող մարդիկդ կրցան քեզ համոզել՝՝. երբ ոտքերդ տիղմին մէջ մխրճուեցան, անոնք ետ քաշուեցան”։

Քու բոլոր կիներդ ու որդիներդ Քաղդէացիներուն պիտի ¹¹տանին. դուն ալ անոնց ձեռքէն պիտի չազատիս, հապա Բաբելոնի թագաւորին ձեռքով պիտի բռնուիս, եւ դուն ¹²պատճառ պիտի ըլլաս որ այս քաղաքը կրակով այրի՝՝»։

Սեդեկիա Երեմիայի ըսաւ. «Այս խօսքերուն ո՛չ մէկը թող տեղեկանայ, որ դուն չմեռնիս։

Եթէ իշխանաւորները լսեն թէ քեզի հետ խօսեցայ, ու քեզի գան եւ ըսեն. “Այժմ իմացո՛ւր մեզի, ի՞նչ խօսեցար թագաւորին հետ. մեզմէ մի՛ պահեր, որ քեզ չմեռցնենք. թագաւորը քեզի հետ ի՞նչ խօսեցաւ”,

պատասխանէ՛ անոնց. “Ես թագաւորին առջեւ աղաչանքս ¹³ներկայացուցի՝ որ զիս Յովնաթանի տունը չվերադարձնէ, որ հոն չմեռնիմ”»։

Արդարեւ բոլոր իշխանաւորները Երեմիայի եկան եւ զինք հարցուփորձեցին. ինք ալ անոնց իմացուց այս բոլոր խօսքերուն համաձայն՝ որ թագաւորը հրամայեր էր։ Ուստի ¹⁴իրեն հետ խօսելէն դադրեցան՝՝, որովհետեւ ¹⁵գաղտնիքը չյայտնուեցաւ՝՝։

Երեմիա բանտին բակին մէջ մնաց՝ մինչեւ Երուսաղէմի գրաւումի օրը. ինք հոն էր երբ Երուսաղէմ գրաւուեցաւ։